1 Pedro 4:8 - Ke meupiya ne tudtul mekeatag ki Hisu Kristu

⁸ Ne iyan ta ibpeuna te hinawa ta ne egeweran ta te meilut ini se kedlimù ta dut te menge ruma ta ne menge mibperetiyaya. Su embiya tidtu se limù ta dut te menge ruma ta ne misan duen salà dan keyta ne egkepakey ne ebpeseharen ta.

1 Pedro 4:8 ပူးပေါင်းရင်းမြစ်များ

1 Kurintu 13:1

Su misan metau a te ebpekelalag dut te merakel ne kinehiyan kayi te ampew te dunya wey misan ke kinehiyan te suluhuen te Eleteala ne riyà te langit, ugaid ne embiya warà limù ku te menge ruma ku ne warà pantag din ke kebpekelalag ku rut te merakel ne kinehiyan. Su iring a rà te ebpekeuringer ne ebedtingen ne ahung etawa luyung te kayu ne ebesalen.

1 Kurintu 13:4

Su embiya benar se limù ta te menge ruma ta, ne iyan ta egked-ulaula ne ebpekepeninigker ki, ne ebpeketulanged ki, ne warà kegkeima ne idtahù ta te hinawa ta, ne kenà iyan ta ebpemengaan se kegkereyui ta, wey kenà ki ebpendantal.

Kulasi 3:14

Wey ke kerekdekelaan din ne ed-ul-ulaan niyu ne ke kebpelimlimuey niyu, su ini se kebpelimlimuey niyu se ebpekevagkes keniyu te kegkeseveka te hinawa niyu.

1 Tiselunika 3:12

Ne ibpengeningeni rey lavew te Eleteala ne ed-umanan din pà ke kebpelimlimuey niyu wey ke limù niyu te piya engkey ne etew iring dut te kerekelà te limù dey keniyu.

2 Tiselunika 1:3

Menge suled, kenà egkepakey ne kenà key layun ebpeselamat diyà te Eleteala mekeatag keniyu. Ne dait ini se ed-ul-ulaan dey su layun ebpekeiseg ke keilut dut te kebperetiyaya niyu ki Hisus wey ke kebpelimlimuey niyu ne ebpekeiseg lavew.

1 Timoteo 1:5

Iyan ku idsuhù ini su apey ran ebpelimlimuey. Ini se kebpelimlimuey ne egenat te hinawa ran ne midtilak te Eleteala su apey warà ebpekesawug ne meraat te itungan dan wey kenà alang-alang se kedsarig dan ki Hisu Kristu.

Hibruhanen 13:1

Na sikiyu ke ebpenusuled te kineperetiyaya ne iyan niyu ibpeiseg ne ke kebpelimlimuey niyu.

Santiago 5:12

Na menge suled ku, ini se dekelà dut te langun ne suhù ku keniyu. Kenà kew edsesapà. Embiya ruen ibpasad niyu te menge ruma niyu, ne kenà kew edsesapà te langit etawa tanà etawa piya engkey en, su langun ne lalag niyu ne tidtuwa niyu. Kehiya niyu rà se “Uya” etawa “Kenà” su apey kew kenà egkeumai te kedusa te Eleteala.

Santiago 5:20

Ne tentenuri niyu ini se egkehiyen ku. Embiya edtevangan nu ke etew su apey rin ed-engkeri se keduma rin te meraat, ne ibpepeliyu nu sikandin su apey kenà edusai taman te taman. Ne egenat ketà, ne Eleteala se ebpesehad dema dut te merakel ne salà din.

1 Pedro 1:22

Na geina te mibperumaruma ki en dut te tidtu ne penurù ne egkepakey ne meilut se limù tew rut te menge ruma tew te ebperetiyaya su mibmetidtu ke itungan tew. Tembù be ebpelimlimuey ki egenat te hinawa ta ne kenà kayi rà te bèbà ta.

3 Juan 1:2

Suled ne meheget, ibpengeningeni ku sikew te Eleteala ne meupiya se egketemtemanan nu wey ebehayan ka te meupiya ne kedlelawa nu, su netuenan ku ne mevaher se kebperetiyaya nu.