1 Pedro 3:20 - Ke meupiya ne tudtul mekeatag ki Hisu Kristu

²⁰ Ne ini ke menge gimukud dut te menge etew rengan ne warà mibperetiyaya te Eleteala ketà te hewii ni Noe. Rengan te biviyag den pà ne midtigkeran dut te Eleteala ke meraat ne ulaula ran su midtahad sikandin embiya ebpekeperetiyaya ran gewii te ebelayan pà ni Noe ke avang ne ed-ingaranan te arka. Ugaid ne guna su nekeipus si Noe te arka ne mid-urug ke ralem, ne ruen walu rà ne menge etew ne mibperetiyaya kandin ne midlusud te arka ne nekeliyu ran dut te kegkelened.

1 Pedro 3:20 ပူးပေါင်းရင်းမြစ်များ

Mateo 7:14

Ugaid ne melihet ke gumawan wey mepasang ne ibayà ke dalan ne ebpependiyà te umur ne kenà edtaman, ne merelag dà se ebpeketuen ketà.”

Lucas 12:32

“Sikiyu ini se menge edumdumaan ku,” ke si Hisus, “kenà kew meandek, su misan deisek kew rà ne ke Amey niyu riyà te langit ne egkiyug ne egkeratù kew dut te menge etew ne Edetuan din.

Nenged-ulaula 2:41

Ne merakel se mibperetiyaya dut te lalag ne impesabut ni Pedro ne mibpebunyag dan tuus te ebperetiyaya ran en ki Hisus. Ne arà ne hewii ne menge tetelu ne ngivu se menge mibperetiyaya ne nekeuman dut te menge etew ne mibperetiyaya ki Hisus.

Ruma 9:22

Ne engketà ded be rema ke Eleteala su ibayàbayà din ke engkey se kebped-ulaula rin dut te menge etew. Su misan egkesuatan din en te ebpekita ke epes din wey ke gehem din te edusa dut te menge etew ne warà mebperumaruma kandin, ne warà din pà ul-ulaa. Su midtigkeran din pà lavew ini se menge etew ne andang ne edereetan din.

Ipisu 5:26

Mid-ulaula rin ini su apey kiyu ebmetilak dut te langun ne salà tew. Su iring te midlùluan din ke menge salà tew, ne ke tuus te midtilak kiyu en ne arà se kinebunyahi kenitew wey ke Lalag te Eleteala ne edumaan tew.

Hibruhanen 11:7

Engketà ded be rema ke kedsarig ni Noe te Eleteala rengan. Su sabat dut te kedsarig din ne mibperetiyaya sikandin dut te imbaag te Eleteala ne ruen rimas ne ebpekeuma, misan warà din pà mekita te iring ketà. Ne midumaan din ke lalag te Eleteala su mibeelan din en ke rekelà ne avang ne ed-ingaranan te arka ne mid-untud dan en ketà se telteleanak. Ne ketà te kinelampey kayi te dunya, ne warà dan meherà. Su sabap dut te kedsarig din te Eleteala, ne nevirangan sikandin te Eleteala ne metidtu. Ugaid ne ke ruma pà ne menge etew ne midusaan te Eleteala te kepepatey su warà dan mebperetiyaya.

1 Pedro 1:22

Na geina te mibperumaruma ki en dut te tidtu ne penurù ne egkepakey ne meilut se limù tew rut te menge ruma tew te ebperetiyaya su mibmetidtu ke itungan tew. Tembù be ebpelimlimuey ki egenat te hinawa ta ne kenà kayi rà te bèbà ta.

1 Pedro 1:9

Ne iyan kegkeiring ketà su ruen umur ne warà edtemanan din ne egketelimà niyu sabap te mibperetiyaya kew kandin.

1 Pedro 2:25

Su rengan te warà ki pà mebperetiyaya ki Hisus, ne iring ki te menge bilibili ne nengetarin. Ugaid ne guntaani ne impeulì ki en diyà te Tumetuganur ne si Hisu Kristu ne iyan ebantey keytew.

1 Pedro 3:19

ne mibpendiyà ke gimukud din te bilengguan te gimukud dut te menge minatey ne mibpatey rengan su mibpesabut kandan te Lalag te Eleteala.

1 Pedro 4:19

Tembù be, menge suled, embiya edrumerasey ki su sabap dut te kiyug te Eleteala keyta, ne kenà ta igkebungas te kedtigker ta. Ugaid ne idsarig ta ke hinawa ta te Eleteala ne iyan midlimbag keyta, su kenà ki ed-engkeran nikandin ne ke impasad din ne edtumanen din kayi te keyta.

2 Pedro 2:5

Ne iring din ded dema ke menge etew rengan te hewii ni Noe ne medmeraat se mid-ulaula ran. Warà pedtedaya te Eleteala sikandan su mibperalem din ke wayig kayi te ampew te dunya ne neherà dan langun ke mid-ulaula te meraat. Ne iyan dà nesamà ne warà nelened ne si Noe wey ke telteleanak ne pitu ne etew. Su si Noe ne mibpesabut din te ulaula ne metidtu.

2 Pedro 3:15

Na kenà niyu lipati te iyan kenà pà kedlived ni Hisus ke Kerenan tew kayi su apey ruen hewii dut te menge etew ne warà pà mebperetiyaya ne ebpekedsendit ne ebpekeliyu rut te salà dan. Ne iring din ded dema ke impesabut keniyu te suled tew ne si Pablo diyà te surat ne impeewit din keniyu su insurat din ke impesabut kandin te Eleteala.