1 Pedro 2:11 - Ke meupiya ne tudtul mekeatag ki Hisu Kristu

¹¹ Menge suled ku ne igkelimù ku, ebpenehaad ki pà kayi te ampew te dunya. Su kenà ini se kelibutan se tidtu ne ubpaan tew su riyà te langit. Tembù be ebuyuen ku keniyu te kenà niyu dumai ke meraat ne egkiyuhan te lawa niyu, su ini se kebpeneheewit niyu te salà ne ebpekesanggel te keduma niyu te Eleteala.

1 Pedro 2:11 ပူးပေါင်းရင်းမြစ်များ

Lucas 21:34

Ne migkahi en maa si Hisus te, “Uram kew ve su apey kenà kew kayi rà egketaman te kebpengevurunan, ebpenginum te ebpeketevereg, wey ke kegkeuru niyu te ked-ubpàubpà niyu. Su embiya kenà kew ed-uram ne egkesaut kew te hewii ne kegkukum te Eleteala te menusiyà ne iring kew te rumat ne egketelebpì.

Nenged-ulaula 15:20

Iyan meupiya ne edsuratan ta sikandan ne egkehiyen tew te kenà dan megkaan te egkeenen ne indawey su inrenà ne siparat diyà te ledawan ne kenà tidtu ne Eleteala, ne kenà dan megkaan te binatang ne ebpekelen dà wey kenà dan megkaan te lengesa. Ne kenà dan dema mebpengingniyug.

Nenged-ulaula 15:29

kenà kew kaan te egkeenen ne inrenà ne siparat diyà te ledawan dà ne kenà tidtu ne Eleteala, kenà kew kaan te binatang ne ebpekelen dà, kenà kew kaan te lengesa wey kenà kew mebpengingniyug. Ne meupiya en embiya ini se edtumanen niyu se nekahi ku. Arà dà taman.”

Ruma 12:1

Engketà be menge suled ku, ne geina te rekelà se keupianan ne imbehey te Eleteala keytew, ne ebuyuen ku keniyu te irumakan niyu kandin ke lawa niyu te ed-ulaula te kiyug din dà su apey kew ebpekesuhat te hinawa rin. Ini se ed-ul-ulaan niyu su ini ke dait ne ralan te kebpengarap niyu kandin.

Ruma 7:23

Ugaid ne ini se meraat ne ebayàbayà te lawa ku ne edsuhù kedì te ed-ulaula te mereatey ne ebpekesurang dut te meupiya ne egkiyuhan ku kayi te hinawa ku ne eduma te insuhù te Eleteala. Tembù be iring te ebpepilayey ran taman te kayi a ebpekeruma te meraat, su iring a te uripen dut te mereatey ne ebayàbayà te lawa ku.

Ruma 8:13

Su embiya iyan tew edumaan ke meraat ne kiyug ne neketahù te itungan tew, ne edusaan ki te kemetayen ne warà edtemanan din. Ugaid ne embiya kayi ebpuun dut te tavang te Kedesenan ne Ebpetuntul te Menusiyà ne ed-engkeran tew en te eduma ke meraat ne kiyug ne neketahù te itungan tew, ne egkevehayan ki en te behu ne kegkeuyag tew.

2 Kurintu 5:20

Arà be ne midsuhù key ni Hisu Kristu se ebpemesabut mekeatag kandin. Ne ebuyuen dey keniyu te iring te si Hisus se ebuyù keniyu te ivehey niyu ke hinawa niyu diyà te Eleteala su apey kew ebpekidseveka kandin. Su ke Eleteala se ebuyù keniyu kayi te ibpemesabut dey ini,

2 Kurintu 6:1

Engketà arà ne mid-amung key dut te Eleteala te egelevek dut te helevek din kayi te ampew te dunya. Ne ebuyuen dey keniyu ne ibpekita niyu te mid-upianan niyu ke daat te nanam din keniyu su apey kew ebpekeliyu.

2 Kurintu 7:1

Na menge suled, geina te iring ketà ke impasad te Eleteala keytew, ne id-awà ta ke langun ne meraat ne ulaula ta wey langun ne meraat ne neketahù te itungan ta. Ne egenat kayi te ked-adat ta te Eleteala ne idtepeney ta ke hinawa ta te keduma rut te kiyug din.

Gelasiya 5:24

Su ke etew ne tidtu se kebpesakup din ki Hisu Kristu, ne mid-awaan din ke langun ne meraat ne mid-ulaula rin dengan, su apey kenà en eduma rut te kiyug te lawa rin.

Ipisu 2:19

Na sikiyu ve ne kenà Hudiyanen ne misan ke pehaney ne warà kew mekeamung te sakup te Eleteala, ne guntaani ne duma kew en dut te sakup din ne mibpemilì din. Kenà kew en birang ne liyu ne etew te Eleteala, su tuney kew en ne anak din.

Ipisu 4:1

Ne siaken ne ini te bilengguan su mekeatag te kebpesabut ku ki Hisus ne Kerenan tew, ne iyan ku ebuyuen keniyu ne edtumanen niyu ke langun ne dait ne ulaula dut te mibperetiyaya en su arà se kiyug te Eleteala dut te kebpemilì din keniyu.

2 Timoteo 2:22

Na Timoteo, kenà nu ve ebpengunuti se kenguwed te hinawa nu. Ugaid ne itahù nu te itungan nu ke ulaula ne metidtu, ne ke kebpeiseg te sarig nu, ke kedlimù nu te menge ruma nu wey ke melintad ne hinawa nu riyà te kandin. Langun imbe kayi se ed-ul-ulaan nu elin te menge etew ne ebpengeningeni te Kerenan tew egenat te hinawa ne midtilak.

Hibruhanen 11:13

Langun kayi ne menge etew te migkahi ku geina ne warà migkurang ke sarig dan te Eleteala taman te minatey ran, misan warà den pà medtelimà arà se impasad kandan te Eleteala te biviyag den pà. Su netuenan dan se ebpekeuma ke hewii te edtumanen te Eleteala ke impasad din kandan, ne taman be te biviyag den pà ne impesabut dan te sikandan ne nekererepuan den dà kayi te ampew te dunya.

Hibruhanen 6:9

Na menge suled ku ne igkelimù ku, ne misan pà te iring kayi se menge lalag ku keniyu ne netuenan ku te kenà iring ketà se ibped-ulaula keniyu. Su netuenan ku ne ebpeketuntul kew red dut te ralan te kebpekeperetiyaya te Eleteala, tembù be iyan ibehey keniyu ne meupiya.

Santiago 4:1

Na duen menge etew keniyan te keniyu ne ebpemekidrimbur wey ebpekidlewaney. Ne igkahi ku keniyu ke endei ebpuun ini, su ini ne ebpuun te kiyug te lawa niyu te ed-erehey rà kayi te ampew te dunya ne egkunterà te kiyug niyu te ebpekesuhat te hinawa te Eleteala.

1 Pedro 1:1

Siaken si Pedro ne edsurat kayi. Ne epustul a ni Hisu Kristu ne iyan din meana ne kedserihan a nikandin. Ne idsurat ku ini riyà te keniyu ne menge mibperetiyaya ki Hisus ne nepemilì te Eleteala ne nekesivurak diyà te menge inged ne Puntu, ne riyà te Gelasiya, Kepedusiya, Asiya wey Bitanya.

1 Pedro 1:17

Ne embiya egkehiyen ta ne Eleteala ke Amey tew ketà te kebpengeningeni tew ne iyan iya se meilut se ked-edati ta kandin taman te ini ki pà te ampew te dunya. Su metidtu se kegkukum din, ne edtuntul te langun ne ed-ul-ulaan tew ne warà ibpelabi rin.

1 Pedro 4:12

Menge suled ku ne igkelimù ku, kenà kew meinuinu rut te mepasang ne keresayan ne nekeuma en kayi te keniyu su sabap dut te kebperetiyaya niyu ki Hisus. Su Eleteala ke ebpenggeram keyta ke engkey kerekelà se kedsarig ta kandin.

1 Pedro 4:2

Tembù be taman te kayi ki pà te ampew te dunya ne iyan ta ed-ul-ulaan ne kiyug te Eleteala, ne kenà iyan ta edumaan ke kiyug te sikitew ne menge etew.

2 Pedro 3:1

Menge suled ku ne igkelimù ku, ini se ikeruwa ne surat ku diyà te keniyu. Iyan ku kedsurati keniyu su ebpetentenuran ku keniyu maa ke benar ne penurù ne nerineg niyu su apey egkepukew ke itungan niyu mekeatag ketà.