1 Pedro 1:3 - Ke meupiya ne tudtul mekeatag ki Hisu Kristu

³ Ne edeyuen tew ke Eleteala ke Amey rut te Kerenan tew ne si Hisu Kristu. Dekelà se kegkeyru rin keyta su egenat te kebanew rin ki Hisu Kristu ne mibehayan kiyu rin te behu ne umur ne nevaluy ki ne menge anak din. Tembù be ruen ebpenerengen tew ne egkevanew ki red te Eleteala ne ebehayan te umur ne warà edtemanan din diyà te ubpaan din.

1 Pedro 1:3 ပူးပေါင်းရင်းမြစ်များ

Juan 1:13

Ne iyan dalan te kinekevaluy ran ne menge anak te Eleteala ne kenà bineelan dà te menusiyà, etawa impenganak te menge etew rà ne amey, su iyan dan Amey ne Eleteala.

Ruma 12:12

Ne egalewhalew ki ve kayi rut te ebpenerengen tew keuremà, ne kenà ki ebpemivig ke embiya ruen kemeresayan tew, ne layun ki ebpengeningeni te Eleteala.

Ruma 15:13

Ne ke Eleteala se ebpuunan te langun ne keupianan ne ebpenerengen tew, ne kiyug ku ne menu ma ke mevehayi kew nikandin te rekelà ne kehelawan wey ke kebmelintad te hinawa niyu. Su embiya iring ketà se egked-ulaula, ne ke kedsarig niyu kandin mekeatag te ebpenerengen niyu ne ebmevag-et riyà sabap dut te gehem te Kedesenan ne Ebpetuntul te Menusiyà.

Ruma 4:25

Su si Hisus ke imbehey te Eleteala ne ebpebpatey mekeatag dut te menge salà tew, ne mibanew sikandin te Eleteala su apey iyan din kedtengteng keytew ne metidtu riyà te etuvangan din.

Ruma 5:10

Su rengan ne kunterà ki pà te Eleteala, ugaid ne sabap dut te kinepatey te Anak din si Hisu Kristu ne guntaan ne imped-ulit ki en diyà te etuvangan din. Ne embiya ve iring ketà te imped-ulit ki en, ne wey ki pè be maa kenà nikandin ipeliyu rut te kedusai keytew su neviviyag en ke Anak din si Hisu Kristu.

Ruma 8:11

Ke Eleteala ne mibanew ki Hisu Kristu. Ne iring ketà se egketemanan niyu su embiya diyà ed-ubpà te hinawa niyu ke Kedesenan ne Ebpetuntul te Menusiyà ne midsuhù din, ne ebenawen kew red dema nikandin su atag dut te Kedesenan ne Ebpetuntul te Menusiyà ne ed-ubpà te hinawa niyu.

Ruma 8:24

Ne impeliyu kiyu en te Eleteala rut te kerusaan tew te kepepatey, ugaid ne ruen pà egkepenareng tew. Ne embiya ruen pà egkepenareng tew ne iyan tew egkesebutan te warà pà med-ulaula ini se egkepenareng tew, su warà etew ne ebpenareng pà te ned-ulaula en.

1 Kurintu 13:13

Na, ruen ini se tetelu ne kenà egkeawà kayi te keyta: ini se kebperetiyaya ta te Eleteala, ini se kebpenareng ta te kegketuman dut te impasad te Eleteala kenita wey ini se limù ta te menge ruma ta. Ugaid ne iyan ebpekeuna kayi ne ke limù ta te menge ruma ta.

1 Kurintu 15:20

Ugaid ne iyan benar se nevanew en iya si Hisus. Sikandin ke neuna ne nevanew ne ibpepehimbenar arà te egkevanew iya ke langun te menge minatey keuremà.

2 Kurintu 1:3

Edeyuen tew ke Eleteala, ke Amey ni Hisu Kristu ne Kerenan tew. Su sikandin ne iiruwen ne Amey tew wey sikandin dema ke edtavang keytew kayi te langun ne kemerehenan tew.

Gelasiya 6:16

Kiyug ku perem ne ke langun ne menge etew ne eduma kayi te penurù ku ne insurat kayi ne egkeheram dan ke iru wey kerinew te hinawa ran ne riyà ebpuun te Eleteala. Su menge etew ran te Eleteala misan Hudiyanen dan etawa kenà.

Ipisu 1:17

Ne elin dema ne ebpengeningeniyen ku te Eleteala ne ke egkereyù ne Amey tew ke midsuhù ki Hisu Kristu, ne menu ke iyan mebehey keniyu ke Kedesenan ne Ebpetuntul te Menusiyà su apey sikandin se ebehey keniyu te ketau, ne sikandin se kebpekesabut niyu mekeatag te Eleteala su apey egketuenan niyu nevenar sikandin.

Ipisu 1:3

Edeyuen tew ve ke Eleteala ne Amey ni Hisu Kristu ke Kerenan tew. Su egenat dut te mibpekidseveka kiyu ki Hisu Kristu, ne rekelà se tavang te Eleteala keytew su mibehayan kiyu rin te langun ne keupianan ne riyà dà egenat te kandin ne riyà te langit.

Ipisu 1:7

Ne ketà te kebpebpatey ni Hisu Kristu diyà te pinebelavag ne kayu, ne ini se ebpekepeliyu keyta rut te kedusa te salà tew su ebpeseharan en te Eleteala ke salà tew. Su sabap dut te limù din ne warà tedtab din,

Ipisu 2:4

Ugaid ne misan iring ketà ne iyan pà dekelà ne kegkeyru te Eleteala keyta ne warà tedtab din wey ke limù din ne kenà edtaman.

Ipisu 3:20

Edeyù kiyu te Eleteala ne mekegehem ne ke edtavang keytew, su misan engkey se ebuyuen tew kandin ne ebpekegaga sikandin te ebpelebiyen din pà ke ebuyuen tew ne muna pà dut te egkesagkew te itungan tew.

Kulasi 1:23

Ugaid ne iyan iya se pegelepi niyu te ebpekeiseg ini se sarig niyu ki Hisus su apey kenà egkekisù ke kebperetiyaya niyu. Kenà niyu edsuweyi ini se Meupiya ne Tudtul ne neendihan en te hinawa niyu te aney en te nerineg niyu, su warà duma ne egkepenareng tew te ebpesabut keytew te si Hisu Kristu ke ebpeliyu kenitew ke kenà ini se Meupiya ne Tudtul. Ne ini iya se Meupiya ne Tudtul ne nekeeneb en mekepenudtul kayi te dunya ne senge etew a ne si Pablo ne ebpeneheewit kayi.

Kulasi 1:27

Ne sikiyu rema ne kenà menge Hudiyanen ne nekeamung ketà te mibpeyahan din. Ne warà pasar din ne keupianan ini se netahù te itungan din te ibpeubpà din si Hisu Kristu kayi te hinawa tew, ne ini se tuus te sikita ne id-amung din dut te kepurù te Eleteala diyà te langit.

1 Tiselunika 1:3

Su uman key ebpengeningeni mekeatag keniyu diyà te Amey tew ne egketenuran dey ke meupiya ne ed-ul-ulaan niyu su tuus te mibperetiyaya kew iya ki Hisu Kristu. Ne egketenuran dey rema ke dekelà ne limù niyu kandin ne egkekita te meilut se gelevek niyu kandin. Ne kenà dey egkelipatan ke kedtigker niyu te keresayan su dekelà ne ebpenerengen niyu ne edlived si Hisu Kristu ke Kerenan tew kayi te ampew te dunya.

1 Tiselunika 4:13

Menge suled, duen pà egkehiyen dey su apey niyu egketueni ke egked-ulaula dut te menge mibperetiyaya ne minatey en. Ibpenudtul dey ini su apey kew kenà egkeuru iring dut te menge etew ne warà ebpenerengen dan ne umur ne warà edtemanan din.

2 Tiselunika 2:16

Iyan dey egkiyuhan ne ke Kerenan tew ne si Hisu Kristu wey ke Eleteala ne Amey tew se ebag-et dut te hinawa niyu wey ebaher keniyu su apey langun ne ed-ul-ulaan niyu wey langun ne egkehiyen niyu ne ebmeupiya su dekelà se limù te Eleteala keytew. Ne egenat dut te limù din wey ke kebpenaub din ne ibehey rin ke kevag-et dut te itungan tew wey ke keupiya ne ebpenerengen tew ne egketuman.

1 Timoteo 1:14

Melimù nevenar si Hisu Kristu ke Kerenan tew su mid-uluhan a rin te raat te nanam, ne pinesarig a rin kandin, ne midtehuan a rin te kegkelimù ku kayi te menge ruma ku egenat dut te kinepekidseveka ku kandin.

Tito 2:13

Ini rà be se ed-ul-ulaan tew te kedtahad tew ketà te meupiya ne Hewii ne ebpenerengen tew ne egkekita ta ke ed-andlag ne raman din dut te kedlived te Eleteala ne mekegehem ne si Hisu Kristu ke ebpeliyu kenitew.

Hibruhanen 3:6

Ugaid ne si Hisu Kristu, ne sikandin ke Anak te Eleteala ne ebpengemuney dut te valey, ne mid-up-upianan din dema se kinetumana rin dut te langun ne mibpeveelan kandin te Amey rin. Ne sikitew ve ke duma ki Hisus, ne ebpekeiring kiyu te sakup te lusud te valey te Eleteala embiya mevaher se kineperetiyaya tew kandin wey kenà kiyu eduwaruwa atag te ebpenerengen tew ne impasad te Eleteala.

Santiago 1:18

Ne sabap dut te kandin ne kiyug ne ebeluyen ki rin ne anak din ketà te kebperetiyaya ta te benar ne impenurù din. Ini se mid-ulaula rin su apey ke sikita se belielehà dut te langun ne midlimbag din.

1 Pedro 1:13

Tembù be iyan iya se ibpenehana tew ke hinawa ta neraan te keduma te suhù te Eleteala. Ne ebpekerumbahat ki rut te langun ne ed-ul-ulaan tew su apey iyan dekelà te hinawa ta ne ini se meupiya ne ibehey te Eleteala keytew ketà te hewii ne edlived si Hisu Kristu kayi te ampew te dunya.

1 Pedro 1:21

Ne geina te ini se mid-ulaula ni Hisus ne nekeperetiyaya kiyu te Eleteala. Su sikandin ke mibanew ki Hisus wey mibpepurù dema kandin diyà te langit. Tembù be sikitew ne iyan tew ebperetiyayaan wey edserihan ne Eleteala ne ebanew keytew rema keuremà.

1 Pedro 1:23

Su ketà te mibperetiyaya ki te Lalag te Eleteala ne nevaluy ki ne anak din su iring te insaup ki in-anak, ne kenà etew se iyan mid-anak kenitew su Eleteala ne warà kemetayen din. Ne ini se behu ne umur ta ne ibpepevayà din ini dut te lalag din ne mibperetiyaya key ne ebpekevehey te umur ne warà edtemanan din wey kenà egkesembian.

1 Pedro 2:2

Su embiya iyan ta kiyug ne ed-iseg ini se peretiyaya ta, ne ed-iring ki te deisek ne batà ne layun edsusu su apey edekelà. Ne embiya iring ketà se egkiyuhan ta te ebpengadì ke Lalag te Eleteala ne ebmeilut se kebperetiyaya ta te Eleteala ne mibpeliyu keytew.

1 Pedro 3:15

Ugaid ne iyan ta ibpeuna te hinawa ta ke ked-adat tew ki Hisu Kristu su sikandin se Kerenan ta. Ne ed-andam ki neraan ke engkey se idtavak ta te menge etew ne ed-insà mekeatag dut te kebperetiyaya ta.

1 Pedro 3:21

Ne ini se kebpekeliyu ran ne egkeiringan ta ini te kebunyahi ta su tuus te kebpekeliyu ta te kedusa te Eleteala dut te salà ta. Su ini se kebunyahi keyta ne kenà ke kedlùlù te puting kayi te lawa ta, ugaid ne tuus ini te iyan ta ebuyuen te Eleteala ne id-awà din ke menge salà ta ne edtilaken din ke hinawa ta su apey kenà ki egkeyeyaan te ed-itindeg diyà te etuvangan din. Ne iyan din kebpeliyu keyta su minatey si Hisus su atag dut te salà ta ne mibanew rin.

1 Pedro 3:5

Su iring kayi iya se kebmerayirayi dut te metinumanen ne menge meritan rengan ne insarig ke hinawa ran te Eleteala wey mibpesakup dan te esawa ran.

1 Juan 2:29

Netuenan ta te metidtu si Hisu Kristu, dutun ne netuenan ta rema te piya engkey ne etew ne metidtu se ed-ul-ulaan din ne nevaluy en sikandin ne anak te Eleteala.

1 Juan 3:3

Tembù be piya engkey ne etew ne edsarig te edtumanen te Eleteala ini se penareng din, ne iyan iya se mebantey te hinawa rin su apey warà ebpekesawug ne meraat dut te ed-ul-ulaan din iring te warà misan deisek ne meraat ne nekesawug dut te mid-ulaula ni Hisu Kristu.

1 Juan 3:9

Piya engkey ne etew ne nevaluy ne anak te Eleteala ne kenà din idlaus ini se ked-ulaula rin te meraat, su ketà te nevaluy en ne anak te Eleteala ne midubpù sikandin te Amey rin ne Eleteala. Ne geina te iyan din Amey rin ke Eleteala, ne kenà egkepakey ne idlaus dan pà ke ked-ulaula ran te meraat.

1 Juan 4:7

Menge suled ku ne igkelimù ku, pelimlimuey kiyu iya su riyà ebpuun te Eleteala ini se limù. Ne ke menge etew ne ruen limù dan te menge ruma ran, ne ini ke menge etew ne nevaluy ran ne menge anak te Eleteala ne midtelimà dan sikandin.

1 Juan 5:1

Piya engkey ne etew ne mibperetiyaya te si Hisus ke Impasad te Eleteala ne Ebperetuen te langun, ne anak en sikandin te Eleteala. Ne piya engkey ne etew ne egkelimù dut te Amey tew ne Eleteala ne egkelimù dema ini se menge anak din.

1 Juan 5:18

Netuenan tew te warà etew ne nevaluy ne anak din ne edlaus te ed-ul-ulaan ne meraat, su ke Anak te Eleteala se edtuganur kandin su apey kenà meewit sikandin ni Setanas.

1 Juan 5:4

su sikitew langun ne nevaluy ne anak te Eleteala ne ebpeketalew ki rut te penggeram te datù te pekaid ne ebayàbayà kayi te ampew te dunya. Su iyan tew kebpeketalew kandin ne ini se kedsarig tew ki Hisu Kristu.