1 Kurintu 9:19 - Ke meupiya ne tudtul mekeatag ki Hisu Kristu

¹⁹ Na geina te warà etew ne edsukey kediey, warà dema etew ne dait ne edsuhù kediey. Ugaid ne egkiyug ad ne egkevaluy ne edsugsuhuen dut te langun ne etew su apey ku egkepeneheewit ke merakel ne etew te kebperetiyaya ki Hisu Kristu.

1 Kurintu 9:19 ပူးပေါင်းရင်းမြစ်များ

Mateo 18:15

“Embiya ruen duma nu ne nekedsalà kenikew,” ke si Hisus, “ne pendiyà ka te kandin ne kehiya nu ke salà din te deruwa kew rà. Embiya ebpevenar sikandin ne netevangan nu sikandin su ebpeked-uliey kew te meupiya ne itungan.

Ruma 1:14

Su iyan ku ebpeiringan ne ruen utang ku rut te langun ne menge etew, ne iyan ku bayad kayi te utang ku ne arà se kebpesabut ku rut te Meupiya ne Tudtul diyà te langun ne edsusunan te menge etew ne sumabut etawa kenà, misan ke ruen netuenan din etawa warà.

Ruma 11:14

Su kiyug ku perem ne meima ke menge ruma ku ne Hudiyanen te kayi te kedtevangi ku keniyu te menge kenà Hudiyanen, ne ini se petihayun ku te ruen diyà te kandan ne ebpekeperetiyaya ne ebpekepeliyu te kedusa te Eleteala kandan.

Ruma 15:2

Ugaid ne iyan tew ibpeuna te hinawa tew ne endei se ebpekevehey rut te ruma tew te keupianan su apey ebpekeiseg ke sarig dan.

1 Kurintu 10:33

Iringi niyu ke ed-ul-ulaan ku su layun ku ebpemengaa ke ralan te kegketevangi ku te langun ne menge etew. Su kenà ku iyan ebpegitungen se kedì dà ne keupianan, ugaid ne ke keupianan dut te langun ne menge etew. Su iyan ku ked-ulaula kayi su apey ku egkepeneheewit sikandan te kebperetiyaya ki Hisus ne ebpekeliyu ran dut te keberedusaan dan.

1 Kurintu 7:16

Su iyan ta keduma rut te kiyug te esawa ta ne warà mebperetiyaya ne ebpekibelag, su misan kenà ki edtuhut ne kenà ta egketuenan ke egkepeneheewita sikandin dut te kebperetiyaya ta ki Hisu Kristu etawa kenà.

1 Kurintu 9:1

Su siaken ne egkepakey ne ebpemilì a ke engkey se egeleveken ku su kedserihan a ni Hisu Kristu ne nekita ku ke Kerenan tew si Hisu Kristu, ne ke kebperetiyaya niyu kandin ne arà imbe ke helevek ku su sabap dut te kebpenurù ku mekeatag kandin.

2 Kurintu 12:14

Ne andam ad te kebpengkeniyan ku, ne iketelu en ini se kebpengkeniyan ku te keniyu. Ne iring ded dut te neuna ne kenà a ebuyù keniyu te tavang su apey kew kenà egkepesangi, su kenà ke tavang niyu se egkiyuhan ku ugaid ne ke limù niyu kediey. Su iring kew en te tuney ne menge anak ku ne kenà iyan ed-uyag dut te lukes ke menge anak din, ugaid ne ke lukes se ed-uyag dut te menge anak din.

2 Kurintu 4:15

Tembù be edtigkeran dey en ke langun ne kemerehenan su wey rey metevangi sikiyu. Su embiya merakel en se ebpekeuman dut te ebperetiyaya ki Hisus, ne ed-iseg pà ke kerakel te ebehey te peselamat diyà te Eleteala su apey sikandin se egkereyù.

2 Kurintu 4:5

Kenà dey iyan ibpesabut ne mekeatag kenami, ugaid ne mekeatag ki Hisu Kristu su sikandin ke mibpemilì te Eleteala ne egkamal te langun. Ne sikami ne iring te sugsuhuen te kedtavang dey keniyu kayi te kedtuman dey te idsuhù din kenami.

Gelasiya 5:1

Kenà kiyu en uripen dut te penduan ne intahak ni Moises, su nekeliyu kiyu en. Kenà niyu lipati ini ne itindehi niyu su apey kew kenà mekelived te kegkeuripen dut te penduan.

Gelasiya 5:13

Menge suled ku, mibpemilì kew te Eleteala su apey kew ebpekeliyu rut te keduma niyu te penduan ni Moises. Ne misan nekeliyu kew en ketà, ne kenà niyu iyan idtahù te hinawa te egkepakey ne eduma kew rut te misan engkey ne egkiyuhan niyu. Iyan pà mentag se iyan niyu ipeiseg ke kebpetebtevangey niyu su sabap dut te kebpelimlimuey niyu.

1 Timoteo 4:16

Urami nu ke ed-ul-ulaan nu wey ke kebpenurù nu. Su embiya edumaan nu ini se migkahi ku, ne kenà sikuna rà se ebpekeliyu rut te kedusa te salà nu su misan imbe rema ke ebpemineg keykew ne ebpekeamung.

2 Timoteo 2:10

Ketà be ne edtigkeran ku en ma lavew piya engkey ne egketemanan ku apey ke menge etew ne mibpemilì te Eleteala ne ebpekerineg te lalag din ne egketau te si Hisus ne ebpeliyu kandan, su kiyug ku ne ebpekeliyu ran dema egenat te kebperetiyaya ran ki Hisu Kristu ne ebpeketelimà dan te umur ne warà edtemanan din wey warà pasar din se keupiya rin neraan en ne impenehana te Eleteala kandan.

1 Pedro 3:1

Ne sikiyu rema ne menge meritan, iyan iya se ebpesakup kew rut te esawa niyu. Su embiya ruen warà pà mibperetiyaya te Lalag te Eleteala ne kalu ke ebpekeperetiyaya ran dema ke egkekita ran ini se ed-ul-ulaan niyu ne meupiya. Misan warà en egkehiyen niyu ne ebpeneheewit kandan,