1 Kurintu 5:5 - Ke meupiya ne tudtul mekeatag ki Hisu Kristu

⁵ Ne egenat te gehem ni Hisu Kristu ne keniyan en te keniyu, ne ibpeawà niyu en ayan ne etew su apey edresayen ni Setanas ke datù te pekaid su apey ebpekedsendit dut te salà din ne ebpekeliyu ke mekatù din ketà te hewii ne kedlived ni Hisu Kristu te egkukum.

1 Kurintu 5:5 ပူးပေါင်းရင်းမြစ်များ

Mateo 4:10

Ne migkahi si Hisus te, “Awà ka kayi, Setanas! Duen impesurat ne Lalag te Eleteala ne egkahi te, ‘Iyan niyu rà erapa ne Kerenan ne Eleteala niyu, ne sikandin dà se edsenguren niyu.’ ”

Lucas 22:31

Migkahi si Hisus kayi te ki Simon Pedro te, “E, Simon, duen idtarem ku keykew. Midtuhutan te Eleteala si Setanas ke datù te pekaid su ebpenggeraman kew ke embiya ebpekedsalà kew. Ini se kebpenggeram din ne iring te ed-ukapan din ke sarig nu.

Nenged-ulaula 26:18

Su sikandan ne arà se ed-ul-ulaan dan ne kenà meupiya ne iring te riyà dan te kerusireman. Ugaid ne pendiyà ka su ibpesabut nu kandan mekeatag kedì su apey ran mekehimerat ne ebpekeengked dan dut te meraat ne ed-ul-ulaan dan ne ebpekearat dan diyà te kerayahan, uya su ebpekeawà dan dut te kegkeuripen kandan te datù te pekaid ne ebpesakup dan en te Eleteala. Su apey egkepesehad ke menge salà dan sabap dut te kebperetiyaya ran kedì,’ ke si Hisus, ‘ne ebpekeamung dan dut te menge etew ne mibpemilì te Eleteala.’

1 Kurintu 1:8

Ne sikandin ke mibaher te kebperetiyaya niyu su apey warà idsawey rin keniyu ketà te hewii ne kedlived ni Hisu Kristu.

1 Kurintu 11:32

Ugaid ne embiya sikitew ne mibperetiyaya ki Hisus se edusaan te Eleteala, ne iyan din ed-ul-ulaan ini su apey ki kenà ebpekelaus te ed-ul-ulaan ta ne meraat ne kenà ki ebpekeamung dut te menge etew ne kenà ebperetiyaya ne edusaan din te apuy ne rakà.

2 Kurintu 10:6

Ne embiya ibpekita niyu te benar ke keduma niyu te penduan ni Hisu Kristu, ne ketà ne ebpedselaan ku ke menge mibperetiyaya ne kenà eduma ki Hisu Kristu embiya te ebpekeuma ad keniyan.

2 Kurintu 12:7

Su kenà egkiyug ke Eleteala ne ibpereyùdeyù ku ke utew meupiya ne impekita rin kedì diyà te langit. Ne inluhut din te sugsuhuen ni Setanas te edresayen a te sakit su apey kenà ad ebpekepereyùdeyù.

2 Kurintu 13:10

Tembù be edsuratan ku sikiyu te warà e pà mebpengkeniyan su apey ketà te kebpekeuma ku ne warà en kebpegingawà te ibpekita ku keniyu ke kewayà ku te ebpedsalà keniyu. Su kenà iyan kinevehey te Eleteala kedì te kewayà ku te kedereeti rut te sarig niyu, ugaid ne ibag-et ku rut te sarig niyu.

Pilipus 1:6

Ne netuenan ku se ayan se behu ne itungan niyu ne imbehey te Eleteala te kinerudsù niyu te mibperetiyaya su apey kew ed-ulaula te meupiya, ne ed-um-umanan din en su apey warà kurang niyu ketà te hewii ne edlived si Hisu Kristu kayi.

1 Timoteo 1:20

Iyan iring kayi ne en si Himinyu wey si Alejandro. Midlekaan ku sikandan su apey egkeveyveyai en ni Setanas ke datù te pekaid apey ran metueni te kenà iya egkepakey ne edsumpeliten se Eleteala.

2 Pedro 3:12

gewii te edtehad ki pà dut te arà se Hewii Rin. Ne id-amin ta ke baher ta te egelevek dut te ini ne impehelevek din keyta su apey mehaan ne ebpekeuma arà se Hewii Rin. Na benar iya ini se migkahi ku ne egkeamin-amin egketutung ke langit ne langun ne egkekita ketà ne egketunag te apuy.

1 Juan 5:16

Ne embiya egkekita nu te nekesalà ini se ruma nu te ebperetiyaya ugaid ne ke rimahas te salà din ne kenà iyan ebpekeated kandin diyà te kemetayen ne warà edtemanan din, ne ipengeningeni nu te Eleteala sikandin te ebpesehad te Eleteala kandin ini se salà din. Ne ebpekevehey kandin te Eleteala te umur ne warà edtemanan din embiya ini se salà din ne kenà iyan ebpekeated kandin diyà te kemetayen ne warà edtemanan din. Ne embiya ruen etew ne nekesalà te iyan ebpekeated kandin diyà te kemetayen ne warà edtemanen din, ne kenà ku egkehiyen te ini ne etew ne ipengeningeni nu te Eleteala.