1 Kurintu 4:10 - Ke meupiya ne tudtul mekeatag ki Hisu Kristu

¹⁰ Ne kayi te keduma rey ki Hisus, ne egkahi ke menge etew te kenà key metau ne ebpegitung. Ugaid ne sikiyu, ne egkahi kew te metampas kew rut te netuenan niyu te Eleteala. Ne sikami kun ne warà gaga rin, ugaid ne iyan niyu pegitungan ne ruen gaga niyu. Ne sikami ne edsusudian, ugaid ne sikiyu ne ed-edatan.

1 Kurintu 4:10 ပူးပေါင်းရင်းမြစ်များ

Mateo 24:9

“Egkeepesan kew te langun ne menusiyà su atag te keduma niyu kediey. Ebpenigkemen kew ne ibpalad kew riyà te ruen ketengdanen din ne edresayen kew nikandan wey ruen pà ebpengimetayan.

Mateo 5:11

Dayirayi kew ke ebpenempelaen kew, wey ebpekesekitan kew, wey edtevuan kew te langun ne edsusunan te mereatey ne ulaula su sabap te keduma niyu kediey.

Lucas 10:16

Ne migkehiyan ni Hisus ke pitu nepulù ne ebpeipenawen din te, “Ke menge etew ne ebpemineg te ibpenurù niyu ne iring te iyan a ran ebpeminehen. Ne engkey se kenà edtelimà keniyu ne iring te iyan a rin warà telimaa. Ne engkey se kenà edtelimà kediey ne iyan din warà telimaa ke Eleteala ne midsuhù kediey.”

Lucas 18:9

Ne ruen impenempità ni Hisus ne ebpekesuhat dut te menge etew ne iyan dan kunaan ke menge metidtu ran ne edsudì dan ke langun ne menge ruma ne etew.

Lucas 6:22

Dayirayi kew ke egkeepesan kew te menge etew ne kenà kew nikandan edsehipaan, ne ebpenempelaen kew, wey egkahi ran te mereatey kew su kayi egenat dut te keduma niyu ke Impeanak te Menusiyà.”

Nenged-ulaula 17:18

Ne ketà ne ruen menge meyterù ne ed-ingaranan te Epikuranu wey ruma ne ed-ingaranan te Estuwiku ne mibpekidlalag kandin. Duen duma ne mid-insà te, “Engkey vuwa se egkehiyen kayi te ini se ed-iring uvag te ruen nesebutan din?” Ne duen duma ne migkahi te, “Iyan din beneng edlelahen ne mekeatag te menge diwata diyà te meriyù ne inged.” Tembù migkahi ran ini su impesabut ni Pablo ke Meupiya ne Tudtul mekeatag ki Hisus wey ke kegkevanew rin.

Nenged-ulaula 17:32

Guna su nerineg dan ini se nekahi ni Pablo mekeatag te kegkevanew dut te minatey, ne ruen duma ne midsumpalit. Ugaid ne ruen dema migkahi te, “Igkesuat dey pà maa te ebpemineg te kedseyseya nu mekeatag kayi.”

Nenged-ulaula 26:24

Guna su nekahi en ni Pablo ini, ne midserambag si Pistu se egkahi te, “Egkevuneg ka, Pablo! Su langun dut te mibpengedian nu se igkebung nu!”

Nenged-ulaula 9:16

Ne ibpekita ku kandin langun ne kegkerasey rin su atag dut te keduma rin kediey.”

1 Kurintu 1:21

Su ayan ne menge ketau te itungan ne kenà ayan ke ralan ne kegkesebuti tew te Eleteala. Ugaid ne ke puunan te ralan te kegkeriweswasi tew te Eleteala ne riyà ded ebpuun te kandin ne eturan. Ini se eturan din ne ebpekepeliyu keytew atag dut te kebperetiyaya tew rut te Meupiya ne Tudtul ne impemesabut dey, misan ini se impemesabut dey ne warà kun rantek din.

1 Kurintu 1:23

Ugaid ne sikami ne iyan dey ibpemesabut ke Meupiya ne Tudtul mekeatag te kinepatey ni Hisu Kristu riyà te pinebelavag ne kayu, misan iring te ebevayuen te andu ke hinawa rut te menge Hudiyanen ketà te egkerineg dan ini, ne riyà te itungan te menge Gerisiyanen ne warà rantek din.

1 Kurintu 1:25

Su misan pà duen etew ne egkahi te ke mid-ulaula te Eleteala te kebpeliyu rin keytew te kedusa te salà tew ne iring te warà rantek din, ugaid ne warà itungan te etew kayi te ampew te dunya ne ebpekerepeng te itungan te Eleteala. Ne misan egkahi ran te meluvey ke Eleteala su minatey red ke Anak din, ugaid ne ketà din iya impayag te iyan pà mevaher ke gehem din dut te langun ne gehem te menge etew.

1 Kurintu 10:12

Ne engketà be ne embiya ruen etew ne iyan din egkepegitung te kenà din ed-ul-ulaan ke meraat su mevaher en se sarig din, ne iluta rin pà lavew su kalu ke ebpekevaal ded sikandin te salà.

1 Kurintu 2:14

Ugaid ne ke menge etew ne kenà ebperetiyaya ne warà pà metehui te Kedesenan ne Ebpetuntul te Menusiyà, ne kenà dan ebpeketelimà dut te ibehey te Kedesenan ne Ebpetuntul te Menusiyà. Ne kenà dan ma egkesebutan su iyan dan pegitungan ne warà pantag din. Uya, kenà dan ebpekesabut ketà su warà pà meketahù diyà te hinawa ran ke Kedesenan ne Ebpetuntul te Menusiyà ne edtavang kandan su apey ran egkesebuti.

1 Kurintu 2:3

Su ketà te nekeubpà a riyà te keniyu ne mibmeluvey se lawa ku ne iring te migkerker a su igkeandek ku kema ke kenà ku egkegaga te edtuman ke insarig kedì te Eleteala.

1 Kurintu 3:18

Kenà kew ed-akal te hinawa niyu. Embiya ruen diyà te keniyu ne ebpegitung te egkegaga rin te meralem ne kebpegitung dut te menge etew kayi te ampew te dunya, ne iyan iya se ed-engkeran din arà se itungan din su apey rin egketelimà ke benar ne ketau ne riyà ebpuun te Eleteala.

1 Kurintu 3:2

Embiya idsempità ku ke penurù ku keniyu ne iring te rudsun ne impeinum ku keniyu su kenà kew pà egkepakey ne ebpekekaan te mekahal ne egkeenen. Ne kegkehiyen dè be iya ne ke penurù ku keniyu ne kenà meralem su warà niyu pà mesebuti. Ne taman gunteani ne kenà kew pà ebpekesabut te meralem ne kebpemandù.

1 Kurintu 4:8

Menu, iyan niyu egkepegitung se kenà kew en ebuyù te ketau te Eleteala su keniyu en ke langun? Iyan niyu kunaan ke mibehayan kew te langun ne ketau ne ibehey te Eleteala, ne iring kew te menge datù. Ugaid ne sikami ne kedserihan din ne warà pà. Meupiya iya maa perem ke embiya edatù kew en su wey sikami ne edatù en dema elin keniyu.

2 Kurintu 10:10

Su ruen keniyan te keniyu egkahi te, “Embiya edsurat kenami si Pablo ne mepasang wey meilut se lalag din, ugaid ne embiya kayi sikandin te kenami ne ke lalag din ne meluvey ne kenà ibpememantag sikandin.”

2 Kurintu 11:19

Metampas kew ve iya maa nevenar su metau kew ne edtigker te menge lalag dut te ebpengevengùbengù diyà te keniyu!

2 Kurintu 11:29

Su embiya ruen mibperetiyaya ne ebmeluvey se sarig din, ne iring te egeramen ku rema ketà te kegkeuru ku. Ne embiya ruen egkeewit te kebpekedsalà, ne iring te ebpiruwen ke pusung ku kandin.

2 Kurintu 13:9

Ketà be ne igkehalew ku embiya warà kebpegingawà te kebpekita ku rut te kewayà ku te ebpedsalà su warà nekesurang dut te sikiyu. Su beleharen ke embiya ruen egkahi te warà kewayà ku asal ebmevaher kew te ed-ulaula te meupiya. Ibpengeningeni ku te Eleteala te ibpeiseg din ke meupiya ne ulaula niyu.

2 Kurintu 4:12

Uya, benar ne edtiviltivil se umur dey te kebpemesabut dey te Meupiya ne Tudtul su apey ruen keupianan niyu, ne ebpekekuwa kew te umur ne warà edtemanan din.

2 Kurintu 6:8

Edlaus key te egelevek te Eleteala misan ed-edatan key etawa ebpegkeyaan key, misan edeyuen key etawa edsudian key. Ne misan ruen egkahi te teruen key, ne iyan benar ini se ibpemesabut dey.

1 Tiselunika 4:8

Tembù be ke etew ne kenà eduma te ini ne ibpenurù ku ne kenà penurù te etew se id-engkenà din su iyan din id-engkenà ke penurù te Eleteala ne mibehey keniyu te Kedesenan ne Ebpetuntul te Menusiyà.

1 Pedro 4:14

Ne embiya edsudian ki su sabap dut te keduma ta ki Hisu Kristu ne tuus arà te kayi en te keyta ke Kedesenan ne Ebpetuntul te Menusiyà ne iyan ke raman te Eleteala, tembù be egkehalew ki.