1 Juan 4:6 - Ke meupiya ne tudtul mekeatag ki Hisu Kristu

⁶ Ugaid ne sikitew, nevaluy kiyu en ne menge anak te Eleteala, tembù be ke menge etew ne kiyug ne eduma te Eleteala ne idtaan dan ke telinga ran su ebpemineg dan te penurù ta. Ugaid ke menge etew ne kenà egkiyug ne eduma te Eleteala, ne kenà dan ebpemineg te penurù ta. Ketà be ne egketuusan tew ke menge etew ne eduma rut te penurù ne benar wey ke menge etew ne eduma rut te tarù.

1 Juan 4:6 ပူးပေါင်းရင်းမြစ်များ

Lucas 10:22

Ne migkahi maa si Hisus dut te menge etew te, “Ke Amey ku se mibpesarig kediey te langun taman. Warà netau kedì te Anak a te Eleteala liyu rà te Amey ku ne Eleteala. Ne warà netau te Amey ku ne Eleteala liyu rà te siaken ne Anak din wey ke menge etew ne egkiyuhan ku te ebpayag mekeatag dut te Amey ku.”

Juan 10:16

Ruen pà ruma ne menge bilibili ku,” ke si Hisus “ne warà pà kayi te lusud te tudilan. Ed-ewiten ku ve sikandan kayi te tudilan ini ne ebpemineg dan kedì, ne egkevaluy ran ne senge luyuran dà ne seveka rà dema se tumetuganur kandan su siaken dà.

Juan 10:27

Su ke menge etew ku ne timbang te bilibili ku,” ke si Hisus “ne ebpemineg dan kedì su egkekilala ren ma ke suwara ku. Egkekilala ku sikandan ne eduma ran kedì.

Juan 10:3

Embiya edlusud sikandin ne ebpuwasan dut te ebantey ke humawan. Ne ebpekekilala ke bilibili te suwara rin ke ed-umawen din dut te ngaran dan su ibpelihawang dan.

Juan 13:20

Sebenarvenar ini se egkehiyen ku,” ke si Hisus, “misan entei ne etew se edtelimà dut te edsuhuen ku, ne siaken se midtelimà din dema. Ne ke etew ne edtelimà kediey ne midtelimà din dema ke Amey ku ne midsuhù kediey.”

Juan 14:17

Sikandin ini ke Kedesenan ne Ebpetuntul te Menusiyà ke ebpesabut keniyu te benar mekeatag te Eleteala,” ke si Hisus. “Kenà ini egketelimà te menge etew kayi te ampew te dunya ne warà medtelimà kedì su kenà dan egkekilala sikandin ne kenà dan ebpekesabut ke entei sikandin. Ugaid ne nesebutan niyu en ke entei sikandin su ebpekiduma sikandin keniyu wey diyà mid-ubpà sikandin te keniyu.

Juan 15:26

Ne migkahi pà maa si Hisus te, “Ibpepengkayi ku te keniyu arà se ed-ingeranan te Edtavang ne riyà ebpuun te Amey ku su sikandin ke Kedesenan ne Ebpetuntul te Menusiyà ne ebpesabut keniyu te benar mekeatag te Eleteala. Ne embiya ebpekeuma en sikandin kayi ne ebpesabut sikandin mekeatag kediey.

Juan 16:13

Ugaid ne ketà te kebpekeuma dut te Kedesenan ne Ebpetuntul te Menusiyà kayi te keniyu, ne sikandin en ke ebpetuntul keniyu te langun ne benar. Ne ini se ibpesabut din ne kenà kayi rà te kandin ne itungan, ugaid ne iyan din ibpesabut ne endei rà ke nerineg din diyà te Amey ku ne Eleteala. Ne ibpesabut din ded lavew keniyu ke egked-ulaula ne ebpelingguma,” ke si Hisus.

Juan 18:37

Ketà ne migkahi si Pilatu te, “Engkey, ratù ke ves?” Midtavak si Hisus te, “Benar ayan se nekahi nu ne ratù a! Su iyan ku kinepengkayi te ampew te dunya ne impeanak te menusiyà su ebpesabut a rut te benar. Ne misan entei en ne etew se edtampil dut te benar, ne ebpemineg kediey.”

Juan 20:21

Ne migkahi en maa si Hisus te, “Na, mebmelilintad ke hinawa niyu! Ne iring dut te midsuhù a te Amey ku ne Eleteala,” ke si Hisus, “ne edsuhuen ku rema sikiyu.”

Juan 8:19

Nerineg dà dut te menge Peresiyu ne migkahi ran en te, “Endei ma ke Amey nu?” “Warà a niyu metueni ke entei a etawa ke Amey ku,” ke si Hisus. “Su embiya netuenan a nikiyu ne egketuenan niyu rema ke Amey ku.”

Juan 8:23

Ne midtavak si Hisus te, “Sikiyu ne ini kew rà te ampew te dunya, ugaid ne siaken ne riyan a ebpuun te divavew. Uya, sikiyu ne kayi kew ebpuun te kelibutan, ugaid ne siaken ne diyan a ebpuun te langit.

Ruma 1:1

Siaken ini se edsurat keniyu ne si Pablo, ne sugsuhuen ni Hisu Kristu. Ne nepemilì a te Eleteala ne kedserihan din ne insuhù din kediey te ibpesabut ku ke Meupiya ne Tudtul ne riyà ebpuun te kandin.

Ruma 11:8

Su iyan din iring ke impesurat ne Lalag te Eleteala ne egkahi te, “Iring te midseluuvan te Eleteala te kuren ke itungan dan; su taman guntaani ne misan duen mata ran ne kenà dan ebpekekita, uya, misan duen telinga ran ne kenà dan ebpekerineg.”

1 Kurintu 14:37

Embiya ruen etew ne iyan din nepegitung ne ruen impesabut kandin te Eleteala, etawa egkahi te ruen ketau rin ne imbehey kandin dut te Kedesenan ne Ebpetuntul te Menusiyà, ne iyan iya se mesebuti rin ini se insurat ku keniyu ne suhù ini ne riyà ebpuun te Eleteala.

2 Kurintu 10:7

Sikiyu ne warà mekesuhat se itungan niyu su iyan niyu edtengtengan ne ke kebpeparas te etew, ugaid ne iyan niyu kenà egkekita ke riyà te lusud te hinawa rin. Su ruen keniyan te keniyu ne iyan dan itungan ne sikandan dà ke benar ne sugsuhuen ni Hisu Kristu, ugaid ne iyan meupiya ne egkesebutan dan te sikami ne benar dema ne sugsuhuen din.

2 Tiselunika 1:8

Ketà te kebpekeuma rin ne iring te egkeregreg ne apuy ini se lawa rin. Ne edusaan din ke menge etew ne mid-engkenà te Eleteala, ini se kenà ebperumaruma rut te Meupiya ne Tudtul mekeatag ki Hisu Kristu ke Kerenan tew.

1 Timoteo 4:1

Na Timoteo, mepayag nevenar ke migkahi dut te Kedesenan ne Ebpetuntul te Menusiyà te ruen menge etew ketà te ketepusan ne hewii ne edsuwey rut te kebperetiyaya ran ki Hisu Kristu. Su iyan dan en maa edumaan ke busew ne metau ne edlimbung, ne ebperetiyaya ran te tarù ne ibpepenurù te menge vusew.

2 Pedro 3:2

Egkiyuhan ku ne kenà niyu melipati ke impesabut dut te menge ebpelambas te Lalag te Eleteala rengan, abpeg ke insuhù dema ni Hisu Kristu ke Kerenan tew ne ebpeliyu keytew, su ini se suhù din ne impepevayà dut te menge kedserihan din.

1 Juan 4:1

Menge suled ku ne igkelimù ku, kenà kew peretiyaya dut te langun ne egkahi ne impekahi ran kun te Kedesenan ne Ebpetuntul te Menusiyà. Ugaid ne perisaan niyu pà ke ebpenurù dan apey niyu metueni ke riyà be ebpuun ini te Eleteala etawa kenà. Su merakel se midlepew kayi te ampew te dunya ne uvag kun te ebpelambas sikandan te Lalag te Eleteala.

1 Juan 4:4

Ugaid ne sikiyu, menge anak ku, sikiyu ne nevaluy ne menge anak te Eleteala, tembù be netalew niyu ini se uvag kun ne ebpelambas te Lalag te Eleteala su warà kew melimbungi rut te lalag dan ne kenà ebpuun te Eleteala. Su ke Eleteala ne ed-ubpà diyà te hinawa niyu ne muna pà se gehem din dut te ki Setanas ne ed-ubpà ketà te hinawa te ini se menge etew rà kayi te ampew te dunya ne egkunterà ki Hisus.

1 Juan 4:8

Ugaid ne ini se warà limù dan te menge ruma ran, ne tuus te warà dan medtelimà te Eleteala. Su kayi te langun ne ed-ul-ulaan te Eleteala ne egkekita ke limù din.

1 Juan 5:19

Netuenan tew ne menge anak ki en te Eleteala. Ugaid ne ini se menge etew dè duen kayi te ampew te dunya, ne ebeyveyaan sikandan ni Setanas.

Hudas 1:17

Ugaid ne sikiyu keniyan ne menge suled ku, tentenuri niyu ke ingkahi rut te menge kedserihan dengan ni Hisu Kristu ke Kerenan tew.