1 Juan 3:21 - Ke meupiya ne tudtul mekeatag ki Hisu Kristu

²¹ Na menge suled ku ne igkelimù ku, embiya ini se hinawa ta ne kenà edsendit keyta, ne ruen kegkesirihi keyta embiya ebpengeningeni ki riyà te Eleteala

1 Juan 3:21 ပူးပေါင်းရင်းမြစ်များ

Ruma 14:22

Ne kayi te migkahi ku keniyu ini, ne iyan niyu rà dumai ke endei se egkeperetiyaya niyu ne ebpekesuhat te hinawa te Eleteala, ugaid ne kenà niyu en ibpekidlewanà mekeatag ketà su iyan dà dait ne netau kayi ne ke Eleteala. Ne mehalew nevenar ke etew ne kenà eduwaruwa se hinawa rin dut te ed-ul-ulaan din.

1 Kurintu 4:4

Su misan warà salà ne netuenan ku ne idsawey kedì te Eleteala, ne kenà ku egketuenan embiya benar arà. Su ke Kerenan tew rà ke egkukum kedì.

2 Kurintu 1:12

Nehalew key te netuenan dey ne warà meraat ne mid-ulaula rey diyà te menge etew, labi en kayi te keniyu. Ini se ed-ul-ulaan dey ne metidtu su iyan dey edtumanen ke kiyug te Eleteala. Ne kenà kememenusiyai rà ne ketau se edumaan dey, su iyan dey edserihan ne ke tavang te Eleteala kenami su apey iyan dey ed-ul-ulaan ne ke ebpekesuhat.

Ipisu 3:12

Ne tehaad te mibpekidseveka kiyu en ki Hisu Kristu sabap dut te kedsarig tew kandin, ne kenà ki egkealang-alang ne ebpengarap kandin su netuenan tew ne egkerineg din ke kebpengeningeni tew.

1 Timoteo 2:8

Ne duen pà ebuyuen ku keniyu. Iyan ku kiyug ne piya endei en egkevurun ke menge etew ne mibperetiyaya ki Hisus, ne ke menge meama se ebpeneheewit keniyu te ebpengeningeni. Ugaid ne id-awà den pà neraan ke epes dan te ruma ran wey ke kebpelewlewaney ran apey iyan dan ibpeuna te hinawa ran ne ke Eleteala.

Hibruhanen 10:22

Tembù be ed-uvey kiyu en te Eleteala se egenat te keputian te atey tew ne kenà eduwaruwa se kebperetiyaya tew kandin. Ed-uvey kiyu kandin su ke lengesa ni Hisus ke midtilak te hinawa tew rut te meraat ne ulaula ne igkevenari te hinawa tew, ne iring te midlùluan din ke lawa tew rut te metingew ne wayig.

Hibruhanen 4:16

Geina ve te sikandin se Mepurù ne Terebpelengesa tew, ne kenà kiyu eduwaruwa te hinawa tew te kebpengeningeni te ked-uvey tew riyà te etuvangan te Eleteala su egkiyuhan din te ebpekita ke limù din kenitew. Su iiruwen sikandin kenitew ne ebpeketavang sikandin dut te kemerehenan tew.

1 Juan 2:28

Uya menge anak ku, embiya layun meilut se kebpekidseveka niyu ki Hisu Kristu ne kenà ki egkeandek ne kenà ki egkeyeyyaan ne ed-itindeg diyà te etuvangan din ketà te kedlived din kayi.

1 Juan 2:7

Na menge suled ku ne igkelimù ku, ini se suhù ne idsurat ku en keniyu kayi ne kenà behu pà su rengan ini se impenurù keniyu. Su egenat te behu kew pà ne mibperetiyaya ki Hisus ne nerineg niyu ini se suhù mekeatag te kebpelimlimuey tew.

1 Juan 3:2

Menge suled ku ne igkelimù ku, menge anak kiyu en te Eleteala. Ne misan warà dey pà metueni se egkevaluy ki keuremà, ugaid ne netuenan ta te ketà te kedlived ni Hisus kayi ne egkesembian ki iring kandin su ketà ne egkekita tew en sikandin.

1 Juan 3:20

misan iyan ta egkesenditan ke hinawa ta su atag dut te daan en ne salà tew. Melintad ke hinawa tew su netuenan tew te iyan pà dekelà ke Eleteala su netuenan din te langun taman.

1 Juan 4:17

Ne ini se limù ta te Eleteala wey kayi te menge ruma ta ne ed-ilutan te Eleteala su apey ki kenà egkeandek ketà te ed-itindeg ki diyà te etuvangan din dut te hewii ne kedtimbang din keyta. Iyan dey kenà kegkeandek su ini se ulaula ta misan kayi ki red te ampew te dunya ne ebpekeiring kiyu ki Hisus.

1 Juan 5:14

Ne mevag-et se kedsarig tew ke ebpengeningeni ki riyà te Eleteala, su netuenan tew te piya engkey ne ebpemuyuen tew ne egkeayun rut te kiyug din ne ibehey rin.