1 Juan 2:1 - Ke meupiya ne tudtul mekeatag ki Hisu Kristu

¹ Edsuratan ku sikiyu, menge anak ku, su ralan te edtavang keniyu su apey kenà kew mekedsalà. Ugaid ne embiya ruen ebpekesalà, ne ruen edtindeg keytew diyà te Amey tew ne Eleteala ne si Hisu Kristu ini ne metidtu nevenar se ulaula rin.

1 Juan 2:1 ပူးပေါင်းရင်းမြစ်များ

Lucas 10:22

Ne migkahi maa si Hisus dut te menge etew te, “Ke Amey ku se mibpesarig kediey te langun taman. Warà netau kedì te Anak a te Eleteala liyu rà te Amey ku ne Eleteala. Ne warà netau te Amey ku ne Eleteala liyu rà te siaken ne Anak din wey ke menge etew ne egkiyuhan ku te ebpayag mekeatag dut te Amey ku.”

Juan 13:33

“Sikiyu se edumdumaan ku,” ke si Hisus, “ne iring te menge anak ku, ne kenè en meuhet ne warà ad kayi te keniyu. Ketà ne ebpemengà kew kedì, ne ini se egkehiyen ku keniyu guntaani ne iring dut te intarem ku rut te menge Hudiyanen te, ‘Kenà kew ebpekependiyà te ebpesineruwan ku.’

Juan 14:16

Ne ebuyù a riyà te Amey ku su apey rin igkevehey keniyu ke Edtavang keniyu ne ebpekesambì kedì, ne kenà edsuwey keniyu taman te taman.

Juan 14:6

Midtavak si Hisus te, “Siaken ke ralan te Eleteala, siaken ke ebpuunan te benar, ne siaken ded ke ebpuunan te umur ne warà edtemanan din. Warà etew ne ebpekependiyà te Amey ku embiya kenà kayi ebpevayà te kediey.

Juan 21:5

Ne migkahi si Hisus kandan te, “Na engkey, menge suled, nekeutel kew red?” Midtavak dan te, “Warà en iya!”

Juan 5:14

Warà dà meuhet ketà ne nekita en ni Hisus ini se meama riyà te lusud te Nekebpuru ne Valey te Eleteala. “Intengi nu ve,” ke si Hisus, “neulian ke en te daru nu! Na, kenà ke en be baal te salà su apey ka kenà egkerasey te tuwas pà dut te daru nu ne ebpekesuhat keykew.”

Juan 5:36

“Ugaid ne ruen mevaher pà dut te kedtitihus ni Juan mekeatag kedì. Ini se helevek ne imbehey kedì dut te Amey ku ne Eleteala, ne ini se ebpesabut keniyu te siak ke midsuhù din kayi.

Juan 6:27

Kenà niyu iyan pegelepi ke egkeenen kayi te ampew te dunya su edsahad dà. Ugaid,” ke si Hisus, “ne iyan benar ne pegelepi niyu ke egkeenen ne ebpekevehey te umur ne warà edtemanan din. Ini se egkeenen ne siaken ke Impeanak te Menusiyà ke ebehey keniyu, su ruen gehem ku ne imbehey kedì te Amey ku ne Eleteala.”

Juan 8:11

“Warà en, Mama,” ke se meritan. “Na,” ke si Hisus te, “siak dema ne warà id-isuhat ku keykew ne kewagib. Ulì ke en be ugaid ne kenà ke en maa baal te meraat ne ulaula.”]

Nenged-ulaula 7:52

Ne menu, duen be misan seveka te menge ebpelambas te Lalag te Eleteala rengan ne warà resaya dut te menge keep-epuan niyu? Warà! Su mid-imetayan dan arà se midsuhù te Eleteala rengan ne ebpesabut mekeatag te kebpekeuma dut te Sugsuhuen din ne metidtu ne si Hisus. Guna su nekeuma en sikandin, ne mid-ulug niyu diyà te menge etew ne egkeepes kandin ne mibpeimetayan niyu.

Ruma 5:10

Su rengan ne kunterà ki pà te Eleteala, ugaid ne sabap dut te kinepatey te Anak din si Hisu Kristu ne guntaan ne imped-ulit ki en diyà te etuvangan din. Ne embiya ve iring ketà te imped-ulit ki en, ne wey ki pè be maa kenà nikandin ipeliyu rut te kedusai keytew su neviviyag en ke Anak din si Hisu Kristu.

Ruma 6:15

Kalu ke ruen menge etew ne iyan dan kunaan ke geina te kenà tew en edumaan ke penduan ni Moises ne misan ibpeiseg tew ke meraat ne ed-ul-ulaan tew enderayi ma su ruen en daat te nanam te Eleteala keytew. Ugaid ne kenà arà egkepakey!

Ruma 8:34

Ne warè en ebpekekahi te dait ne edusaan ki, su mibpebpatey si Hisu Kristu ne inselidig te menge salà tew. Ne kenà ketà dà taman su nevanew en dema sikandin ne guntaani ne riyà sikandin te egkekewanan te Eleteala se ebpeninindeg keytew.

1 Kurintu 15:34

Gimerata niyu en ke mata niyu su apey kew ebpekeimaman, ne engkeri niyu en ke ulaula niyu ne meraatey. Migkehiyan ku sikiyu kayi su apey kew egkeyeyai su ruen keniyan te keniyu ne reisek pà se netuenan din mekeatag te Eleteala!

2 Kurintu 5:21

su midsuhù din si Hisu Kristu ne warà salà din te ibpevava kandin ke langun ne salà tew. Iyan kineengketaa te Eleteala ne apey ketà ebpuun te kebpekidseveka tew ki Hisus ne ruen en kebmetidtu tew riyà te etuvangan te Eleteala.

Gelasiya 4:19

Menge anak ku egenat dut te kebperetiyaya ta, ne mibmesakit ke hinawa ku su atag dut te ed-ul-ulaan niyu. Embiya idsempità ta ini se kebmesakit, ne iring dut te meritan ne egeram en te belilit. Su iring ketà se kedreheni ku gewii te edtehad a te keduma niyu en nevenar rut te ulaula ni Hisu Kristu.

Ipisu 2:18

Ne sabap dut te mibpekidseveka kiyu ki Hisu Kristu, ne egkepakey en ne ed-uvey kiyu te Eleteala ke Amey tew ibpepevayà dut te tavang te Kedesenan ne Ebpetuntul te Menusiyà, negidsan te Hudiyanen etawa kenà Hudiyanen.

Ipisu 4:26

Embiya egkeepes kew rut te menge ruma niyu, ne uram kew su apey kew kenà ebpekedsalà kayi te ulaula niyu ne meraat. Ne kenà kew ebpetegtehuey te sakit te hinawa niyu su kenà niyu en pesendlepi te andew ke kegkeepes niyu.

1 Timoteo 2:5

Su Eleteala ne sebseveka rà, ne sebseveka rà dema se edteyekupan tew te menge etew riyà te etuvangan te Eleteala ne warà liyu rin ke kenà si Hisu Kristu ne nevaluy ne etew.

1 Timoteo 3:14

Kiyug ku ne kenà meuhet ne ebpekelambas a keniyan te keniyu, Timoteo. Ugaid ne iyan ku kedsurat kenikew

Hibruhanen 9:24

Su si Hisu Kristu ne kenà ke valey ne ebpengerapan ne mibeelan dà te etew kayi te ampew te dunya se midlusuran din su ini ne ebpekeiring dà dut te ke tidtu riyà te langit. Ugaid ne sikandin ne midlusud diyà te langit ke tidtu ne ed-ubpaan te Eleteala, ne diyan en guntaan sikandin te etuvangan te Eleteala se ebpeninindeg kenitew.

Santiago 1:27

Su ke etew ne edtelimà dut te Amey tew ne Eleteala ne metidtu nevenar se kebperetiyaya rin ne arà imbe ne etew ne metau ne edtavang te menge ilu wey ke menge balu ne egkerehenan. Ne kenà dema sikandin eduma rut te meraat ne ed-ul-ulaan te menge etew kayi te ampew te dunya.

Santiago 3:9

Ini se dilà ta se ebales te kebpeselamat ta te Amey tew ne Eleteala ne ke Kerenan tew riyà te langit, ne ke dilà ta red maa se ebales te kebpenrawak ta te ruma ta misan Eleteala se midlimbag kandan iring te paras din.

1 Pedro 2:22

“Su sikandin, ne warà iya salà din, ne warà misan seveka ne tarù ne migkahi rin.”

1 Pedro 3:18

Su misan si Hisu Kristu ne warà salà din ne mibpeimatey sikandin su atag dut te sikitew ne mekesesalà su apey ibpelived ta ke hinawa ta diyà te Eleteala. Keseveka rà se kinepatey rin atag dut te salà ta, ne kenà en edseupan su nepasad en. Ugaid ne misan mid-imetayan te menge etew ke lawa rin ne biviyag ded sikandin su warà mibpatey ke gimukud din,

1 Juan 3:18

Menge anak ku, ini se ralan te kebpekita ta te limù ta kayi te menge ruma ta ne kenà kayi rà te lalag ne egemew te bèbà ta, ugaid ne kayi te kedtavang ta kandan ne egenat te limù ta.

1 Juan 3:5

Netuenan niyu en te mibpebaluy si Hisu Kristu ne etew kayi te ampew te dunya su apey ebpebpatey ne egkeawà ke salà dut te langun tew ne menge etew. Ne netuenan niyu rema ne warà misan deisek ne salà din.

1 Juan 3:7

Menge anak ku, ne uram kew su apey warà etew ne ebpekepesuwey keniyu. Su ke etew ne iyan din ed-ul-ulaan ini se metidtu iring ki Hisus, ne sikandin se metidtu.

1 Juan 4:4

Ugaid ne sikiyu, menge anak ku, sikiyu ne nevaluy ne menge anak te Eleteala, tembù be netalew niyu ini se uvag kun ne ebpelambas te Lalag te Eleteala su warà kew melimbungi rut te lalag dan ne kenà ebpuun te Eleteala. Su ke Eleteala ne ed-ubpà diyà te hinawa niyu ne muna pà se gehem din dut te ki Setanas ne ed-ubpà ketà te hinawa te ini se menge etew rà kayi te ampew te dunya ne egkunterà ki Hisus.

1 Juan 5:17

Langun ne meraat ne ed-ul-ulaan ne salà, ugaid ne ruen salà ne iyan rimahas din ne kenà ebpekeated kandin diyà te kemetayen ne warà edtemanen din.

1 Juan 5:21

Menge anak ku, pekeriyù kew te ked-erapa niyu rut te langun ne kenà iya tidtu ne Eleteala. Arà dà taman. Juan

3 Juan 1:4

Su warà en ebpekelawan ne ebpekehalew kediey embiya ke kenà ke kerineg ku ne ke menge anak ku te ebperetiyaya ne edlaus te keduma ran dut te tidtu ne penuruan.