na wa va ha vyokulia vya twula migulu vi ve vya inzala yavo, nokuvatwulidzira amadzi ga twula ku lwanda ga ve gobuluhu bwavo, na wa va laga vingire nokugumira kivala kya wa mala kugingira mukono gugwo u duke kuvaha.
Na avana va Israeli va lagira mana mihiga makumi gane, kuduka inyinga va duka mu kivala ki veye navandu; va lagira mana, kuduka inyinga ya vingira mu tsinzako tsye kivala kya Kanani.
Kigira yaga Yesu ya va volera, Ligali, ligali, mmu volera, Si ya li Musa wa mu ha ubukima bwomigulu; navutswa Dada wange a mu hedzanga ubukima bweligali bwo migulu.
Na a ku kola kwegehidza, ya ku leka nenzala, ya ku lageridza maana, kindu kya wa vula kumanya, kinga vaguga vovo si va ki manya; a duke kukumannya, mundu si a nyala kuva mwoyo nobukima bweng'ine, navutswa ku makuva gosi ga twula mmunwa gwa Yahova mundu a veye mwoyo.
Na mana ya hera mugamba, inyima wokulagira buswage bwekivala; na avana va Israeli si va nyola mana kandi mba; navutswa va lia ku vyokulia vyekivala kya Kanani muhiga yigwo.
Uyu u veye nogutu, a hulire likuva lya Roho a voleranga mavugano. Uyu u guutanga nda mu ha mana i viseywi, kandi nda mu ha ligina lilavu, li ng'odeywi ku lieta lihya, lya u vula ho mundu u manyi, na a ta li uyu u hebeywi.