Na ga li lwa ya lola imingiri, na visambo vyoku makono ga mbotso wewe, na lwa ya hulira makuva ga Rebeka mbotso wewe, na a vola, Mundu ya mbolera yaga na yaga; ya duka ku mundu; na henza, ya li na a singiye himbi na tsing'amia tsitsye ha kidaho.
Na va gasidza Rebeka, ni va mboiera, Mbotso wetu, ive u ve mama wa tsielfu hali tsielfu makumi, kandi kisukululwi kikyo ki gumire kiribwa kya yavo ava va dunyiranga.
Kunangwa, Labani lwa ya hulira makuva ga Yakobo mwana wa mbotso wewe, ya nyagula na a tsia kumwaganira, na a mu kumberera, na a mu busa, na a mu leta mu inyumba yeye. Naye ya volera Labani vindu yivi vyosi.