Navutswa Josia si ya girunkana mmoni mwimwe ku twula kuye, navutswa yegirunkanya a duke kulwana naye, kandi si ya hulira amakuva ga Neko aga twula mmunwa gwa Nyasaye, ya tsia kulwana naye mwivona lya Megido.
Lwa kwa gwa hasi kwosi, nda hulira mwoyo gu mbolera mu lulimi lwa Vahebraina; Saulo, Saulo kigira ki u ndambidza? Nu budinyu ku ive kulasa luvasi ku kivambo.
Yava va la kolera Mwana Weligondi ubulwani, kandi Mwana Weligondi a la va guuta, kigira a veye Munene wavanene kandi Mwami wavami; kandi ava veye halala naye, ava langwa, navatovole, navasuuvirilu.
Na inze nda ku sundira, ha mugera gwa Kishon, Sisera, munene welihe lya Jabin, halala namagari gege nobunyingi bwavandu veve; na nda mu vika mmukono gugwo.