Jeremia 4:7 - KITABU KITAKATIFU

⁷ King'ang'a kyanegiye kutwula mu liginga lyakyo, nomudividzi wetsihiri; a veye mu inzira, u mali kutwula hango hehe a duke kukola kivala kikyo kuva vutswa, amadala gogo ga kolwe vyanyi ga vule kuva nomundu mugo.

Jeremia 4:7 ပူးပေါင်းရင်းမြစ်များ

2 Avami 24:1

Mu madiku gege Nebukadinezaru mwami wa Babuloni yanegira, na Jehoiakim ya gwa mutumekiri wewe mihiga gyivaka: ma ya girunkana na a mu tinguha.

2 Avami 25:1

Na Zedekia ya tinguha mwami wa Babuloni. Na ga duka ku muhiga gwa kola gyitano na gyine gwelyameha lilye, ku mweli gwelikumi, ku lidiku lyelikumi lyomweli Nebukadinezaru mwami wa Babuloni yadza, nelihe lilye lyosi, kulwana na Yerusalemi, navo vombaka mahema gavo ku li kumbiridza; na vombaka tsimpinga kwigalira lidala.

Isaya 1:7

Kivala kyenyu ki veye king'anye; madala genyu ga sambeywi nomuliru; kivala kyenyu, avamenyi va ki lia imbiri wetsimoni tsyenyu, nakyo ki veye king'anye, kuli kya vamenyi va tung'aminya.

Isaya 5:9

Mu amatu gange, Yahova wa mahe a vola, Ligali tsinyumba tsinyingi tsi la lekwa tsing'anye, kali tsi veye tsinene na tsindahi, tsi la va bugira avandu.

Isaya 6:11

Hene yaho nda teva, Yahova, kuduka inyinga ki? Naye ya ntivulira, Kuduka lwa madala ga kolwa mang'anye bugira mundu, netsinyumba bugira avandu, nekivala ki tigala kyere,

Jeremia 2:15

Ving'ang'a visoleli vi fwumanga kuye, nokuloka; na vi koli kivala kikye kuva vutswa: mada la gege ga hiye, si ga veye navandu.

Jeremia 22:6

Kigira Yahova a vola amakuva yaga ku makuva genyumba yomwami wa Yuda: Ive ku inze u veye Gileadi, kandi u veye mutwe gwa Lebanon; ligali nda kola ive kuva kyangalangwi, amadala gavandu va ta menya mu.

Jeremia 22:7

Na nda lomba ku ive avokwononnya, sa mulala nevyuma vivye; na va la temaga mitaragwa gyigyo mitovole, nokugyisigisa mu muliru.

Jeremia 25:38

Ya leka likinga lilye, kuli king'ang'a; kigira kivala kyavo ki gwiye kyokugenya kigira ubwogi bwekivavi ki dambidzanga, kandi kigira ubutima bwibwe bwomuliru.

Jeremia 25:9

henza, nda tuma avatumwa nokuvugula ubwiko bwosi ku tsimbega tsya kasikazini, Yahova a vola, nda tuma avatumwa ku Nebukadirezaru mwami wa Babuloni, mutumekiri wange nda va leta vadze ku kivala yiki, noku avandu va menyanga kukvo, noku tsihiri tsyosi tsyoku tsimbega; na nda va dividza ligali, nokuvakola kuva kyokugenya, nokukunukirwa, nokuva hatswa mihiga nemihiga.

Jeremia 26:9

Kigira ki wa profeta mu lieta lya Yahova, kuvola, Inyumba yiyi i la va kuli Shilo, nelidala yili li la va lyere, si li la va ho nomundu u menya mulyo? Navandu vosi va li ni va vuganiye Jeremia mu inyumba ya Yahova.

Jeremia 27:8

Na ga la duka, ihiri yeyo nobwami yibwo bu sula kutumekira mwami Nebukadinezaru wa Babuloni, yavo ava sula kuvika magoti gavo isi wenira yomwami Nebukadinezaru, ihiri yiyi, Yahova a vola, nda gi ha mageli, nekivavi, nenzala, nobulwaye, kuduka lwa mmala kuvadividza nomukono gwigwe.

Jeremia 33:10

Yahova a vola ndi: Kali kandi ga la hulirwa hano, ha mu volanga Ha veye ahere, ha tsi ta veye nomundu kinga inyama, kali mu madala ga Yuda, nomu tsinzira tsya Yerusalemi, tsi veye hatswa, tsi ta li ku nomundu kinga avamenyi kinga inyama

Jeremia 34:22

Henza, nda laga, Yahova a vola, nda va leta kandi virane mu lidala yili: na va la lwana nalyo, nokulivugula, nokulisamba nomuliru: na nda kola madala ga Yuda kuva hatswa, ga vule kuva nomundu kumenya mugo.

Jeremia 4:29

Madala gosi giruka kigira liyoga lya yavo ava nina ku tsiparasi na kigira avobuta; vingira mu maginga nokunina igulu ku magina: lidala sa lilala li lekeywi, si ha li nomundu wa menya mulyo.

Jeremia 44:2

Yahova wa mahe, Nyasaye wa Israeli, a vola ndi: Mwinye mwa lola ubudamano bwosi bwa nda leta ku Yerusalemi, noku madala gosi ga Yuda; henza, lero ga veye hatswa, si ha veye nomundu u menyanga mu,

Jeremia 46:18

Kuli inze mbeye mwoyo, Mwami a vola, welieta lilye li veye Yahova wa mahe, ligali kuli liva lya Taboru mu vigulu, kandi kuli liva lya Karimeli himbi nenyanza, ni ndiyo uyu a lidza.

Jeremia 49:19

Henza, a lanegira kutwula mu luyai lwa Yordani, kuli king'ang'a, ku limenya lya avetsingulu: navutswa nda va nyagulidza viruke nonoho; na uyu wa tovolwa, niye wa ndi vika kulyo: kigira ni bwaha u leng'ana ninze? Kandi ni bwaha u ling'olera inyinga? Kandi ni bwaha ni mwayi u li singira imbiri wange?

Jeremia 5:6

Kunangwa kigira yaga, king'ang'a ki twulanga mbulimu ki la viita, kisalang'ongo kyo mgolova ki la va dividza, ingo i la goneka madala gavo; mundu sa mulala u twula mu a la tandulwa; kigira mahyolo gavo ga veye manene, na lirana inyima lyavo li medeki.

Jeremia 50:17

Israeli a veye ligondi lya sala nywa; ving'ang'a vi mu kungi; kutanga, mwami wa Asuria ya mu liana kalunu Nebukadirezaru mwami wa Babuloni ya vunannya vigumba vi vye.

Jeremia 50:44

Henza, a lanegira kuli king'ang'a kutwula ku luya lwa. Yordani ku bumenyo bwetsingulu: navutswa nda va kola viruke nonoho; na uyu u tovolwa nda mu vika kulyo: kigira ni bwaha u fwanana ninze? Kandi ni bwaha u ntovolera inyinga? Ni mwayi ki u nyala kusingira imbiri wange?

Jeremia 8:16

Na lisiala lyamolo ga tsiparasi tsitsye li hulirwa kutwula Dan: na ku mwoyo gwavetsingulu veve kivala kyosi ki degeranga; kigira va duka, nokudividza kivala na vyosi vi veye mukyo: lidala, na vosi ava menya mulyo.

Jeremia 9:11

Nda kola Yerusale ni kuva vitumi, ubumenyo vyevibwe; kandi nda kola madala ga Yuda vyanyi, avandu va vule kumenya mugo.

Ezekieli 12:20

Na madala aga veye navandu ga la kolwa kyanyi nekivala ki la va king'anye; na mu la manya inze mbeye Yahova.

Ezekieli 21:31

Nda tsuka ubutima bwange ku ive; nda ku huudza ku ive nomuliru gwobutima bwange; nda ku vika mu mukono gwavandu va veye kuli tsinyama, avasidza vokudividza.

Ezekieli 32:2

Ive mwana womundu, u syomere Farao mwami wa Egepeti, na u mu volere, Ive wa fwananywa neking'ang'a ki soleli kyavetsihiri: navutswa u fwanana noguyoka mu tsinyanza; na vizulira nemigera gyigyo, na wa duvula amadzi nevirenge vivyo, nokukola migera gyavo midamano.

Danyeli 5:19

na kigira ubunene bwa ya mu ha, avandu vetsihiri tsyosi, na vetsimpya tsyosi, navetsinimi tsyosi, va degera nokutia imbiri wewe: wa ya yanza kwiita, yiita, na wa ya yanza kuva mwoyo, ya mu leka mwoyo; na wa yenya kunenehidza, ya nenehidza, na wa yenya kugehidza, ya mu gehidza.

Danyeli 7:4

Yokutanga ya li nelifwana lyeking'ang'a, na ya li ne tsimbaha tsyendidzu: na inze nda henza kuduka tsimbaha tsyayo tsya manyulwa, na ya gingwa ku twula ku lirova, nokusingeridzwa ne virenge viviri kuli mundu; na ya hebwa mwoyo gwomundu.

Kyavalevi 26:31

Na nda kola madala genyu ga gwe vyanyi, na hatakatifu henyu, nda kola hatswa, na si nda funyeridza lifunya lyomwayu gwenyu.

Kyavalevi 26:33

Na nda mu salanya hagati hetsihiri, na nda somola kivavi kumulonda: na kivala kyenyu ki la va kya vutswa, na amadala genyu ga la gwa vyanyi.