Umusidza a tuula imbadzi, nokutumika mu amanda, nokugilomba netsinyundu, nokugikolera miyinzi nomukono gwigwe gu veye netsi ngulu: yee, na a lola inzala, netsingulu tsitsye tsi geha; si a nwa madzi, na a kudza mwoyo.
Ava twulidzanga ithahabu mmuya bugira kugera, nokugera ifetha ku tsiratili, va langanga mutuuli wethahabu, naye a tuula vindu zana nokuvikola munyasaye; va gwa hasi, yee va mu sigamira.
Va mu gingira kwivega, va genda naye, nokumusingeridza ha bugono hehe, naye a singira; si a nyala kutwula mbugono bwibwe: yee, kali mulala a lanira kuye, naye si a nyala kumutivulira, kandi si a nyala kumuhonnya ku kivi kikye.
Na kalunu va kolanga ubwoni kuvita, na velombeye vifwananyi vyokulongwa vyefetha yavo kali vifwananyi zana vi veye kuli iimanya lyavo avene, vyosi vi veye likola lyavasidza: va volanga ku makuva gavyo, Avasatsa va haananga vihaanwa va buse vi moli.
O bayaye ku uyu u volera musala, Yuka; nokuvolera ligina li veye idimbidi, Singira Yiki ki nyala kwegidza? Henza, kya kunikwa ithahabu nefetha, si ha veye nomwika kali hakudzu mukyo.