Mateo 17:27 - Kasulatan to Diyus

²⁷ Agad ita no batà to Diyus, ogpakabayad ki dà to igpabayad ita to otow no nigsakup ko masawa-an ki to mgo otow no wadà labot to pagsakup to Diyus. Kaling man ogpakapudut ki to igkabogoy ta to simbahan. Na Pedro, ogpangawad ka diyà to dagat. To tugdow no ogtubug, bugkuta. Ko lingaton nu to kawad, ogkakita-an nu to songo sapì du-on to bàbà. Puduta aw ibayad sikan to bogayanan ta to simbahan su litos on man sikan no igbayad ta tibò.”

Mateo 17:27 ပူးပေါင်းရင်းမြစ်များ

Mateo 17:26

“Kan mgo dampà dan pad iyan,” to intabak ni Pedro. “Tùtu-u iyan,” to kagi ni Jesus. “Mano iyan ogpakabayad to mgo dampà dan pad, na og-agad dà iyan no ogkalipwasan to mgo batà to pagbayad.

Mateo 18:6

“Dì to ogpasuwoy to ma-intok no otow no nigtu-u kanak, mahawoy dà ko pa-usbugon kandin diyà to bulibuwan to dagat no oglawigan to batu to li-og. Dì malisod lagboy ko kastiguhon kandin to Diyus to mahudi no adow.

Mateo 18:8

Na impananglitan mandà ni Jesus no nig-iling to “Ko makasaà ka to boad, madoyow pad nasì ko tampodon nu to boad aw itimbag. Manginun pad ogpakasood ki to sinakupan to Diyus agad nakipangan ki dow pungkù ki, ayaw ki ikasugba diyà to logdog no wadà kaposokanan, agad kokobongan ki aw boboadan ki.

Mateo 5:29

Ko makasaà ka to mata no dibauy, lugita aw itimbag. Ayaw kid maka-andiyà to kastiguhanan to saà, agad mamatahan kid. Manginun pad ogpasakup ki to sinakupan to Diyus, agad dibauy nandà to mata.

Mateo 5:30

Ko makasaà ka to boad, tampoda aw itimbag. Ayaw kid ikasugba diyà to logdog no kastiguhanan to saà, agad wadà kakipangan ta no otow. Manginun pad ogpasakup ki to sinakupan to Diyus, agad nakipangan ki no otow.

Marcos 9:42

Nig-iling si Jesus to “To ogpasuwoy to ma-intok no otow no nigtu-u kanak, mahawoy dà ko pa-usbugon kandin diyà tò dagat no oglawigan to batu to li-og din. Dì malisod lagboy ko kastiguhon kandin to Diyus to mahudi no adow.”

Marcos 9:43

Na impananglitan ni Jesus no nig-iling to “Ko makasaà ka to boad, manginun pad nasì ko tampodon nu. Agad boboadan ka, dì ogka-uwakan ka dà tibò ko mamatoy ka aw pa-andiya-a ka to banwa no kastiguhanan to saà to mahudi no adow. Manginun pad nasì ko sobu-uk dà to boad nu dì ko mahudi no adow buhayon ka. Diyà to kastiguhanan to saà moydu-on logdog no wadà kaposokanan.”

Lucas 17:2

To ogpasuwoy to agad ma-intok no otow, mahawoy dà ko pa-usbugon kandin diyà to dagat no oglawigan to batu to li-og. Dì malisod lagboy ko kastiguhon kandin to Diyus to mahudi no adow.

Juan 6:61

Dì si Jesus, nama-anan din on to pagminus dan aw ikagi kandin to “Nokoy man no naboong-boongan now kan no impang-anad ku aw igkabungkù now on buwa sikan to pagtu-u now.

Taga-Ruma 14:21

So-idi to madoyow podon. To ogko-onon ta aw og-inomon ta dow agad nokoy pad, ko mahimu sikan no igkalapas din to kandin tinahoman no igpahimu kandin to Diyus, ogdilinan ta.

1 Taga-Kurintu 8:13

Kaling man to pagkaluyow ku to ogko-on to intaphag to mgo ampu-onon, ko ogkahimu no igkasaà to su-un ku du-on to kandin tu-un no tinahom, ogdilinan ku to pagko-on sikan su dagow mahimu no igkasaà on to su-un ku.

1 Taga-Kurintu 8:9

Dì ita, ogdowdoyow ki ko puli ta saga-on to kadodoog to sinakupan to Diyus bahin to nahimu on to duma ta no ig-okod podon su dagow ita, mahimu ki gayod no oglikatan to igkasaà to duma ta to kandin tu-un no tinahom.

2 Taga-Kurintu 6:3

Og-oyow koy to tibò mado-ot su awos wadà otow podon no ogkababagan noy to pagtu-u dan awos wadà saà no ogkahimu no litos igka-oyow dan to kanami impasabut.

2 Taga-Kurintu 8:9

Su nama-anan now to ka-at ni Jesu-Kristu no Magbobo-ot ta, agad kandin, wadà pigboong din, dì nigpawadà kandin awos iyu, mamoydu-onan no impabayà to pagkawada-i din.

1 Taga-Tisalunika 5:22

Dì agad nokoy no mado-ot, oglipasan now.

Santiago 2:5

Na mgo kasu-unan ku, konà now ogkalingawan to pigpilì on to Diyus to mgo nawada-an no mgo otow no oghimuhon din no ogkamoydu-onan to dakoo no pagtu-u aw ogpakasood to pigsakupan din su insahad din on diyà to mgo otow no niglogon kandin.