Juan 7:33 - Kasulatan to Diyus

³³ Pagdatong to mgo guwardya, nigpang-anad si Jesus to ka-otawan no nangkahimun. Nig-ikagi kandin to “Ogpaugoy-lugoy a pad dini iyu, dì madaas ad oghipanow su og-ulì ad diyà to nigpa-andini kanak.

Juan 7:33 ပူးပေါင်းရင်းမြစ်များ

Marcos 16:19

Pagkatapus to pag-ikagi ni Jesus no Magbobo-ot, nabayow kandin diyà to langit. Nig-ingkud kandin no nigso-ing diyà to kalintu-u to Diyus.

Juan 13:1

Na madaas on og-abut to tighininang no pighingadanan to Hinang to Pagpalipas to Kado-otan aw kama-ani ni Jesus to ogkagotò on to adow din no ighipanow din kani so-idi no kalibutan aw ulì diyà to Amoy din. Nalogonan din kanunoy to tu-un din no mgo sakup dini to kalibutan, dì du-on igpakita din to ka-aslagan to paglogon din kandan.

Juan 13:3

na si Jesus no ta-un to pagpamango-on dan, pigsakindogan din to ko-onanan su ogpasagkop kandin no oghugasan din to kobong to mgo sakup din no ta-indanan to nasobu-uk on kandan. Nama-anan ni Jesus to tahan on nabogayan kandin to Diyus to kabogbogan no wadà ogboongon. Nama-anan din gayod to Diyus to piglikatan din aw ogdoogan din gayod. Na, piglobas din to nakababow no kabò din aw pamagkosa din to tuwayla du-on to hawak.

Juan 13:33

Na, mgo sakup ku no pigpang-anad ku angod to mgo batà ku, konà no maugoy to pagka-ugpà ku iyu. Ogpangaha-on a now dì igkanangon ku iyu angod to ingkanangon kud on tahan to mgo punu-an to Hudiyu no ‘To ogdoogan ku, wadà ogpakatutuu iyu.’

Juan 14:12

“Na so-idi iyan, to otow no ogtu-u kanak, ogpakahimu kandin to angod dà to pigpanghimu ku. Agad oglabow pad no hinang, ogkahimu din gayod su og-andiya-an ku to Amoy ku.

Juan 14:19

Ko maugoy-lugoy pad, konà ad ogkakita-an to mgo otow no wadà tu-u kanak. Dì iyu, ogkakita-an a now dà. Mano ogkabuhì a dà, iyu, ogkabuhì kow dà gayod.

Juan 14:28

Na-ikagihan kud on iyu to ‘Oghipanow ad, dì og-ulì a dà dini.’ Ko ogpa-aag-aagon now podon to kanak ogkadomdoman, ogtukhawan now nasì podon su ogpagtagbu ad to Amoy ku no labow pad dini kanak.

Juan 16:28

Pag-andini ku to kalibutan, Diyus no Amoy to nalikatan ku. Dì ogkali-usan kud on gayod so-idi kalibutan su ogpati-ulì a diyà to Amoy ku.”

Juan 16:5

Dì kunto-on, no og-andiya-an ku to nigpa-andini kanak, wadad naka-usip kanak to ‘Ando-i to dooganan nu.’

Juan 17:11

Na, madaas kud on ogkali-usan so-idi kalibutan su oghipanow ad su og-andiya-an ku ikow Amoy. Dì kandan no sakup ku, ogkabitas dà. Amoy no matuwadong, ogpatandu-an ku ikow to mgo sakup ku no imbogoy nud on no igpatagon kandan to pagtu-u to ikow ngadan awos wadà ogboongon ku no sakup aw makatibò kandan angod to pagkatibò ta.

Juan 17:13

Dì kunto-on og-andiya-an kud on ikow Amoy. No dini a pad to kalibutan, nalituk kud sikan no pigpangamuyù ku ikow awos kandan, mamakadinog aw kanunoy mamakatukhow.

Juan 20:17

Naka-iling si Jesus to “Ayaw a nu ogdawata su wadà a pad kawoy diyà to langit no pig-ugpa-an to Amoy ku no Diyus. Dì ikow kunto-on, pang-andiya-i nud nasì to mgo pangabaga ku no su-un ku aw inangon to ogkawoy ad aw andiyà ad to Amoy ku aw Amoy now gayod. Kandin to Diyus ku aw Diyus now gayod.”

Juan 9:4

Ogtuman ki to igpahinang ita to Diyus no nigpa-andini kanak su oghutoy ki pad su ma-awang pad. Dì madaas kid ogkasaklopan no wadad ogpakatalabahu.