Zatù 7:22 - Manobo Western Bukidnon OT

²² Ne zutun te kebpezeǥinga zuen te 300 he menge Israilihanen te menge vudyung dan, mibpengelinteuwan te Nengazen he med-uney medtebek is menge etew zutun te kampu te menge Midianhen. Is duma kandan mibpelaǥuy pehendiyà te Bet Shita he uvey te Zerera pelaus diyà te dulunà te Abel Menola he uvey te Tabat.

Zatù 7:22 ပူးပေါင်းရင်းမြစ်များ

1 Hadì 19:16

Lenahi nu zaan si Jehu he anak ni Nimshi su iyan sikandin hadì te Israel wey si Elisha he anak ni Shafat, he tig-Abel Mehola, su iyan sikandin ebpeneuven ku he ebpekeilis kenikew.

1 Hadì 4:12

Si Banaa he anak ni Ahilud, is gubirnedur te Taanac, Megido, te tivuuk he Bet Shean he uvey te Zaretan he alug te Jezreel, wey te menge lugar puun te Bet Shean pehendiyà te Abel Mehola wey te leyunà te Jokmeam.

2 Cronica 20:23

Midsurung te menge Amonihanen wey menge Moabitanhen is menge sundaru ziyà te menge tig-Buntud he Seir ne nengepatey zan langun. Ne hein nengepatey zan en sikandan, ne mid-uuney zan mebpehimhimetayà.

Salmo 83:9

Daaǥa nu sikandan Nengazen, iring te mibeelan nu ziyà te menge Midianhen, wey ziyà te ki Sisera wey ki Jabin diyà te zal-ug he Kishon.

Isaias 19:2

Migkaǥi is Nengazen te, “Ibped-uney ku ibpedtetebek is menge Ehiptohanen: suled kuntra te suled, siringan kuntra te siringan, inged kuntra te inged, wey ginhedian kuntra te ginhedian.

Isaias 9:3

Nengazen, ebeǥayan nu sikandan te utew zekelà he kelipey. Egkelipey sikandan diyà te etuvangan nu iring te menge etew he egkelipey emun tiraǥun etawa iring te menge etew he igkelipey zan is bahin dan te menge azen he netavan dan diyà te kebpekidtebek dan.

Isaias 9:4

Su ibpekeziyù nu sikandan diyà te midlupiglupig kandan. Iring sikandan te uyaǥen he ebedtien nu is id-eyuǥu zuen wey is tuked he idlagkut duen. Is ebeelan nu kandan iring te mibeelan nu zengan hein midaag nu is menge Midianhen.

Ezekiel 38:21

Ibpehimetayan ku sikew, Gog, diyà te menge vuntud ku, ne ebpehimhimetayà is menge sundaru nu. Iyan a, is Nengazen he MEGBEVAYÀ, is migkaǥi kayi.

Habakuk 3:14

Midtiyuk nu is ulu te peremandar te menge sundaru zin ne iyan nu in-uney itiyuk is besut te panà dutun te peremandar. Mibeelan nu heini hein midsurung key zan he iring dan te vagyu su wey key zan ikepeyapat. Su kelipey zan is kedezaat kenami te mekehizuhizu, he nemen-eles tenged te kegkahandek.

Haggai 2:22

Edèdeetan ku is menge ginhedian ne id-awè ku is gehem dan. Eberiudsungen ku is menge kerwahi zan wey is ebpemen-untud kayi. Ebpemematey is menge kudà ne ed-uuney ebpehimhimetayà is menge pereuntud kayi.

Zacarias 14:13

Iring daan kayi he kezeetan is ed-aǥi ziyà te menge uyaǥen dan diyà te menge kampu zan ragkes en is menge kudà, menge mulà, menge kemilyu, wey menge asnu. Dutun he andew edterenteduwen te Nengazen heeyan he menge etew, ne is kada sevaha kandan ebpekidtebek te iring din he etew. Minsan is menge etew ziyà te zuma he menge inged diyà te Juda ne ebpekidtebek para te Jerusalem. Edtiǥumen dan is menge ketiǥeyunan te langun he menge nasyun diyà te peliǥuy zan: is utew mahabet he menge vulawan, menge pelata, wey menge visti.

Josue 3:16

ne mid-engked he edtudà haazà is wahig. Mibpundu is wahig diyà te sevaha he lugar he egngezanan te Adam, inged heini he uvey te Zaretan. Wazè en wahig he edtudà pehendiyà te Zaǥat te Araba, umbe nekelayun haazà is menge etew ziyà te lugar he uvey te Jerico.

Josue 6:16

Ne hein ikepitu en te kedliǥuy zan, impezaǥing te menge memumuhat is menge vudyung dan ne mibmendaran ni Josue is menge etew te, “Kulahì kew su imbeǥey en keniyu te Nengazen heini is inged!

Josue 6:20

Impezaǥing te menge memumuhat is menge vudyung dan, ne nemengulahì is menge Israilihanen hein nezineg dan heini. Ne neregdas is berengbeng dutun te inged ne utew zà melemu is kedseled dan ne mid-aǥew zan haazà is inged.

Josue 6:4

Ipehuna nu is ebivinting duen te Kavan te Kebpekid-uyun ku keniyu he pitu he menge memumuhat he ed-uwit te tigselimbaha he vudyung. Ne emun ikepitu en he andew, ne kepipitu niw liǥuya haazà is inged, duma te menge memumuhat he ebpezaǥing te vudyung.

1 Samuel 18:19

Neuma is telaan he ibpeesawa si Merab ki David, impeesawa maan ni Saul si Merab ki Adriel he tig-Mehola.