Salmo 103:3 - Manobo Western Bukidnon OT

³ Mibpesaylu zin is langun he menge salè ku, wey neulian is langun he menge zaru ku tenged te kebewii zin kedì.

Salmo 103:3 ပူးပေါင်းရင်းမြစ်များ

2 Samuel 12:13

Ne migkeǥiyan ni David si Natan te, “Nekesalà a te Nengazen.” Midtavak si Natan te, “Mibpesaylu ke en te Nengazen, ne kenè ke zed ebpatey kayi he salà.

Salmo 130:4

Piru mibpesaylu key kenikew, umbe edtehuzen dey sikew.

Salmo 130:8

Iyan sikandin edluwas keniyu te langun he menge salè niw.

Salmo 147:3

In-awè din is seeng te egkengeseeng; mibewian din is menge palì dan.

Salmo 30:2

Nengazen he Megbevayè ku, mibpetavang a kenikew tenged te zaru ku, ne mibewian a kenikew.

Salmo 41:8

Ke sikandan te, “Utew en gerabi is daru zin, umbe kenè ne sikandin ebpekeenew.”

Salmo 86:5

Tutuu he meupiya ka wey mepineseyluwen, ne utew nu mibmahal is langun he ebpengumew-umew kenikew.

Exodus 15:26

Ke sikandin te, “Emun ebpurungan niw ebpemineǥa is lalag ku te Nengazen he Megbevayè niw, wey emun iyan niw ebeelan is mid-isip ku he hustu, wey emun daan kenè niw ebey-anan is menge sulunuzen wey menge suǥù ku, kekenà, ebpezumdumahan niw, ne kenè ku sikiyu ebpeeǥiyan te minsan hengkey he zaru he impaaǥi ku ziyà te Ehipto, su iyan a is Nengazen ebawì keniyu.”

Exodus 34:7

Ibpeehè ku is kebmahala ku te mahabet he menge etew, ne ebpeseyluwen ku is kezaat dan, kerepasan dan, wey menge salè dan. Piru edsilutan ku is mekesesalà, ragkes is menge kevuwazan dan taman te iketelu wey ikeepat he lapis te kevuwazan.”

Isaias 33:24

Dutun he timpu, wazà meǥinged diyà te Jerusalem he ebpekekaǥi te, “Deruwanen a.” Ebpeseyluwen te Nengazen is menge salè dan.

Isaias 38:17

Tutuu, he is kemeresayan ku para te keupiyaanan ku. Tenged te kebmahala nu kedì, midlibri a kenikew te kezeetan wey mibpesaylu a kenikew te menge salè ku.

Isaias 43:25

“Iyan a mismu mid-awà te menge salè nu su para meveǥayi a te zengeg, ne kenè ku en heini edtentenuzan.

Isaias 53:5

Iyan tutuu is, mibpelian sikandin tenged te menge kedrapas tew; nevuǥel sikandin tenged te kelelalung tew. Is silut he mid-antus din iyan nekeveǥey kenitew te meupiya he kebpekesavuk; ne pinaaǥi te menge palì din nengeulian kiw.

Jeremias 17:14

He Nengazen, iyan ke zà ebpekevawì kedì wey a meulii; iyan ke zà ebpekelibri kediey. Iyan ka midalig ku.

Numero 12:13

Umbe, mibpehizuhizu si Moises te Nengazen he ke sikandin te, “He Megbevayè ku, edhangyù a ziyà te kenikew he bewii nu si Miriam.”