Ruth 2:10 - Manobo Western Bukidnon OT

¹⁰ Ne si Ruth, hein nezineg din haazà is migkaǥi ni Boaz, ne midluhud sikandin su iyan betasan dan te kedtahud, ke sikandin te, “Maan is egkehizuwan a wey edtevangan a kenikew is lumelengyawà dà dini te keniyu?”

Ruth 2:10 ပူးပေါင်းရင်းမြစ်များ

Genesis 18:2

Mibpememantew si Abraham ne neehè din is tetelu he maama ziyà te uvey. Ne zutun te kegkaahaa zin, migaanggaan medsinuǥung ne midlangkeb diyà te tanà su edtahud.

2 Samuel 19:28

Ereg pezem he ebpenhimetayan nu is menge kevuwazan te apù ku, piru siak is suluǥuen nu ne nehizuwan nu su impekaan nu zuma kenikew. Umbe kenà ad ereg he edhangyù pa kenikew te pebur.”

2 Samuel 7:18

Dutun midseled si Hadì David dutun te Tulda he zutun kes Kavan te Kebpekid-uyun. Ne mibpinuu sikandin diyà te etuvangan te Nengazen ne mibpengemuyù te, “He Nengazen he MEGBEVAYÀ, hentei e ves wey is pemilya ku maan is midtuvazan a kenikew te iring kayi?

2 Samuel 9:8

Midluhud si Mefiboshet ne migkaǥi te, “Hentei e ves is utew nu igkeǥaǥew? Iring e zè man te minatey he asu.”

Leviticus 19:34

Irerepengan niw sikandan, wey mahala niw sikandan iring te kebmahala niw te keugelingen niw, su umuuliey kew zaan dengan diyà te Ehipto. Iyan a kes Nengazen he Megbevayè niw.

Ruth 2:11

Ne midtavak si Boaz te, “Geina te netudtulan a te langun he tavang nu te enuǥang nu puun dutun te timpu he minatey is esawa nu. Netuenan ku he mid-ewaan nu is amey nu wey iney nu wey inged nu ne mid-ulì ka kayi te kenami he kenè nu egkengekilala.

Ruth 2:13

Ne ke si Ruth te, “Utew zekelà is hizu nu kediey. Inmeupiya utew te ǥehinawa ku is menge lalag nu he menayù, minsan pa te siak wazè e en mekerepeng te menge suluǥuen nu.”

Ruth 2:19

Ne zutun mid-insà kandin si Naomi te, “Hendei ka mebpekirarew ǥeina? Hentei ki perayan is mibpekirerawan nu? Berakat he tuvazi te Megbevayà haazà is etew he nehizu kenikew!” Ne zutun migkaǥi si Ruth he ziyà sikandin mebpekirarew te perayan te etew he migngezanan ki Boaz.

Ruth 2:2

Duen timpu he migkaǥi si Ruth diyà te ki Naomi te, “Tuǥuti a kenikew he edhendiyà a te menge perayan su wey a mekepekirarew te barli. Kela ke zuen etew he idtuǥut din kediey is kebpekirarew ziyà te perayan din.” Ne midtavak si Naomi te, “Uya, bayi, hendiyè ka.”

Ruth 2:9

Dini ke zà pen-ahà te rerawen te perayan ku he ebpenggeraven te menge sakup ku ne zini ka terebahu uvey te menge suluǥuen ku he vahi. Migkeǥiyan ku is menge sakup ku he kenè ke zan semuka. Ne emun egkemezahan ka, diyà ka inum te menge umuy he mibpemenù dan te wahig.”

1 Samuel 25:23

Hein neehè en ni Abigail si David, ne migaanggaan mebpenaug dutun te asnu ne midluhud diyà te ki David is edtahud, migkaǥi sikandin te, “Datù, pemineǥa a kenikew. Iyan e zà besula.