Numero 18:8 - Manobo Western Bukidnon OT

⁸ Ne migkaǥi is Nengazen diyà te ki Aaron te, “Iyan a mismu mibpilì kenikew para iyan ka mekezumala te vuluhaten para te segradu he menge pemuhat he ibpemuhat te menge Israilihanen kayi te kediey. Ibeǥey ku heini kenikew wey ziyà te menge anak nu he keniyu he vahin guntaan wey taman te taman.

Numero 18:8 ပူးပေါင်းရင်းမြစ်များ

2 Hadì 12:16

Is selapì he imbeǥey zuma te menge halad su imbayad te salà wey is menge pemuhat he para idlumpiyu, wazà haazà iahuk duen te kahun diyà te valey te Nengazen, su para zà haazà te menge memumuhat.

2 Cronica 31:4

Mibmenduan din daan is menge etew he menge meǥinged te Jerusalem he veǥayi zan te vahin is menge memumuhat wey menge Levihanen su wey zan mekepurung mekepenilbi sumalà is insuǥù te Kesuǥuan te Nengazen.

2 Cronica 31:5

Hein ingkepehibelu en heini ziyà te menge etew, mibpeketulanged is menge Israilihanen te kebeǥey te egkehuna he vahin te sebpet dan he trigu, binu, lana, teneb, wey te zuma pa he egkekuwa zan diyà te tanà. Imbeǥey zan is ikepulù te langun he pruduktu zan.

Exodus 28:43

Emun edseled si Aaron wey sikan is menge anak din duen te Tulda he Edtelevukaayan, etawa ed-uvey zan duen te pemuhatà diyà te Segradu he Lugar su ebpemuhat sikandan, kinahanglan he egemiten dan heini su edhimetayan ku sikandan emun ibpeǥawaǥawa zan is pid-etawan dan. Heini he sulunuzen pehendiyè en te egkelapislapis he kevuwazan ni Aaron is kedtumana zan kayi.

Exodus 29:21

Ne kuwa ka te lengesa he zutun te pemuhatà, ne isahug nu heini te lana he para idlana ne ipirik nu haazà diyà te ki Aaron wey ziyà te menge visti zin, ipirik nu zaan duen te menge anak din, wey ziyà te menge visti zan. Dutun, si Aaron wey sikan is menge anak din he maama wey is menge visti zan, igkepehinungud en kayi te kediey.

Exodus 29:28

Kenà egkahalin is paaǥi ku he iyan heini: Emun ebpemuhat is menge etew ku te menge pemuhat he para te meupiya he kedepità, ne sikan is kumeng wey buvun duen te ayam he ibpemuhat kinahanglan he ibeǥey ziyà te menge memumuhat.

Exodus 29:29

“Emun ebpatey en si Aaron, sikan is menge visti zin te kegkememumuhat din kinahanglan he ibeǥey ziyà te kevuwazan din he ebpekeilis kandin te lavew he mememuhat su para igkevivisti zan haazà emun ed-urdinahan sikandan pinaaǥi te kedlenahi kandan.

Exodus 40:13

Ne sun-uzi nu si Aaron duen te menge visti te memumuhat, ne lenahi nu sikandin su iyan heini paaǥi te kebpehinunguza kandin kayi te kedì, su wey mekepenilbi sikandin kediey pinaaǥi te kebpemuhat.

Exodus 40:15

Ne lenahi nu sikandan iring te kedlanahi nu te amey zan, su para mekepenilbi sikandan kediey pinaaǥi te kebpemuhat pehendiyè en te huziyan he menge lapis te kevuwazan.”

Isaias 10:27

Dutun he andew, ibpeǥawas ku sikiyu puun te ǥehem te Asiria he henduen be te meveǥat he uwiten he midtiang niw wey iring te eyuǥu he nekeveǥat te tengel niw. Ebpekeǥawas kew puun te ǥehem din su egkehimu kew he gemhanan.”

Leviticus 21:10

Emun egkeseeng is lavew he memumuhat tenged te minatey, kinahanglan he kenè din gusenga is bulvul zin wey kenè din bindasa is bisti zin.

Leviticus 23:20

Ne ibayew te memumuhat diyà te etuvangan te Nengazen sikan is dezuwa he kerehidu wey is pemuhat he zuma te nehuna he neraǥun. Segradu heini he menge pemuhat diyà te Nengazen ne vahin heini te menge memumuhat.

Leviticus 6:16

Is egkesamà he herina, ne edhilutuen ne egkeenen ni Aaron wey te menge memumuhat he menge kevuwazan din. Piru hilutua zan heini he wazè din tapey, ne keena zan diyà te lama te Tulda he Edtelevukaayan, he segradu he lugar. Imbeǥey heini kandan te Nengazen he kandan he vahin duen te menge pemuhat he pinaaǥi te hapuy. Is pemuhat he para gasa utew heini segradu iring te pemuhat he para idlumpiyu wey te pemuhat he vayad te salà.

Leviticus 6:18

Is langun he maama he menge kevuwazan ni Aaron egkehimu he egkeenen dan is bahin dan dutun te menge pemuhat pinaaǥi te hapuy. Para zà heini kandan taman te peleebuten he menge kevuwazan wey kenà heini egkeengked taman te taman. Is ebpekezegkit kayi he menge pemuhat, egkeipiktuwan te kegkesegradu kayi.

Leviticus 6:20

mehitenged te pemuhat he para te Nengazen he ibpemuhat ni Aaron dutun te andew te kedhimuwa kandin he lavew he memumuhat, he kinahanglan he ed-ul-ulahan daan te menge kevuwazan din he ebpekeilis kandin: Mebpemuhat sikandin te zezuwa he kilu he meupiya he kelasi he herina. Pemuhat heini he para te kebeǥey te zengeg diyà te Nengazen, he layun heini ebeeli taman te taman. Is liwazà kayi ne ipemuhat din ke meselem ne is liwazà wey ke mahapun.

Leviticus 6:26

Is memumuhat he ebpemuhat kayi, kinahanglan he megkaan kayi ziyà te lama te Tulda he Edtelevukaayan, kes segradu he lugar.

Leviticus 7:14

Mebpemuhat sikandin te tigselimbaha ziyà te kada kelasi kayi he supas he gasa ziyà te Nengazen. Ne ǥaked en heini te memumuhat he mibpemirik te lengesa he pemuhat he para te meupiya he kedepità.

Leviticus 7:28

Mid-uman medsuǥù is Nengazen ki Moises

Leviticus 7:6

Ebpekekaan te egkesamà kayi he pemuhat is langun he maama ziyà te pemilya te menge memumuhat, piru kinahanglan he ziyè dan heini egkeena te segradu he lugar, su utew heini segradu.

Leviticus 8:30

Ne migkuwa si Moises te lana he para te idlana wey lengesa he zuen te pemuhatà ne mibpirikan din si Aaron wey kes menge anak ni Aaron wey is menge visti zan. Pinaaǥi kayi impehinungud din sikandan wey is menge visti zan diyà te Nengazen.

Numero 18:9

Duen niw vahin duen te segradu he menge pemuhat he kenà edtutungen, he ibpemuhat te menge etew kayi te kedì he segradu he menge pemuhat. Ragkes en kayi is menge pemuhat he para gasa, pemuhat he para idlumpiyu, wey pemuhat he vayad te salà. Iyan heini vahin niw te menge anak nu.

Numero 5:9

Is langun he segradu he menge gasa he ed-uwiten te menge Israilihanen diyà te memumuhat, gaked en te memumuhat.

Deuteronomio 12:11

Kinahanglan he ed-uwiten niw is menge pemuhat niw ziyà te lugar he ebpilien te Nengazen he Megbevayè niw he zutun sikandin ebeǥayi te zengeg. Iyan heini menge pemuhat wey menge halad he ibpahalad ku keniyu: menge pemuhat he edtutungen wey zuma pa he menge pemuhat, is ikepulù niw, is ispisyal he menge gasa niw, wey is langun he kineupiyahan he menge halad he impenaad niw ziyà te Nengazen.

Deuteronomio 12:6

Dutun niw uwita is menge ibpemuhat niw he edtutungen wey is duma pa he menge pemuhat, is ikepulù niw, is ispisyal he menge gasa niw, is insaad niw he idhalad, is kineugelingen he menge halad, wey is kinekekayan te menge uyaǥen niw.

Deuteronomio 18:1

“Is menge memumuhat he kevuwazan ni Levi wey is duma pa he sakup te tribu ni Levi, iyan sikandan tribu te Israel he wazà tanà he egkepengevilin dan. Iyan dà egkekaan dan is puun duen te menge pemuhat pinaaǥi te hapuy he ibpemuhat diyà te Nengazen, su iyan heini kandan he egkepengevilin.

Deuteronomio 26:13

Ne kaǥi kew ziyà te etuvangan te Nengazen he Megbevayè niw te: ‘Migkuwa ku en puun te valey ku is segradu he vahin he iyan is ikepulù, ne imbeǥey ku ziyà te menge Levihanen, diyà te kenà menge Israilihanen, diyà te menge ilu, wey te menge valu he vahi su iyan heini insuǥù nu kenami. Wazè ku repasa wey lipati is minsan sevaha zuen te menge suǥù nu.