Numero 12:1 - Manobo Western Bukidnon OT

¹ Hein diyè dan te Hazerot, midsawey ni Miriam wey ni Aaron si Moises su ǥeina te nengesawa sikandin te Kushanen.

Numero 12:1 ပူးပေါင်းရင်းမြစ်များ

Genesis 24:37

Impenangdù ku te egalen ku he edtumanen ku is suǥù din he egkaǥi te, ‘Kenè ka mebpilì te ed-esewaan te anak ku kayi te menge tig-Canaan he is tanè dan iyan ed-ubpaan tew ǥuntaan.

Genesis 27:46

Ne migkeǥiyan dutun ni Rebeka si Isaac te, “Utew ku en igkerasey te ed-isip-isip is tenged kayi te menge esawa ni Esau he menge Hitihanen. Emun iyan ed-esewaan ni Jacob is tig-kayi zed he vahi he Hitihanen, deyzey pa ke ebpatey e en nasì.”

Genesis 41:45

Ne migngezanan dutun te hadì si Jose te si Zafenat Panea, ne impepengesawa zin ki Asenat he anak ni Potifera he iyan lavew he memumuhat diyà te inged he On. Ne nehimu si Jose he gubirnedur te tivuuk he ǥinhedian te Ehipto.

Exodus 2:16

Ne zutun, is pitu he anak he vahi te memumuhat diyà te Midian, midhendiyè dan te kalut su edsekezu te ibpeinum te menge uyaǥen te amey zan.

Exodus 2:21

Ne mibpezumazuma si Moises ne zutun en med-ubpà te kandan, ne impeesawa kandin ni Reuel is anak din he si Zipora.

Exodus 34:16

Ne egkehimu zaan he ebpemengesawa ziyà te kandan is menge anak niw he maama, ne tenged dutun egkehimu he ed-azap dan te menge ed-ezapen dutun te menge etew.

Numero 14:22

wazà minsan sevaha kandan he ebpekeseled diyà te tanà he insaad ku ziyà te menge kepuun dan. Su minsan neehè dan is mekeǥeǥehem he kebpekiduma ku kandan wey egkengein-inuwan he mibeelan ku ziyà te Ehipto wey ziyà te sibsivayan, layun e zan gihapun egezami wey wazè dan mebpezumazuma kedì. Umbe sikan is menge midselikwey kedì, ne kenà ebpekeseled keniyan he tanà.

Numero 26:59

ne iyan esawa ni Amram si Jokebed he kevuwazan daan ni Levi. Diyà ianak si Jokebed te Ehipto. Si Amram wey si Jokebed iyan ginikanan eni Aaron, Moises, wey Miriam.