Numero 11:12 - Manobo Western Bukidnon OT

¹² Menge anak ku ve sikandan? Iyan e ve mid-anak kandan? Maan is egkeǥiyan a kenikew he ed-eturen ku sikandan iring te ked-atur te perevantey te vatà he edsepipiyen din wey ibpesusu zin. Ne ibpezuma nu sikandan kedì diyà te tanà he insaad nu ziyà te menge kepuun dan?

Numero 11:12 ပူးပေါင်းရင်းမြစ်များ

Genesis 13:15

Is taman te egkeehè nu he tanà, ibeǥey ku kenikew wey ziyà te menge kevuwazan nu, ne egkaangken dan te taman te taman.

Genesis 24:7

Is Nengazen, he iyan dà Megbevayà diyà te langit, migkaǥi kedì, he ewai ku is menge kezuzumahi te amey ku wey is inged ku he zutun a meetew. Ne nenangdù sikandin he ibeǥey zin heini is tanà he Canaan diyà te menge kevuwazan ku. Umbe hipanew ke en su ebpezumahan ke zin te menge velinsuǥuen din he ibpehuna kenikew ne iyan edtavang kenikew wey ka mekaahà diyà te egkeesawa te anak ku.

Genesis 26:3

Kayi ke zà ubpà dèpa su edumahan ku sikew wey edtuvazan ku sikew. Ibeǥey ku heini kenikew wey ziyà te menge kevuwazan nu heini is langun he tanà. Edtumanen ku is pesarig ku te amey nu he si Abraham.

Genesis 50:24

Duen timpu he migkaǥi si Jose ziyà te menge suled din te, “Meǥaan en is kebpatey ku, piru kenà egkehimu he kenè kew en edtevangan te Megbevayà. Ne ibpaawè kew zin ded kayi he tanà, ne ibpeulì kew zin diyà te tanà he impesarig din te menge kepuun tew he si Abraham, si Isaac, wey si Jacob.”

2 Hadì 10:1

Duen 70 he kevuwazan ni Ahab diyà te Samaria. Umbe mibpeuwitan ni Jehu te surat is menge upisyal zutun te inged, menge ebpemendumala, wey menge peraatur te menge kevuwazan ni Ahab. Iyan heini taǥù te surat:

2 Hadì 10:5

Umbe, is administradur te turuǥan, is gubunedur te inged, is ebpemendumala, wey is menge peraatur te menge kevuwazan te hadì, mibpesuratan dan si Jehu. Ne iyan heini taǥù te surat dan: “Menge suluǥuen key kenikew, ne ebeelan dey is langun he idsuǥù nu kenami. Kenè key ebpilì te selakew en he hadì; beeli nu is mid-isip nu he meupiya.”

Exodus 13:11

“Emun diyè kew en te tanà te menge Canaanhen su ibeǥey en te Nengazen haazà diyà te keniyu sumalà is impenangdù din diyà te menge kepuun niw,

Exodus 13:5

Is tanà te menge Canaanhen, menge Hitihanen, menge Amorihanen, menge Hivihanen wey menge Jebusihanen, iyan kes tanà he impenangdù te Nengazen diyà te menge kepuun niw he ibeǥey zin keniyu, su heini he tanà, ne meupiya wey uuzaran. Ne emun ibpeseled kew en te Nengazen dutun he tanà, tumana niw heini he sulunuzen kayi he vulan te egkehuna he vulan te tuig:

Exodus 33:1

Ne migkeǥiyan en maan te Nengazen si Moises te, “Awè ke en kayi he lugar, ne zumaha nu sikan is menge etew he impeǥawas nu puun te Ehipto, ne hendiyè kew en te tanà he insaad ku he ibeǥey ku ziyà te ki Abraham, ki Isaac wey ki Jacob wey ziyà te menge kevuwazan dan.

Exodus 6:8

Ne ziyè ku sikiyu ed-uwita te tanà he insaad ku he ibeǥey ku ziyà te ki Abraham, ki Isaac, wey ki Jacob. Ibeǥey ku haazà keniyu, ne egkaangken niw en. Iyan a sikan is Nengazen.’ ”

Isaias 40:11

Ed-etimanen din is menge etew zin iring te ked-etiman te ebantey te menge kerehidu: Edsepipiyen din is dezeisey pa he menge kerehidu ne meelima sikandin he egiya zuen te menge telenati.

Isaias 49:15

Iyan, midtavak is Nengazen te, “Egkelipatan be te iney is anak din? Kenè din be egkehizuwan is batà he in-anak din? Minsan egkelipatan din, ne kenè ku mulà sikiyu egkelipatan!

Isaias 49:23

Ebpenilbi kenikew is menge hadì wey menge rayna. Iyan sikandan ed-atur kenikew. Edluhud sikandan is edtahud kenikew, ne ebpesakup dan kenikew. Ne zutun egketuenan nu he iyan a Nengazen, ne is edsarig kediey ne kenà egkepakyas.”

Ezekiel 34:23

Ebeǥayan ku sikandan te sevaha he tig-elima he kevuwazan te suluǥuen ku he si David. Iyan sikandin ed-atur wey egkehimu he ed-elima.

Deuteronomio 1:31

wey ziyà te sibsivayan. Neehè niw ke mibmenumenu kew te ed-elima te Nengazen he Megbevayè niw ziyà te menge hipanew niw kayi te sibsivayan, iring is ked-elimahi zin keniyu te ked-elima te amey te anak din taman te nekeuma kew kayi he lugar.’