Micas 7:11 - Manobo Western Bukidnon OT

¹¹ Migkeǥiyan ni Micas is menge tig-Jerusalem te, “Egkeuma is timpu he ed-umanan niw ebenguna is menge verengbeng niw ne zutun he timpu ne ebmeluag pa is tanà he egkesakup niw.

Micas 7:11 ပူးပေါင်းရင်းမြစ်များ

Nehemias 2:17

Iyan, dutun he timpu, migkaǥi a ziyà te kandan te, “Neehè niw is mekehizuhizu he kebpekesavuk te inged tew. Nevengkag is Jerusalem wey neepur is menge pultahan din. Ed-umanan tew ebenguna is menge verengbeng te Jerusalem su wey kiw kenè en mepeelimungawi.”

Nehemias 2:8

Emun egkehimu beǥayi a zaan te surat he igkeveǥey ku ki Asaf, te ebantey te ketelunan nu, su para veǥayi e zin te menge kayu he egemiten te kebaal te pultahan te melig-en he kutà diyà te avey te valey te Nengazen, wey kebangun te verengbeng te inged, wey para te valey he ed-ubpaan ku.” Intuǥut te hadì haazà is menge hangyù ku su mibpurungan a te Megbevayà.

Nehemias 4:3

Ne migkaǥi zaan si Tobia he Amunihanen he ziyà te avey ni Sanbalat te, “Minsan laku zà is egampan keniyan he verengbeng ne egketempag en!”

Nehemias 4:6

Mibpedayun key he edterebahu taman te nevangun dey en is ketengà te ketikang te verengbeng, su nenigudu medterebahu is menge etew.

Isaias 54:11

“He Jerusalem, he henduen be te migkusukusu te vagyu. Nerasey ka ne wazà midlipey wey midasig kenikew. Piru ed-umanan ku sikew ebenguna he ziyà ibpehitindeg te menge vatu he sepiru, ne egemiten ku is mahalen he menge vatu te kebaal te menge elavat te menge valey nu.

Isaias 54:2

Ipezekelè nu wey lig-eni nu is ubpeey nu. Kenè nu eǥena is kebpekeluaǥa kayi.

Isaias 58:12

Ed-umanan ebenguna te menge kevuwazan niw is menge inged niw he neuǥet en he nevengkag, ne ebpurungan dan is daan en he menge pundasyun. Egngezanan kew he menge etew he memumurung te nerundus he menge verengbeng wey menge valey.

Isaias 61:4

Ed-umanan dan ebenguna is menge inged dan he neuǥet en he nevengkag.

Daniel 9:25

“Kinahanglan he egketuenan nu wey egkesavut nu he puun te timpu te kebmandù ku he ed-umanan ebenguna is Jerusalem taman te kebpekeuma te pengulu he pinilì te Megbevayà, ne edlavey is 49 he tuig. Ne seled te 434 he tuig ed-umanan ebenguna is Jerusalem he zuen din menge pelasa wey pengalang. Ne timpu haazà te kesamuk.