Leviticus 9:3 - Manobo Western Bukidnon OT

³ Ne keǥiyi nu is menge Israilihanen he megkuwa zan te meemahan he kambing he pemuhat he para idlumpiyu. Wey megkuwa zan daan te vaka wey kerehidu he pudu tig senge-tuig pa is keǥurang he wazè din sazir he pemuhat he edtutungen.

Leviticus 9:3 ပူးပေါင်းရင်းမြစ်များ

Genesis 37:31

Midhimatey sikandan te kambing ne midlupit dan te lengesa is bisti ni Jose.

Ezra 6:17

Kayi te kebpehinunguza zuen te valey te Megbevayà nemuhat sikandan te 100 he tudu he vaka, 200 he meǥurang he meemahan he menge kerehidu, wey 400 he meemahan he nati he menge kerehidu. Nemuhat daan sikandan te 12 he meemahan he menge kambing he pemuhat he para idlumpiyu te kada tribu te Israel.

Exodus 12:5

Iyan niw pilia is menge meemahan he uyaǥen niw he senge-tuig pa is keǥurang din wey wazè din sazir, egkehimu ke kerehidu, ne egkehimu zaan emun kambing.

Isaias 53:10

Piru egkasuatan te Nengazen he edresayen wey ibpaantus sikandin. Piru minsan midhimu te Nengazen is untung din he pemuhat para meveyazi is salà te menge etew, egkeehè din ded is menge kevuwazan din wey ebpekaangken ded sikandin te meluǥayad he untung, ne pinaaǥi kandin egketuman is egkesuatan te Nengazen.

Leviticus 10:16

Hein midsusi si Moises mehitenged te kambing he pemuhat he para idlumpiyu, neehè din he pudu en haazà netutung. Umbe utew zin nepeuki si Eleazar wey si Itamar, ne midsumayan din sikandan.

Leviticus 12:6

Emun egkeume en is menge andew te kegkehimuwa kandin he lumpiyu puun te kegkehimuwa kandin he meremerik tenged te ked-anak din te maama etawa bahi, ne med-uwit sikandin diyà te memumuhat diyà te ǥemawan te Tulda he Edtelevukaayan te kerehidu he senge-tuig is keǥurang din he pemuhat he edtutungen, wey sevaha he limuken etawa merapatik he pemuhat he para idlumpiyu.

Leviticus 14:10

Dutun te ikewalu he andew, kinahanglan he med-uwit sikandin te zezuwa he meemahan he kerehidu wey sevaha he vehiyan he kerehidu he senge-tuig is keǥurang he wazè din sazir. Med-uwit daan sikandin te heenem he kilu he meupiya he kelasi he herina he midsehuǥan te lana he pemuhat he para gasa. Wey med-uwit pa sikandin te senge vasu he lana.

Leviticus 16:15

Edlepaan din daan sikan is kambing he pemuhat he para idlumpiyu te menge etew. Ed-uwiten din is lengesa kayi ziyà te Utew Segradu he Lugar ne ibpirik din duen te tambun te Kavan te Kebpekid-uyun, iring duen te mibeelan din duen te lengesa te vaka.

Leviticus 16:5

Mebeǥey kandin te zezuwa he meemahan he menge kambing is keet-etawan te Israel he pemuhat he para idlumpiyu wey sevaha he meemahan he kerehidu he pemuhat he edtutungen.

Leviticus 23:12

Dutun daan he andew, pemuhat kew ziyà te Nengazen te kerehidu he senge-tuig is keǥurang din he wazè din sazir he pemuhat he edtutungen.

Leviticus 4:23

Ne emun egketuenan din en he nekesalè bes sikandin, ne mebpemuhat sikandin te meemahan he kambing he wazè din sazir.

Leviticus 4:3

Emun ebpekesalà is lavew he memumuhat he wazè din tivevaa, ne tenged dutun egkezelahig is menge etew, mebpemuhat sikandin diyà te Nengazen te turiti he vaka he wazè din sazir he pemuhat he para idlumpiyu.

Leviticus 9:2

Migkeǥiyan ni Moises si Aaron te, “Kuwa ka te sevaha he turiti he vaka wey sevaha he meemahan he kerehidu he pudu wazè din sazir, ne ipemuhat nu ziyà te Nengazen. Is baka, pemuhat he para idlumpiyu, ne is kerehidu, pemuhat he edtutungen.

Leviticus 9:4

Megkuwa zaan sikandan te vaka wey meemahan he kerehidu he pemuhat dan para te meupiya he kebpekidepità. Ipemuhat dan heini zuma zuen te pemuhat he para gasa he midsehuǥan te lana, su ǥuntaan he andew ibpaahà te Nengazen is kebpekiduma zin keniyu.”