Leviticus 7:12 - Manobo Western Bukidnon OT

¹² Emun ebpemuhat is etew te pemuhat para te meupiya he kedepità su ebpeselematan din is Nengazen, ne perisi zin heini te supas. Med-uwit sikandin te supas he wazè din tapey iring te supas he mekepal he midsehuǥan te lana, supas he menipis he midezasan te lana, wey supas he iyan mibeelan is meupiya he kelasi te herina he midsehuǥan te lana.

Leviticus 7:12 ပူးပေါင်းရင်းမြစ်များ

2 Cronica 29:31

Ne migkaǥi si Hezekia te, “Ǥuntaan te ingkahalad niw en is keugelingen niw ziyà te Nengazen, uwit kew te menge pemuhat diyà te Baley te Nengazen, ragkes en is menge pemuhat he para te kebpeselamat.” Umbe mid-uwit is menge etew ziyà te valey te Nengazen te menge pemuhat he migkaǥi te hadì, ne is duma, keugelingen dan he suat is kebpemuhat dan te menge pemuhat he edtutungen.

2 Cronica 33:16

Ne zutun mibpepurungan din sikan is pemuhatà he para te Nengazen ne mibpemuhatan heini te menge pemuhat he para te meupiya he kedepità wey menge pemuhat he para te kebpeselamat. Migkeǥiyan din is menge meǥinged diyà te Juda he mebpenilbi zan te Nengazen he Megbevayà te Israel.

Nehemias 12:43

Dutun he andew, nemuhat sikandan te mezakel he menge pemuhat wey midlipeylipey zan, su utew sikandan midlipey te Megbevayà. Ragkes he midlipey is menge vahi wey menge vatà. Umbe is keǥurub te kedlipey zan ne egkezineg pa ziyà te meziyù.

Salmo 107:8

Ereg sikandan he ebpeselamat te Nengazen tenged te ǥaǥew zin wey te egkein-inuwan he menge vaal zin diyà te menge etew.

Salmo 116:17

Ed-ezapen ku sikew ne edhalad a para te kebpeselamat kenikew.

Salmo 50:23

Is ebpemuhat kayi te kedì te kebpeselamat ebeǥey kedì te zengeg, ne edlibriyen ku sikan is ebpekeventayan din he kenà sikandin mekevaal te mezaat.”

Jeremias 33:11

is kedlipey wey keguǥusà. Egkezineg is kebpeeyuwà te beuǥu, wey is kedlipey te ebpemen-uwit te menge pemuhat diyà te valey te Nengazen he para te kebpeselamat. Egkaǥi zan te, ‘Ebpeselamat kiw te Nengazen he Mekeǥeǥehem, su meupiya sikandin. Wazà pidtemanan te ǥaǥew zin.’ Edlipey is menge etew su idlikù ku is meupiya he kebpekesavuk dan kayi he tanà iring te kebpekesavuk dan dengan. Iyan a, is Nengazen, is migkaǥi kayi.”

Hoseas 14:2

Likù kew ziyà te Nengazen ne kaǥi kew ziyà te kandin te, ‘Nengazen, peseyluwa nu is langun he menge salè dey, ne zewata key kenikew tenged te keupiya nu, su wey key mekepemuhat kenikew te menge kedalig he ebpuun te menge vèbè dey.

Leviticus 2:4

Emun duen ebpemuhat te supas he midhilutù diyà te evuwan he pemuhat he para gasa, kinahanglan he iyan egemiten din is kineupiyahan he kelasi te herina he wazà tepayi. Egkehimu he ibpemuhat is mekepal he supas he midsehuǥan te lana etawa menipis he supas he midezasan te lana.

Leviticus 2:5

Emun is ibpemuhat he supas ne ziyà hilutua te mevavew he hilutuey, kinahanglan he iyan egemiten is kineupiyahan he kelasi te herina he edsehuǥan te lana, piru kenà edtepayan.

Leviticus 22:29

Emun ebpemuhaten a keniyu te pemuhat he para kebpeselamat kedì, sunuza niw is hustu he paaǥi te kebpemuhata kayi su para zewata ku heini.

Leviticus 6:16

Is egkesamà he herina, ne edhilutuen ne egkeenen ni Aaron wey te menge memumuhat he menge kevuwazan din. Piru hilutua zan heini he wazè din tapey, ne keena zan diyà te lama te Tulda he Edtelevukaayan, he segradu he lugar. Imbeǥey heini kandan te Nengazen he kandan he vahin duen te menge pemuhat he pinaaǥi te hapuy. Is pemuhat he para gasa utew heini segradu iring te pemuhat he para idlumpiyu wey te pemuhat he vayad te salà.

Leviticus 7:15

Is usa te uyaǥen he pemuhat he para te kebpeselamat diyà te Nengazen, kinahanglan he egkeenen te nemuhat wey te pemilya zin wey te menge memumuhat dutun dà te andew te kebpemuhata kayi; kinahanglan he wazà egkesamà kayi zutun te sunud he andew.

Amos 4:5

Tutung kew te supas he midtepayan he pemuhat niw te kebpeselamat kayi te kedì. Sigi, ipahambug niw heeyan ragkes is menge pemuhat niw he keugelingen he suat is kebpemuhata zuen, su iyan man heeyan egkesuatan niw. Iyan a, is Nengazen he MEGBEVAYÀ, migkaǥi kayi.

Numero 6:15

Ne liyu zutun, mebpemuhat daan sikandin te menge pemuhat he para gasa, pemuhat he inumen, wey senge vaskit he supas he wazè din tapey he iyan ebeelan is meupiya he kelasi te herina. Is duma he supas, ne ebpekekepalen ne edsehuǥan te lana ne is duma pa ebpekenipisen he edezasan te lana.