Leviticus 26:9 - Manobo Western Bukidnon OT

⁹ Ed-eturen ku sikiyu ne ebeǥayan ku te mahabet he menge kevuwazan su wey ku metuman is kebpekid-uyun ku keniyu.

Leviticus 26:9 ပူးပေါင်းရင်းမြစ်များ

Genesis 1:28

Ne midtuvazan sikandan te Megbevayà ne migkeǥiyan din sikandan te, “Mevuwad kew ne mebmehabet kew su wey niw meeneb is kelibutan. Iyan kew mebayàbayà dini te tanà. Iyan kew mebayàbayà te menge isdà diyà te zaǥat wey te menge tagbis he ebpemenlayang diyà te hewhewanan wey te menge linimbag he egeǥehinawa he edhipanew zini te tanà.”

Genesis 17:20

Ne si Ishmael zaan, ebpemineǥen ku is hangyù nu mehitenged kandin. Edtuvazan ku zaan sikandin ne edhimuwen ku he mezakel is menge kevuwazan din. Egkehimu sikandin he amey te 12 he menge pengulu, ne is menge kevuwazan din egkehimu he utew egkevantug he menge etew.

Genesis 26:4

Edhimuwen ku he medmezakel is menge kevuwazan nu iring kezakel te menge vituen diyà te langit, ne ibeǥey ku heini kandan is langun he tanà. Ne pinaaǥi kandan, edtuvazan ku is langun he etew kayi te kelibutan.

Genesis 28:14

Is menge kevuwazan nu egkehimu he iring kezakel te eliyavuk te tanà. Pinaaǥi kenikew wey te menge kevuwazan nu, edtuvazan ku is langun he menge etew kayi te kelibutan.

Genesis 28:3

Berakat he tuvazi ka te Megbevayà he Mekeǥeǥehem, ne veǥayi ke zin te mezakel he kevuwazan, su wey ka mehimu he amey te mezakel he grupu te menge etew.

Genesis 48:4

Ke sikandin te, ‘Ebeǥayan ku sikew te mezakel he menge kevuwazan su wey ka mehimu he amey te mezakel he menge etew. Ne ibeǥey ku heini is tanà te Canaan diyà te menge kevuwazan nu, ne egkehimu heini he kandan te taman te taman.’ ”

Genesis 6:18

Iyan, sikew mulà, edhimuwen ku is utew melig-en he kebpekid-uyun ku kenikew. Ne ibpeseled ku sikew zuen te arka zuma is menge anak nu wey is esawa nu wey is menge ambey nu.

1 Hadì 3:8

Ne ǥuntaan kayi a zuma te pinilì nu he menge etew he kenà egkevilang tenged te kahabet dan.

2 Hadì 13:23

Piru ingkehizu wey ingkeipeng sikandan te Nengazen tenged te midhimu zin he kebpekid-uyun diyà te ki Abraham, ki Isaac, wey ki Jacob. Ne taman en guntaan ne wazè din sikandan dezeeti etawa ipaawà diyà te lugar zan he zutun kenà sikandin ebpekepekiduma kandan.

Nehemias 2:20

Midtavak ku sikandan te, “Ebmelempusen key pinaaǥi te tavang te Megbevayà diyà te langit. Sikami is menge suluǥuen din ebpuunan dey is kebangun te menge verengbeng te Jerusalem. Piru sikiyu, wazè niw lavet wey ketenged kayi te Jerusalem, wey wazè kew meragkes te keguǥuza mehitenged kayi he inged.”

Nehemias 9:23

Impeiring nu te menge vituen diyà te langit is menge kevuwazan te menge Israilihanen su impemahabet nu. Ne mid-uwit nu sikandan diyà te tanà he impenaad nu ziyà te menge kepuun dan he edselezan dan wey ed-engkenen dan.

Salmo 107:38

Midtuvazan sikandan te Megbevayà, ne mibmezakel zan. Minsan is menge uyaǥen dan ne wazè din mehimuwa he medeisey.

Salmo 89:3

Migkaǥi ka te, “Midhimu ku is kebpekid-uyun ku te suluǥuen ku he si David, he mibpilì ku he egkehimu he hadì. Ne iyan heini impesarig ku kandin:

Exodus 1:7

piru meǥaan dà nevuwad is menge kevuwazan dan, ne utew en subra is kahabet dan, umbe nekeeneb en sikandan dutun te tanà te Ehipto he neubpaan dan.

Exodus 2:25

Naahà sikandan te Megbevayà ne nehizuwan din sikandan.

Exodus 6:4

Midhimu ku is kebpekid-uyun ku kandan, he ibeǥey ku kandan is tanà te Canaan he iyan neubpaan dan dutun te kegkelumelengyawè dan.

Isaias 55:3

Uvey kew wey mebpemineg kediey su wey kew meuyag. Ebpekid-uyun a keniyu te wazà pidtemanan. Ibpeehè ku keniyu is gaǥew wey kebmetinumanen ku he insaad ku ki David.

Jeremias 23:3

Iyan a mismu edtiǥum te nesamà he menge etew ku puun diyà te nekedseselekawà he menge lugar he zutun ku sikandan ipeyapat, ne idlikù ku sikandan diyà te tanè dan, ne zutun ebmahabet sikandan utew.

Jeremias 23:4

Ebeǥayan ku sikandan te menge pengulu he ed-atur kandan, ne kenè dan en egkahandek wey egkeheratan, ne wazè en egketazin kandan. Iyan a, is Nengazen, is migkaǥi kayi.”

Jeremias 33:3

“Umawa a kenikew su edtevangan ku sikew. Ne ibpezayag ku ziyà te kenikew is egkengein-inuwan wey in-eles he wazè nu pa metueni.

Ezekiel 16:62

Edlig-enan ku is kebpekid-uyun ku kenikew, ne egketuenan nu he iyan a Nengazen.

Ezekiel 36:9

Pemineg kew! Ed-etimanen ku sikiyu. Ed-ereduwen ku is tanè niw ne ebpemulaan ku.

Deuteronomio 28:11

Edtuvazan kew te Nengazen diyà te tanà he impenaad din diyà te menge kepuun niw he ibeǥey zin keniyu. Ibpemahabet din is menge anak niw, is menge uyaǥen niw, wey is menge abut niw.

Deuteronomio 28:4

Edtuvazan kew zin pinaaǥi te kebeǥeyi zin keniyu te mahabet he menge vatà, uzar, wey mahabet he menge uyaǥen.

Deuteronomio 7:13

Ebmahalen kew zin, edtuvazan kew zin, ne ibpemahabet kew zin. Ebeǥayan kew zin te mahabet he menge anak wey zekelà he sebpet puun te tanè niw: sebpet he trigu, binu, wey lana. Wey ibpemahabet din is menge uyaǥen niw zutun te tanà he impenangdù din he ibeǥey zin diyà te menge kepuun niw wey ziyà te keniyu.