Leviticus 2:2 - Manobo Western Bukidnon OT

² Uwita zin heini ziyà te menge memumuhat he menge kevuwazan ni Aaron. Ne edterinan te memumuhat haazà te sengekemkem he herina he midsehuǥan te lana, wey ragkes is langun he veyewà he insahug kayi he midtarin din, ne edtutungen din diyà te pemuhatà. Edtutungen din heini he paaǥi te kedtentenuzi te Nengazen. Is kehemut kayi he pemuhat te pinaaǥi te hapuy ne ebpekepenunuat te Nengazen.

Leviticus 2:2 ပူးပေါင်းရင်းမြစ်များ

Nehemias 13:14

Ne zutun mid-ampù a, ke siak te, “He Megbevayè ku, tentenuzi a wey kenè nu lipati is menge meupiya he mibeelan ku para te valey nu wey te menge vuluhaten kayi.”

Nehemias 13:22

Ne mibmenduan ku is menge Levihanen he mebpekelumpiyu zan, ne ventayi zan is menge pultahan su para isipa te menge etew he segradu he andew is Andew te Kedhimeley. Ne zutun mid-ampù a, ke siak te, “He Megbevayè ku, is-isipa nu heini is mibeelan ku, ne kehizuwi a kenikew sumalà te kezekelà te gaǥew nu.”

Exodus 30:16

Gemita niw heini he selapì para te ked-etiman duen te Tulda he Edtelevukaayan. Iyan heini lugbak para te untung niw, su wey ku kenà melemlemuwi is ked-ipat keniyu.”

Isaias 66:3

Piru iyan heini paaǥi te kedseǥipaa ku te menge etew he iyan ebpezumdumahan dan is keugelingen dan dà he suat, ne igkelipey zan is utew mezaat he menge vaal zan: Emun edlapà sikandan te vaka he ibpemuhat dan, ne ibpeiring ku haazà te kedhimatey te etew. Emun ebpemuhat sikandan te kerehidu, ibpeiring ku haazà te midhimatey zan te asu. Emun ebpemuhat sikandan te pemuhat he para gasa, ibpeiring ku haazà te mibpelengesa zan te lengesa te vavuy. Ne emun edtutung sikandan te veyewà su edtentenuzan e zan, ibpeiring ku haazà te mibpenubtuvazan dan is duma he menge ed-ezapen.

Leviticus 1:13

Kinahanglan he lùlui zuen te nemuhat is menge vahin he ziyà te seled te ǥetek wey is menge paa kayi. Ne iyan en haazà is memumuhat edtutung dutun te langun diyà te pemuhatà te pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen.

Leviticus 1:17

Baasa zin haazà is tagbis pinaaǥi te keguyud te menge pakpak kayi he kenè din daan ebpitasen. Ne tutunga zin haazà is tagbis diyà te pemuhatà he iyan en pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen!

Leviticus 1:9

Kinahanglan he lùlui duen te nemuhat is menge vahin he ziyà te seled te ǥetek wey is menge paa zuen te vaka. Ne kegkepasad, iyan en is memumuhat edtutung kayi te langun diyà te pemuhatà, iyan heini pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen.

Leviticus 2:16

Edtutungen te memumuhat is duma zuen te ginaling he midsehuǥan te lana, wey is langun he veyewà he insahug duen te ginaling he para te kedtentenuzi te Nengazen. Pemuhat heini pinaaǥi te hapuy para te Nengazen.

Leviticus 2:9

Edterinan heini te memumuhat, ne haazà is tinarin din edtutungen din diyà te pemuhatà he paaǥi te kedtentenuzi te Nengazen. Is kehemut kayi he pemuhat te pinaaǥi te hapuy ne ebpekepenunuat te Nengazen.

Leviticus 24:7

Ne sevuki niw te lunsey he veyewà is avey te kada linya. Haazà is beyewà, iyan egkehimu he pemuhat he para te kedtentenuzi te Nengazen. Edtutungen heini he iyan pemuhat pinaaǥi te hapuy he ilis duen te menge supas.

Leviticus 4:31

Ne kuwaa zin is langun he tavà duen te kambing iring te ebeelan duen te pemuhat he uyaǥen he pemuhat he para te meupiya he kedepità. Ne kegkepasad dutun, tutunga zin is tavà diyà te pemuhatà he mehemut he pemuhat he ebpekepenunuat te Nengazen. Ne pinaaǥi kayi te ebeelan te memumuhat, egkevelukasan is etew puun te menge salè din, ne ebpeseyluwen sikandin te Nengazen.

Leviticus 5:11

Piru emun kenè pa sikandin ebpekevaug te zezuwa he merepatik etawa zezuwa he limuken, ne mebpemuhat dà sikandin te zezuwa he kilu he meupiya he kelasi he herina. Kinahanglan he kenè din heini edsehuǥan te lana wey veyewà su pemuhat heini he idlumpiyu, ne kenà heini pemuhat he para gasa.

Leviticus 5:12

Ne uwita zin heini ziyà te memumuhat ne edtarin dutun is memumuhat te sengekemkem he paaǥi te ketentenuzi te Nengazen. Ne haazà is tinarin din, ne edtutungen din diyà te pemuhatà duma te zuma he menge pemuhat diyà te Nengazen he pinaaǥi te hapuy. Pemuhat heini he para te idlumpiyu.

Leviticus 6:15

Edterinan te memumuhat te sengekemkem heini is pemuhat he herina he zuen duen lana, ne edtutungen din haazà is tinarin din diyà te pemuhatà ragkes is langun he veyewà he insahug dutun te herina. Edtutungen din heini he paaǥi te kedtentenuzi te Nengazen, is kehemut kayi he pemuhat ebpekepenunuat te Nengazen.

Numero 5:18

Ibpehitindeg dutun te memumuhat haazà is bahi ziyà te etuvangan ku, ibpeperuvey te memumuhat haazà is bahi ne ibpetepayà kandin sikan is pemuhat he gasa he para metueni ke nekesalè be sikandin wey ke wazà. Pemuhat heini te esawa zin te kebpengelikuzi zin kandin. Ne kegkepasad dutun, egewazan dutun te memumuhat sikan is midteǥuan te wahig he mepait he ed-uwit te rawak.

Numero 5:26

Egkuwa haazà is memumuhat te sengekemkem dutun te pemuhat he para metueni ke nekesalè be haazà is bahi etawa wazà, ne edtutungen din duen te pemuhatà. Ne kegkepasad dutun human din ibpeinum duen te vahi sikan is wahig.