Leviticus 1:3 - Manobo Western Bukidnon OT

³ Emun baka is ibpemuhat din he iyan pemuhat he edtutungen, kinahanglan he meemahan heini he wazè din sazir, ne ipemuhat din heini ziyà te ǥemawan te Tulda he Edtelevukaayan, su para zewata sikandin te Nengazen.

Leviticus 1:3 ပူးပေါင်းရင်းမြစ်များ

Genesis 22:13

Dutun te nekelilingey si Abraham, ne neehè din is kerehidu he meemahan he nekesanggat is sungey zin diyà te dezeisey he kayu. Ne migkuwa ni Abraham haazà ne impemuhat din he pemuhat he edtutungen ilis te anak din.

Genesis 22:2

Ne migkaǥi zutun is Megbevayà te, “Kuwaa nu is budtung he anak nu he si Isaac he utew nu mibmahal ne hendiyè ka te tanà he Moria. Tekezeg kew zutun te vuvungan he ibpeehè ku kenikew ne ipemuhat nu sikandin kayi te kedì he pemuhat he edtutungen.”

Genesis 22:8

Ne midtavak dutun si Abraham te, “Is Megbevayà, Mama, iyan ebeǥey kenita te nati he kerehidu he egkehimu he ibpemuhat he edtutungen.” Ne midlaus dan en dutun is dezuwa he edhipanew.

Genesis 8:20

Ne mibaal si Noe te pemuhatà para te Nengazen. Ne migkuwa zin dutun te menge langgam is lumpiyu ragkes daan is kada kelasi te menge lumpiyu he tagbis, ne midtutung din heini zutun te pemuhatà he iyan pemuhat para te Nengazen.

2 Cronica 29:32

Is kahabet te menge pemuhat he edtutungen he mid-uwit te menge etew 70 he tudu he menge vaka, 100 he meǥurang en he meemahan he menge kerehidu, wey 200 he nati he meemahan he menge kerehidu.

2 Cronica 35:12

Ne mibahin dan haazà diyà te kada grupu te menge pemilya is menge pemuhat he edtutungen he para ibpemuhat diyà te Nengazen, sumalà te ingkesurat diyà te libru ni Moises. Ne iring ded dutun is mibeelan dan duen te menge vaka.

Salmo 110:3

Dutun te andew te kedtebeka nu te menge kuntada nu, andam is menge etew nu te ked-uǥup kenikew. Is menge vetan-en he menge etew nu edhendiyà te kenikew zutun te segradu he menge vuvungan he henduen be sikandan te menge zehemug emun meselem.

Salmo 40:8

Megbevayè ku, igkelipey ku is kedtuman te egkesuatan nu. Edtipiǥan ku ziyà te ǥehinawa ku is menge kesuǥuan nu.”

Exodus 12:5

Iyan niw pilia is menge meemahan he uyaǥen niw he senge-tuig pa is keǥurang din wey wazè din sazir, egkehimu ke kerehidu, ne egkehimu zaan emun kambing.

Exodus 24:5

Ne midsuǥù din te kebpemuhat is duma zan he vetan-en he menge maama, ne nemuhat sikandan te pemuhat he edtutungen, wey nemuhat daan sikandan te menge tudu he vaka he pemuhat he para te meupiya he kedepità.

Exodus 29:18

Ne tutunga nu haazà duen te pemuhatà su pemuhat haazà he edtutungen para kedì. Is kehemut kayi he pemuhat te pinaaǥi te hapuy ne ebpekepenunuat kedì.

Exodus 29:4

“Dumaha nu si Aaron wey sikan is menge anak din he maama ziyà te idselang pehendiyà te Tulda he Edtelevukaayan, ne ipepemeziǥù nu sikandan.

Exodus 29:42

Iyan heini pemuhat he edtutungen, kinahanglan he andew-andew is ked-ul-ulaha niw kayi he pemuhat taman te sunud he menge lapis te kevuwazan. Ipemuhat niw heini kediey zutun te gemawan te Tulda he Edtelevukaayan, su zutun a ebpekidhinguma keniyu wey ebpekidlalag.

Exodus 32:6

Umbe, hein meselem en, ne mid-enew is menge etew ne nemuhat dan te pemuhat he edtutungen wey pemuhat he para te meupiya he kedepità. Ne mibpemengaan wey mibpemenginum sikandan, ne mibeelan dan is egkesuatan dan te ebaal te kedlipeylipey te kedsimbaha zan dutun te ed-ezapen dan.

Exodus 35:21

Ne is kada sevaha kandan he egkesuat he edhalad, mid-uwit din is idhalad din diyà te Nengazen, he para te ibaal zuen te Tulda he Edtelevukaayan wey te langun he gelemiten kayi, wey is langun he egkinehenglanen para meveeli is menge visti te menge memumuhat.

Exodus 35:29

Is langun he menge Israilihanen, maama wey vahi he egkesuat he ebeǥey, mid-uwit dan te idhalad dan diyà te Nengazen he ebpuun te keputian te atey zan is kebeǥaya zan duen; ne para haazà te langun he ebpeveelan te Nengazen kandan he impekaǥi zin ki Moises.

Exodus 35:5

Halad kew ziyà te Nengazen puun te menge azen niw. Egkehimu he edhalad kew te vulawan, pelata, brunsi,

Exodus 36:3

Ne imbeǥey ni Moises diyà te kandan is langun duen te inhalad te menge Israilihanen he para te kedtukuza zuen te Tulda. Ne kada meselem dutun ed-uwit is menge Israilihanen diyà te ki Moises te idhalad dan.

Exodus 38:1

Mibaal zaan sikandan te kuwedradu he pemuhatà te pemuhat he edtutungen. Iyan migamit dan is kayu he ekasya. Pitu wey tengà he ǥiek is kelayat din ne pitu zaan wey tengà he ǥiek is keluag din, ne heepat wey tengà he ǥiek is ketikang din.

Isaias 1:11

Ke sikandin te, “Wazà bali kayi te kediey te mahabet he menge pemuhat niw. Midsemu ad te menge pemuhat niw he edtutungen menge kerehidu wey menge tavà te menge uyaǥen he impelambù niw. Wazè ku ikelipey is lengesa te menge tudu he vaka, menge kerehidu, wey menge kambing.

Ezekiel 20:40

Su ebpekepenilbi kediey is langun he menge etew te Israel ziyà te segradu he vuvungan ku, he iyan kes metikang he vuvungan diyà te Israel. Dutun edewaten ku sikiyu wey ibpepemuhat ku te nekedseselekawà he menge pemuhat wey te ispisyal he menge gasa.

Ezekiel 40:39

Is kada kilid dutun te varkun duen dutun dezuwa he lemisahan he zutun edlepaa is menge uyaǥen he pemuhat he edtutungen, pemuhat he idlumpiyu, wey pemuhat he vayad te salà.

Leviticus 1:10

Emun kerehidu etawa kambing is ibpemuhat te etew he iyan pemuhat he edtutungen, kinahanglan he meemahan heini he wazè din sazir.

Leviticus 14:10

Dutun te ikewalu he andew, kinahanglan he med-uwit sikandin te zezuwa he meemahan he kerehidu wey sevaha he vehiyan he kerehidu he senge-tuig is keǥurang he wazè din sazir. Med-uwit daan sikandin te heenem he kilu he meupiya he kelasi he herina he midsehuǥan te lana he pemuhat he para gasa. Wey med-uwit pa sikandin te senge vasu he lana.

Leviticus 16:7

Ne egkuwaan din haazà is dezuwa he kambing ne ed-uwiten din daan diyà te etuvangan te Nengazen, diyà te ǥemawan te Tulda he Edtelevukaayan.

Leviticus 17:4

ne kenà diyà te Tulda he Ed-ezapan (egngezanan daan he Tulda he Edtelevukaayan), ne iring ded te nekevunù sikandin te etew, umbe kenè niw sikandin isipa he zuma niw. Midhimu heini he kebpemuhat su para ziyè niw veeli is kebpemuhat te ǥemawan te Tulda ne kenà diyà te zuma he lugar. Umbe is ibpemuhat niw he pemuhat he para gasa iveǥey niw ziyà te memumuhat he iyan ebpemuhat kayi ziyà te Nengazen.

Leviticus 17:8

Timan-i niw heini, sikiyu is menge Israilihanen wey is kenà menge Israilihanen he mid-ubpà duma keniyu: Is minsan hentei he ebpemuhat te minsan hengkey he pemuhat diyà te zuma he lugar

Leviticus 17:9

ne kenà diyà te ǥemawan te tulda, ne kenè niw en isipa he zuma niw.

Leviticus 23:12

Dutun daan he andew, pemuhat kew ziyà te Nengazen te kerehidu he senge-tuig is keǥurang din he wazè din sazir he pemuhat he edtutungen.

Leviticus 23:18

Perisi niw heini te pitu he meemahan he kerehidu, he tig senge-tuig is keǥurang, sevaha he turiti he vaka, wey zezuwa he meemahan he kerehidu, he wazè dan menge sazir. Ipemuhat niw heini he pemuhat he edtutungen duma te pemuhat he para gasa duma zuen te pemuhat he inumen. Is kehemut kayi he pemuhat te pinaaǥi te hapuy ne ebpekepenunuat te Nengazen.

Leviticus 3:1

Emun duen ebpemuhat te vaka he meemahan etawa vehiyan he pemuhat he para te meupiya he kedepità, kinahanglan he iyan din ibpemuhat diyà te etuvangan te Nengazen is wazè din sazir.

Leviticus 4:15

Ne idampà te menge pengulu te menge Israilihanen diyà te ulu zutun te vaka is menge velad dan ne lepaa zan heini ziyà te etuvangan te Nengazen.

Leviticus 4:23

Ne emun egketuenan din en he nekesalè bes sikandin, ne mebpemuhat sikandin te meemahan he kambing he wazè din sazir.

Leviticus 4:3

Emun ebpekesalà is lavew he memumuhat he wazè din tivevaa, ne tenged dutun egkezelahig is menge etew, mebpemuhat sikandin diyà te Nengazen te turiti he vaka he wazè din sazir he pemuhat he para idlumpiyu.

Leviticus 4:32

Emun kerehidu is ibpemuhat te etew para melumpiyuwi sikandin, kinahanglan he vehiyan heini he wazè din sazir.

Leviticus 5:15

Emun ebpekesupak is sevaha he etew tenged te wazè din ikeveǥey is butang he para pezem te Nengazen, minsan wazè din heini tivevaa, kinahanglan he ebpemuhat sikandin te meemahan he kerehidu he wazè din sazir he vayad te salè din. Is bali te kerehidu ibpesikad diyà te keveǥat te pelata ziyà te timbangan he egemiten te menge memumuhat. Heini he pemuhat, ne bayad te salà.

Leviticus 5:18

Kinahanglan he ed-uwit sikandin diyà te memumuhat te meemahan he kerehidu he wazè din sazir, he ibpemuhat din he vayad te salè din. Ne kinahanglan he is bali kayi ibpesikad diyà te keveǥat te pelata ziyà te timbangan he egemiten te menge memumuhat. Ne pinaaǥi te kebpemuhata kayi te memumuhat, egkevelukasan is etew puun te salè he neveelan din he wazà tivevaa, ne ebpeseyluwen sikandin te Nengazen.

Leviticus 6:2

mehitenged te etew he nekerapas te egkesuatan te Nengazen pinaaǥi te kedlimbung te iring din he etew mehitenged te vutang he mibpetipiǥan kandin etawa intaǥak diyà te kandin, etawa kedtakew kayi he vutang, etawa kebpenapì,

Leviticus 6:8

Midsuǥù te Nengazen si Moises he keǥiyi zin si Aaron wey sikan is menge anak din he menge maama, kayi he menge sulunuzen mehitenged te pemuhat he edtutungen: Heini he pemuhat kinahanglan he idtaǥak diyà te pemuhatà taman te egkepawà he kenà ed-ewaan te hapuy haazà is pemuhatà.

Leviticus 7:16

Emun is pemuhat din para te meupiya he kedepità he ibpemuhat din he para te kedtuman te penaad etawa pemuhat he keugelingen din he suat, is usa kayi egkeenen dutun dà he andew te kebpemuhata zuen. Iyan, emun duen pa egkesamà he usa, egkehimu heini he egkeenen dutun te sunud he andew.

Leviticus 8:18

Kegkepasad dutun, impekuwa ni Moises sikan is meemahan he kerehidu he pemuhat he edtutungen. Ne indampà ni Aaron wey te menge anak din is menge velad dan diyà te ulu zuen te kerehidu.

Leviticus 9:2

Migkeǥiyan ni Moises si Aaron te, “Kuwa ka te sevaha he turiti he vaka wey sevaha he meemahan he kerehidu he pudu wazè din sazir, ne ipemuhat nu ziyà te Nengazen. Is baka, pemuhat he para idlumpiyu, ne is kerehidu, pemuhat he edtutungen.

Zacarias 13:7

Migkaǥi is Nengazen he Mekeǥeǥehem te, “Endama is ispada! Himetayi is perevantey ku te menge kerehidu he suluǥuen ku. Himetayi sikandin su wey mekedsusuwey is menge kerehidu, is egkaayuayu he menge etew ku. Ne edsilutan ku sikandan.

Malakias 1:14

Edrewakan ku is limbungan he iyan ibpemuhat din kayi te kedì is selewayen he uyaǥen minsan pa te zuen meupiya he uyaǥen din, he insaad din he ibpemuhat din kayi te kedì. Su utew a lavew he hadì, igkahandek a ziyà te menge nasyun, migkaǥi is Nengazen he Mekeǥeǥehem.”

Numero 15:3

ne pemuhat kew te para kediey te menge ibpemuhat he ebpuun te menge uyaǥen niw. Pemuhat kew te menge pemuhat he edtutungen, menge pemuhat para te kedtuman te menge penaad, menge pemuhat he kineugelingen he suat, etawa menge pemuhat para te kedsilibra te menge pista. Is kehemut kayi te menge pemuhat he pinaaǥi te hapuy ne ebpekepenunuat kedì.

Numero 15:8

“Is ebpemuhat te turiti he vaka he pemuhat he edtutungen etawa pemuhat para te kedtuman te penaad, etawa pemuhat he para te meupiya he kedepità,

Numero 19:2

“Heini pa is sulunuzen he egkesuatan ku he tumana niw: Keǥiyi niw is menge Israilihanen he uwiti kew zan te sevaha he behiyan he vaka he meriǥà he wazè din sazir he wazè pa keenu meǥamit te ked-eradu.

Numero 23:19

Is Megbevayà kenà iring te etew he edtarùtarù; kenà egkahalin is isip din. Duen be nekaǥi zin he ebeelan din he wazè din beeli? Duen be saad din he wazè din tumana?

Numero 23:27

Mid-uman megkaǥi si Balak diyà te ki Balaam te, “Hendini ka, su edumahan ku sikew ziyà te selakew en maan he lugar. Su kela ke zutun he lugar ebpezumezume en is Megbevayà he edrewakan nu is Israel para kedì.”

Numero 23:3

Ne migkaǥi si Balaam diyà te ki Balak te, “Hitindeg ka ziyà te avey te pemuhat nu he edtutungen su egenat a dèpa. Su kela ke mebpekidhingume kedì is Nengazen. Egkeǥiyen ku zà kenikew ke hengkey is egkeǥiyen din kayi te kedì.” Umbe midtekezeg sikandin diyà te mehiǥawan he vuvungan.

Numero 23:30

Ne mibeelan ni Balak is migkaǥi ni Balaam, ne nemuhat sikandin te tigselimbaha he vaka wey kerehidu ziyà te kada pemuhatà.

Numero 28:11

“Diyà te kada egkehuna he andew te vulan ne pemuhat kew ziyà te Nengazen te pemuhat he edtutungen. Is ibpemuhat niw zezuwa he turiti he vaka, sevaha he meǥurang en he meemahan he kerehidu, wey pitu he meemahan he kerehidu he tig senge-tuig is keǥurang dan. Is langun kayi kinahanglan he wazè din sazir.

Numero 28:19

Pemuhata niw is Nengazen te pemuhat he edtutungen he zezuwa he turiti he vaka, sevaha he meǥurang en he meemahan he kerehidu, wey pitu he nati he menge kerehidu he tig senge-tuig is keǥurang dan. Heini is langun kinahanglan he wazè dan sazir.

Numero 28:31

Ipemuhat niw heini zuma zuen te pemuhat he inumen, iuman heini zuen te ibpemuhat niw kada andew he pemuhat he edtutungen wey pemuhat he para gasa. Kinahanglan he haazà he menge uyaǥen wazà duen igkesawey.

Numero 29:13

Pemuhat kew te menge pemuhat he edtutungen he ebpekepenunuat te Nengazen is kehemut din. Diyà te egkehuna he andew iyan heini ipemuhat niw: 13 he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang dan. Ne heini is langun kinahanglan he wazè dan sazir.

Numero 29:2

Dutun he andew, pemuhat kew te pemuhat he edtutungen he ebpekepenunuat te Nengazen is kehemut din. Is ibpemuhat kayi he pemuhat iyan is: sevaha he turiti he vaka, sevaha he meemahan he kerehidu he meǥurang en, pitu he meemahan he nati he menge kerehidu he tig senge-tuig is keǥurang dan. Ne heini is langun kinahanglan he wazè dan sazir.

Deuteronomio 12:27

Ipemuhat niw sikan is usa he pemuhat he edtutungen para te Nengazen he Megbevayè niw. Ne sikan is duma he menge pemuhat niw ne kinahanglan he id-itis niw is lengesa zan duen te pemuhatà para te Nengazen he Megbevayè niw, piru egkehimu ke egkeenen niw haazà is usa.

Deuteronomio 15:21

Piru emun duen sazir zutun he uyaǥen, emun penenglitan piang etawa bulag etawa zuma he sazir, ne kinahanglan he kenè niw heini ipemuhat diyà te Nengazen he Megbevayè niw.

Deuteronomio 17:1

“Kenè niw pemuhata is Nengazen he Megbevayè niw te vaka etawa kerehidu he zuen din sazir, su utew mezaat is ked-isipa zin kayi.