Josue 9:1 - Manobo Western Bukidnon OT

¹ Nezineg te langun he menge hadì diyà dapit te edsenlepan te Jordan is tudtul mehitenged te kebpekezaag te menge Israilihanen. (Iyan heini sikandan menge hadì te menge Hitihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen.) Meǥinged sikandan diyà te menge vuvungan, menge mibuntud-buntud diyà te edsenlepan, wey menge veyvey te Zaǥat he Mediteraneo taman en te Lebanon.

Josue 9:1 ပူးပေါင်းရင်းမြစ်များ

2 Samuel 24:7

Ne midhendiyè dan te vinerengbeng he inged he Tyre wey langun he menge inged te menge Hitihanen wey Canaanhen. Ne te neipus dan dutun, midhendiyè dan te Beersheba, he zapit te zivavà te Juda.

Exodus 23:23

Edhuna ziyà te ibayè niw is belinsuǥuen ku ne edumahan kew zin diyà te tanà te menge Amorihanen, menge Hitihanen, menge Pirisihanen, menge Canaanhen, menge Hivihanen wey menge Jebusihanen, ne iyan a ebpuew kandan.

Exodus 23:31

“Is egketemanan te tanà he ibpaangken ku keniyu ne ebpuun diyà te Zaǥat he Meriǥà pehendiyà te Zaǥat he Mediteraneo, wey ebpuun te disirtu pehendiyà te Wahig he Eufrates. Ebpengelinteuwan ku he mezaag niw is menge etew he ed-ubpà keniyan he tanà su wey niw sikandan mesegseg.

Exodus 3:17

Nenangdù sikandin he ibpeǥawas kew zin puun te menge kemereǥenan he nengeseǥazan niw zini te Ehipto, ne ziyè kew zin ed-uwita te tanà te menge Canaanhen, menge Hitihanen, menge Amorihanen, menge Pirisihanen, menge Hivihanen wey menge Jebusihanen–tanà he egkeerubasa he ebpunan te edtudà he ǥatas wey teneb.’

Exodus 34:11

Tumana nu is menge suǥù he ibeǥey ku kenikew ǥuntaan he andew. Emun edlaus kew en, edsegseǥen ku is menge Amorihanen, menge Canaanhen, menge Hitihanen, menge Pirisihanen, menge Hivihanen wey menge Jebusihanen puun duen te tanà he insaad ku keniyu.

Numero 13:29

Is menge Amalikanhen diyà ed-ubpà te Negev; is menge Hitihanen, menge Jebusihanen, wey is menge Amorihanen diyà ed-ubpà te menge vuvungan; ne is menge Canaanhen diyà ed-ubpà te veyvey te zaǥat wey veyvey te Wahig he Jordan.”

Numero 34:6

“Is dulunà dapit te edsenlepan iyan is Daǥat he Mediteraneo.

Deuteronomio 1:7

ereg kew en he ed-awà kayi. Laus kew ziyà te menge vuvungan he ed-ubpaan te menge Amorihanen ne pehendiyà kew en te Araba, diyà te menge vuvungan, diyà te lugtenaan te mibuntud-buntud diyà te edsenlepan, diyà te Negev, wey ziyà te menge lugar he veyvey te zaǥat. Hendiyè kew en te tanà te menge Canaanhen wey te Lebanon, ne laus kew en diyà te zekelà he wahig he Eufrates.

Deuteronomio 3:25

Ne ke và nu zà ebmehimuwa, ne ituǥut nu kedì is kedlayun te Jordan, para meehè ku is meupiya he tanà, mekempet he menge vuvungan, ragkes en is menge vuvungan te Lebanon.’

Deuteronomio 4:49

ragkes en is tivuuk he Araba he zapit te edsilaan ne taman en te Daǥat he Minatey, he egkeumbawan te Buntud he Pisga.

Deuteronomio 7:1

“Emun ed-uwiten kew en te Nengazen he Megbevayè niw zutun te tanà he edselezan niw su ed-engkenen niw, ibpesegseg din keniyu is menge etew ziyà te pitu he nasyun he edhuna he mahabet wey edhuna he gehemanen kenà sikiyu: is menge Hitihanen, menge Girgasihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen.

Josue 1:15

taman te egkaangken dan en is tanà he egkehimelayan dan he imbeǥey te Nengazen iring te naangken niw en. Ne emun egkeulaula en heini, ne egkehimu en he ebpekehulenè kew te ked-angken te tanà kayi te Jordan he zapit te edsilaan he imbeǥey keniyu ni Moises te suluǥuen te Megbevayà.”

Josue 1:4

Iyan heini egkehimu he tanè niw: ebpuun diyà te sibsivayan is dapit te zivavà pehendiyà te menge vuvungan diyà te Lebanon he zapit te zizaya, wey puun te zekelà he Wahig he Eufrates is dapit te edsilaan, ne taman te Zaǥat he Mediteraneo is diyà dapit te edsenlepan, wey taman te tanà te menge Hitihanen.

Josue 10:23

Umbe, migkuwa zan ne mid-uwit dan diyà te ki Josue sikan is lelima he hadì: hadì diyà te Jerusalem, Hebron, Jarmut, Lakish, wey Eglon.

Josue 11:17

Is lugar he nesakup din, ne ziyà ebpuun te Buntud he Halak petekezeg diyà te Seir taman te Baal Gad he ziyà te Suǥud te Lebanon diyà te lugtenaan te Buntud he Hermon. Midakep din wey mibpenhimetayan din is menge hadì kayi he menge lugar.

Josue 13:5

Elin daan is tanà te menge Gibalnen, wey is tivuuk he Lebanon diyà te edsilaan, puun te Baal Gad diyà te lugtenaan te Buntud he Hermon taman te Lebo Hamat.

Josue 15:12

he iyan daan dulunà kayi he zapit te edsenlepan. Iyan heini nekeliǥuy he zulunà te tanà he mibahin diyà te menge pemilya te tribu ni Juda.

Josue 22:4

Ne ǥuntaan naangken en te zuma niw he menge Israilihanen is kelinew he insaad kandan te Nengazen. Umbe, ulì kew en diyà te keniyu he tanà he ziyè layun te Wahig he Jordan, duen te tanà he imbeǥey keniyu ni Moises he suluǥuen te Nengazen.

Josue 22:7

(Is ketengà he tribu ni Manase ne mibeǥayan ni Moises te tanà diyà te Bashan, ne is ketengà pa ne mibeǥayan ni Josue te tanà diyà te zapit te edsenlepan te Jordan duma te zuma pa he menge tribu). Hein ed-ulì en sikandan mibpenubtuvazan sikandan ni Josue

Josue 23:4

Mibahinbahin ku en keniyu he para egkepengevilin te menge tribu niw is langun he tanà kayi te menge nasyun he naaǥew ku. Heini he tanà puun te Wahig he Jordan diyà dapit te edsilaan pehendiyà te Zaǥat he Mediteraneo diyà te edsenlepan. Elin daan is menge tanà te menge etew ziyà te menge nasyun he wazè tew pa maaǥew.

Josue 24:11

“Ne midlayun kew te Wahig he Jordan ne nekeuma kew ziyà te Jerico. Nekidtebek keniyu is menge tig-Jerico, wey is menge Amorihanen, menge Pirisihanen, menge Canaanhen, menge Hitihanen, menge Girgasihanen, menge Hivihanen, wey menge Jebusihanen. Piru nezaag niw sikandan pinaaǥi kedì.

Josue 3:10

Guntaan egketuenan niw he mibpekiduma keniyu is uuyag he Megbevayà, su emun edsurung kew en ne iyan sikandin edsegseg te menge Canaanhen, menge Hitihanen, menge Hivihanen, menge Pirisihanen, menge Girgasihanen, menge Amorihanen, wey menge Jebusihanen.

Josue 3:17

Midhitindeg diyà te teliwazà dutun te nemezahan he wahig sikan is menge memumuhat he mibinting duen te Kavan te Kebpekid-uyun te Nengazen taman te nekelayun is langun he menge zuma zan.

Josue 5:1

Netudtulan is langun he menge hadì he menge Amorihanen he ziyà te zapit te edsenlepan te Jordan wey is langun he menge hadì he menge Canaanhen he ziyà te veyvey te Mediteraneo ke mibmenumenu te Nengazen is kebpemezahi zin te Wahig he Jordan hein midlayun is menge Israilihanen. Umbe nengahandek sikandan ne naawà is kevurut dan te kebpekidtebek te menge Israilihanen.

Josue 6:27

Mibpekiduma ki Josue is Nengazen, ne nevantug sikandin seled te tivuuk he nasyun.

Josue 9:7

Ne midtavak is menge Israilihanen te, “Kela ke uvayè dey zà sikiyu he menge meǥinged. Umbe kenà egkehimu ke ebpekid-uyun key keniyu.”