Josue 7:7 - Manobo Western Bukidnon OT

⁷ Migkaǥi si Josue te, “He Nengazen he MEGBEVAYÀ, maan is impelayun key pa kenikew te Wahig he Jordan ke ibpezaag key zè bes kenikew te menge Amorihanen? Deyzey pa ke wazè key en med-awà diyà layun te Jordan.

Josue 7:7 ပူးပေါင်းရင်းမြစ်များ

2 Hadì 3:10

Migkaǥi is hadì te Israel te, “Mekehizuhizu kiw is tetelu he hadì! Iyan dà in-uwita te Nengazen kenitew kayi su ibeǥey kiw zin diyà te hadì te Moab.”

Salmo 116:11

Tenged te kegkehandek ku migkaǥi a te, “Wazà iyan etew he egkeseriǥan.”

Exodus 16:3

Ke sikandan te, “Deyzey pa ke ziyè key zà himetayi te Nengazen hein diyè key pa te Ehipto. Diyà, ne ebayèbayè key te minsan hengkey he egkekaan dey. Piru ǥuntaan, mid-uwit key kayi keniyu te sibsivayan wey key mengeumes.”

Exodus 17:3

Piru egkengemezahan utew haazà is menge etew zutun, umbe mibpedayun is kedriklamu zan diyà te ki Moises. Ke sikandan te, “Maan is impeǥawas key pa kenikew ziyà te Ehipto? Ebpematey key zè bes te kegkemezahi kayi duma te menge anak dey wey menge uyaǥen dey.”

Numero 14:16

‘Wazà mekehimu is Nengazen he ed-uwit te menge Israilihanen diyà te tanà he insaad din kandan, umbe mibpenhimetayan din en sikandan diyà te sibsivayan.’ ”

Numero 14:3

Maan is ed-uwiten kiw pa te Nengazen dutun he tanà? Para zè be mebpematey kiw te tebek wey ebihaǥen is menge esawa tew wey menge anak tew? Deyzey pa vuwa ke edlikù kiw ziyà te Ehipto.”

Josue 7:6

Ne tenged te kegkeseeng, si Josue wey is ebpemendumala te Israel, mibindas dan is menge visti zan ne mibukbukan dan te eliyavuk is menge ulu zan, ne taman te mezukilem, midlangkeb dan diyà te etuvangan duen te Kavan te Kebpekid-uyun te Nengazen.

Josue 7:8

He Nengazen, hengkey en be is egkekaǥi ku te mibpeleǥuyan man te menge Israilihanen is menge kuntada zan?

1 Samuel 4:3

Hein nepasad is tebek ne midlikù kes menge Israilihanen he nesamà diyà te kampu zan. Hein nekeuma zan mid-insà is menge pengulu te Israilihanen te, “Maan is mibelagad kiw te Nengazen. Maan is nezaag kiw te menge Filistihanen? Deyzey pa ke egkuwaan tew kes Kavan te Kebpekid-uyun diyà te Shilo para eduma kenitew is Nengazen ne edluwasen kiw zin dutun te menge kuntada tew.”