Josue 7:6 - Manobo Western Bukidnon OT

⁶ Ne tenged te kegkeseeng, si Josue wey is ebpemendumala te Israel, mibindas dan is menge visti zan ne mibukbukan dan te eliyavuk is menge ulu zan, ne taman te mezukilem, midlangkeb dan diyà te etuvangan duen te Kavan te Kebpekid-uyun te Nengazen.

Josue 7:6 ပူးပေါင်းရင်းမြစ်များ

Genesis 37:29

Ne hein midlikuan ni Reuben haazà is budsi ne wazè en dutun si Jose, ne mibindas din is bisti zin su utew neseeng.

Genesis 37:34

Ne mibindas ni Jacob is bisti zin ne mibivisti te saku he tuus te kegkeseeng din. Neuǥet is kedlalew zin te anak din.

2 Samuel 1:11

Dutun mibindas ni David wey te langun he menge sakup din is menge kumbalè dan su ibpeehè dan is kedlalew zan.

2 Samuel 1:12

Nemenineǥew zan wey mibpuasa taman te mezukilem su midruǥur zan ki Saul, wey te anak din he si Jonatan, wey te nasyun he Israel, he menge etew te Nengazen, su utew mezakel kandan is nengepatey te tebek.

2 Samuel 1:2

Iketelu he andew, zuen nekeuma zutun te Ziklag he etew he ebpuun diyà te kampu ni Saul, he nengevindas is kumbalè din, ne nepurung te eliyavuk is ulu zin su ibpeehè din he edlalew sikandin. Midhendiyà sikandin te ki David ne midluhud su edtahud kandin.

2 Samuel 12:16

Midhangyù si David diyà te Megbevayà para zutun te vatà. Midseled sikandin diyà te ruǥu zin ne mibpuasa ne kada mezukilem ne ziyè dà edlipezeng te saag.

2 Samuel 13:19

Iyan mid-ulaula ni Tamar zutun is, mibindas din haazà is meupiya he visti wey melayat, ne mibukbukan din is ulu zin te avu. Ne midhipanew is edsinsineǥew ne mid-elangan din te velad din is dagwey zin.

2 Samuel 13:31

Midhitindeg si David ne mibindas din is kumbalè din su impeehè din he utew sikandin neseeng, ne midlangkeb diyà te tanà. Mibpemindas daan te menge suluǥuen din is menge kumbalè dan ne midhitindeg dan dà mulà.

2 Hadì 22:11

Ne hein nezineg dutun te hadì is ingkesurat duen te Libru te Kesuǥuan, mibindas din is bisti zin tenged te kegkeseeng din.

2 Cronica 34:19

Ne hein nezineg dutun te hadì is ingkesurat diyà te kesuǥuan, mibindas din is kumbalè din he tuus te kegkeseeng din.

Ezra 10:1

Dutun te edluhud si Ezra ziyà te egkesineruwan duen te valey te Megbevayà, wey edsineǥew he ed-ampù wey edtug-an te menge salà te menge Israilihanen, mahabet he menge Israilihanen he menge maama, menge vahi, wey menge vatà is midtiǥum diyà te peliǥuy zin. Heini sikandan kenà daan alang-alang is kedsineǥew zan.

Nehemias 9:1

Hein ike-24 he andew zutun he vulan, midtiǥum is menge Israilihanen su ebpuasa zan. Migkukumbalà sikandan te saku wey mibpen-evuwan dan is ulu zan su ibpeehè dan is kedlalew zan.

Ester 4:1

Ne hein netuenan ni Mordecai is planu kuntra kandan, mibindas din is bisti zin he tuus te kegkeseeng din. Ne mibivisti te saku wey mibpen-evuwan din is ulu zin, ne midhendiyà sikandin te inged is midsineǥew.

Ester 4:3

Ne ziyà te kada prubinsya he neumahan dutun te suǥù te hadì, utew grabi is kedlalew te menge Judio zutun. Mibpuasa zan, nemenineǥew zan, wey nemenlelendag dan. Ne mahabet kandan is nemengukumbalà te saku wey midtelilid diyà te avu.

Job 1:20

Ne hein nezineg haazà ni Job, midhitindeg sikandin ne mibindas din is bisti zin tenged te kegkeseeng din. Ne impekiskisan din is ulu zin ne midlangkeb sikandin diyà te tanà te ked-azap te Nengazen.

Job 2:12

Ne hein nepantew zan sikandin ne hapit dan kenà egkekilala. Midlelendag sikandan wey mibpemindas dan is bisti zan ne mibukbukan dan te eliyavuk is ulu zan su ibpeehè dan is kegkeseeng dan.

Job 42:6

Umbe, ingkeeled ku is langun he mibpengaǥi ku mehitenged kenikew, ne idsendit ku haazà pinaaǥi te kebpinuu ku ziyà te eliyavuk wey avu.”

Penhulùhulù 2:10

Is menge edumala ziyà te Zion nememinuu ziyà te tanà he wazè dan en kekeǥiyen. Mibukbukan dan te eliyavuk is menge ulu zan wey mibivisti sikandan te saku su ibpetuusan dan is kedlalew zan. Ebpekezuzungul te kegkeeled is menge vetan-en he menge vahi ziyà te Jerusalem.

Numero 14:6

Ne si Josue he anak ni Nun wey si Caleb he anak ni Jefune, mibindas dan is bisti zan tenged te kegkeseeng dan. Heini sikandan is dezuwa, miduma te kebpeniid duen te tanà.

Numero 16:22

Piru midluhud si Moises wey si Aaron he ke sikandan te, “He Megbevayà he ebpuunan te untung te langun he menge etew, edelehiǥen nu ve te pauk nu is langun he etew kayi te sevaha zè man is nekesalà?”

Numero 16:45

“Pekeziyù kew keniyan te menge etew su segugunè ku sikandan edèdeeti.” Ne midluhud sikandan is dezuwa.

Josue 7:7

Migkaǥi si Josue te, “He Nengazen he MEGBEVAYÀ, maan is impelayun key pa kenikew te Wahig he Jordan ke ibpezaag key zè bes kenikew te menge Amorihanen? Deyzey pa ke wazè key en med-awà diyà layun te Jordan.

Zatù 11:35

Ne hein naahà sikandin ni Jefta, mibindas din is bisti zin tenged te kegkeseeng din, ne ke sikandin te, “Anak ku, midhimu nu he utew a meseeng! Su nekepenangdù a ziyà te Nengazen he ibpemuhat ku ziyà te kandin is egkehuna he edsinuǥung kedì, ne kenè ku en heini egkevelvelewanan!”

Zatù 20:26

Umbe, mid-uman en maan medtekezeg diyà te Betel is langun he menge Israilihanen ne midsineǥew zan. Neminuu zan, ne mibpuasa zan diyà te etuvangan te Nengazen dutun he andew taman te kebmezukilem. Nemuhat dan te menge pemuhat he edtutungen wey menge pemuhat he para te meupiya he kedepità.

Zatù 21:2

Ne midhendiyà is menge Israilihanen te Betel ne mibpurung dan medsineǥew ziyà te etuvangan te Megbevayà taman te mezukilem.

1 Samuel 4:12

Dutun he andew te tebek, duen sevaha he etew he nekepelaǥuy he sakup te pemilya ni Benjamin ne mibpehendiyà te Shilo. Mibindas din is kumbalè din, ne mibukbukan din is ulu zin te eliyavuk he tuus te utew mesakit is gehinawa zin.