Josue 7:24 - Manobo Western Bukidnon OT

²⁴ Ne zutun mid-uwit ni Josue wey te langun he menge Israilihanen si Acan diyà te Suǥud te Acor, ragkes sikan is pelata, bisti, wey senge verita he vulawan, wey is menge anak din, menge vaka zin, menge asnu zin, menge kerehidu zin, tulda zin, wey is langun he azen din.

Josue 7:24 ပူးပေါင်းရင်းမြစ်များ

Genesis 18:25

Kenà haazà dait he edsilutan nu is menge metazeng duma te menge mekesesalà. Kenà egkehimu he id-iring nu is menge lalung kandan. Iyan ka ebayàbayà te tivuuk kelibutan, kenè be kinahanglan he ebeelan nu ke hengkey is hustu?”

Job 20:15

Iring te keenen he egkeutà, egkeutà te lalung he etew is tinakew zin. Minsan diyè en heini te ǥetek din ne ibpeuta heini kandin te Megbevayà.

Exodus 20:5

Kenè kew mebpenilbi wey med-azap kayi; su siak, is Nengazen, iyan a Megbevayè niw, ne kenà a egkesuat he zuen pa zuma he ed-ezapen niw. Edsilutan ku is menge nekesalà kedì, apil en is menge kevuwazan dan taman te iketelu wey ikeepat he lapis te kevuwazan dan he midselikwey kedì.

Erubasa 15:27

Is etew he leǥezen, egkesemukan is pemilya zin tenged kandin, ne is etew he kenà ebpesipsip, edluǥeyazan te umur.

Megwewali 5:13

Duen pa neehè ku kayi te kelibutan he kenà meupiya: Is ketiǥeyunan te sevaha he etew egkehimu he ebpekezezaat kandin

Isaias 65:10

Edtuvazan ku sikandan is midangep kayi te kediey. Is menge suǥud diyà te Sharon wey Acor egkehimu he penebtavà te menge uyaǥen dan.

Hoseas 2:15

Ne ked-awè dey zutun ne idlikù ku ziyà te kandin is menge pemuleey zin te paras, ne edhimuwen ku is Suǥud he Acor he veyeey he ebpetanudtanud te meupiya he egkeperateng. Edtevaken e zin iring te mibeelan din hein betan-en pa sikandin dutun te kebpuun din diyà te Ehipto.”

Josue 15:7

Ne puun dutun, mibpehendiyà heini te Suǥud te Acor taman te Debir, ne mibulegkù diyà te zizaya pehendiyà te Gilgal he zehipag te Beyeey te Adumim he zivavà he vahin te zal-ug. Pelaus diyà te menge serebseb diyà te En Shemesh, taman te En Rogel.

Josue 22:20

Nelipatan niw en be is mibeelan ni Acan te anak ni Zera? Hein midsupak din is suǥù mehitenged te menge azen he para zà te Nengazen, midsilutan sikandin duma te tivuuk he keet-etawan te Israel. Kenà iyan dà sikandin minatey tenged te salè din.”

Josue 6:18

Kenè kew megkuwa te minsan hengkey he vutang he para edezeetan. Su emun ebeelan niw heini egkezeetan kew, ne iyan kew egkehimu he hinungdan emun duen kezeetan he egkehitavù te Israel.

Josue 6:21

Impurung dan ipemuhat diyà te Nengazen haazà is inged pinaaǥi te kegeraa zan te menge maama wey menge vahi, meǥurang wey vatà, ragkes en is menge vaka, menge kerehidu, wey menge asnu.

Josue 7:1

Piru midrapas iyan te menge Israilihanen is suǥù te Nengazen he kenè dan ibpekuwa te minsan hengkey he impurung en ipemuhat diyà te Nengazen. Su migkuwa si Acan te menge vutang he kenà engayan he egkuwaan, umbe utew nepauk is Nengazen kandan. Heini si Acan anak ni Carmi. Si Carmi anak ni Zabdi. Si Zabdi anak ni Zera. Heini sikandan sakup te tribu ni Juda.

Josue 7:23

Ne mid-uwit dan heini ziyà te ki Josue wey te langun he menge Israilihanen, ne insavuk dan diyà te etuvangan te Nengazen.

Josue 7:26

Ne kegkepasad dutun, midtembuan dan te vatu si Acan. Ne taman en guntaan dutun pa haazà is menge vatu. Ne haazà he lugar migngezanan te Suǥud te Acor taman guntaan. Ne tenged kayi naawà is pauk te Nengazen.