Josue 24:25 - Manobo Western Bukidnon OT

²⁵ Dutun he andew midheǥet ni Josue is kebpepenengdua zin te menge etew ziyà te Shekem, ne imbeǥey zin diyà te kandan is menge kesuǥuan wey menge sulunuzen.

Josue 24:25 ပူးပေါင်းရင်းမြစ်များ

Genesis 35:4

Ne haazà is menge ed-ezapen dan wey menge eritis, imbeǥey zan ki Jacob ne inleveng din diyà te sihung te kayu he ulayan diyà te uvey te Shekem.

2 Hadì 11:17

Ne impehimu ni Jehoyada haazà is hadì wey is menge etew te kebpekid-uyun te Nengazen he menge etew en sikandan te Nengazen. Impehimu zin daan is uyun te hadì wey menge etew.

2 Cronica 15:12

Neuyunan dan he edangep dan diyà te Nengazen, he Megbevayà te menge kepuun dan, te tivuuk he ǥehinawa zan wey kedsavut.

2 Cronica 15:15

Utew nengelipey is langun he tig-Juda su nekevaal zan te kebpenaad he ebpuun te ǥehinawa zan. Ne utew meheǥet is gehinawa zan te kedangep te Nengazen, ne neehè dan is keupiya zin. Ne mibeǥayan din sikandan te kelinew su wazè dan mekepekidtebek te menge kuntada zan diyà te peliǥuy.

2 Cronica 23:16

Ne zutun si Jehoyada, is menge etew, wey is hadì, utew meheǥet is kebpekid-uyun dan he ebpesakup dan te Nengazen.

2 Cronica 29:10

Piru ǥuntaan disididu a he ebpekid-uyun kew te Nengazen he Megbevayà te Israel, su wey maawà is utew zin kegkepeuki kenitew.

Nehemias 9:38

“Ne tenged dutun, midhimu key is menge Judio te sevaha he melig-en he kebpekid-uyun. Insurat haazà ne mibpirmahan te menge pengulu zey, menge memumuhat dey, wey menge Levihanen.”

Exodus 15:25

Ne nengemuyù si Moises diyà te Nengazen, ne zuen riag he impaahà kandin te Nengazen. Intimbag ni Moises haazà dutun te wahig ne mibmeemis haazà is wahig. Ne zutun te Mara migezaman sikandan te Nengazen ne zutun din daan iveǥey is sulunuzen wey suǥù din kandan.

Exodus 24:3

Ne hein nekelikù sikandin diyà te menge etew migkaǥi zin kandan is langun he menge lalag wey menge velaud te Nengazen, ne mibperedredseey sikandan is edtavak te, “Ebeelan dey is minsan hengkey he nekaǥi te Nengazen.”

Deuteronomio 29:1

Iyan heini kedseysaya te kedtumana te kebpekid-uyun he insuǥù te Nengazen diyà te ki Moises he imbeǥey ziyà te menge Israilihanen hein diyè dan te Moab. Ne ebpekeuman heini zuen te kebpekid-uyun din he midhimu zin diyà te kandan hein diyè dan te Horeb.

Josue 24:1

Ne zutun midtiǥum ni Josue is langun he tribu te Israel ziyà te Shekem. Ne mid-umew zin is ebpemendumala, menge pengulu, menge zatù, wey menge upisyal te Israel, ne mid-uvey zan diyà te etuvangan te Megbevayà.

Josue 24:26

Insurat din heini ziyà te Libru te Kesuǥuan te Megbevayà. Ne migkuwa sikandin te zekelà he vatu ne impelastar zin diyà te lempek te kayu he ulayan he uvey te segradu he lugar te Nengazen.