Josue 24:2 - Manobo Western Bukidnon OT

² Migkaǥi si Josue ziyà te langun he menge etew te, “Iyan heini migkaǥi te Nengazen he Megbevayà te Israel: Dengan, menge meǥinged diyà layun te Wahig he Eufrates is menge kepuun niw ne ebpemen-azap dan te zuma he menge ed-ezapen. Is sevaha kandan iyan si Tera is amey ni Abraham wey ki Nahor

Josue 24:2 ပူးပေါင်းရင်းမြစ်များ

Genesis 11:22

Hein 30 en is penuiǥen ni Serug ne nevuwad sikandin ki Nahor.

Genesis 11:24

Hein 29 en is penuiǥen Nahor ne nevuwad sikandin ki Tera.

Genesis 11:26

Hein 70 is penuiǥen ni Tera ne nevuwad sikandin ki Abram, Nahor, wey si Haran.

Genesis 11:27

Iyan heini guǥud mehitenged te pemilya ni Tera. Si Tera, iyan amey eni Abram, si Nahor, wey si Haran. Ne si Haran, ne nevuwad sikandin ki Lot.

Genesis 31:30

Netuenan ku he utew ka ebulunga ziyà te keniyu, umbe egkesuatan nu en he mekeulì ka. Piru maan is midtakew nu is menge ed-ezapen ku?”

Genesis 31:32

Piru emun mehitenged te ed-ezapen nu he netazin, emun egkehè nu heini kayi te minsan hentei kayi te kenami, ne siluti nu sikandin te kemetayen. Kayi te etuvangan te menge kezuzumahi ku he iyan ebpemekepenistiǥus, ahaa nu emun duen egkeehè nu he menge azen nu kayi te kenami, emun duen ne kuwaa nu.” Wazà metueni ni Jacob he si Raquel ves is migkuwa zuen te menge ed-ezapen ni Laban.

Genesis 31:53

Ne ke edsupaken heini te minsan hentei kenita, berakat he siluti sikandin te Megbevayà ni Abraham wey Megbevayà ni Nahor he iyan daan Megbevayà te amey zan.” Ne mibpesarig daan si Jacob ne mibpetistiǥus te Megbevayà he edtehuzen te amey zin he si Isaac.

Genesis 35:4

Ne haazà is menge ed-ezapen dan wey menge eritis, imbeǥey zan ki Jacob ne inleveng din diyà te sihung te kayu he ulayan diyà te uvey te Shekem.

1 Cronica 1:27

wey si Abram (he iyan si Abraham).

Ezekiel 16:3

Keǥiyi nu sikandin he siak, is Nengazen he MEGBEVAYÀ, migkaǥi a ziyà te kandin te, ‘Sevaha ka he Canaanhen! Amorihanen is amey nu, ne Hitihanen is iney nu.

Deuteronomio 26:5

Ne kaǥi kew ziyà te etuvangan te Nengazen he Megbevayè niw te: ‘Is kepuun dey he si Jacob, sevaha he Aramihanen he wazà dengan netendek he ubpeey zin. Midhendiyà sikandin te Ehipto ne mid-ubpà diyà duma te pemilya zin. Deisey zà sikandan dengan, piru te huziyan he timpu mibmahabet sikandan, midekelè dan, ne nehimu zan he mekeǥeǥehem he nasyun.

Josue 24:15

Iyan, emun kenè niw igkelipey is kebpenilbi te Nengazen, pilì kew ǥuntaan he andew ke hentei is edsilbiyan niw. Iyan be is menge ed-ezapen he midsilbiyan te menge kepuun niw ziyà layun te Wahig he Eufrates, etawa iyan is menge ed-ezapen te menge Amorihanen he mid-ubpaan niw ǥuntaan is tanè dan. Piru siak mulà wey is pemilya ku, Nengazen is kenami he edsilbiyan.”