Josue 22:5 - Manobo Western Bukidnon OT

⁵ Piru kenè niw lipati is kedtuman te menge suǥù wey menge penurù he imbeǥey keniyu ni Moises te suluǥuen te Nengazen: Mahala niw is Nengazen he Megbevayè niw, pengungubpaan kew he ed-ikul te menge paaǥi zin, tumana niw is menge suǥù din, pezumazuma kew kandin, wey silbiyi niw sikandin te ebpuun te tivuuk he ǥehinawa niw wey kedsavut niw.”

Josue 22:5 ပူးပေါင်းရင်းမြစ်များ

Salmo 106:3

Utew zeyzey is etew he ebaal te hustu wey metazeng seled te langun he timpu.

Salmo 78:7

Ne pinaaǥi kayi edsarig sikandan te Megbevayà, ne kenè dan egkelipatan is mibpemeelan din ne edtumanen dan is menge suǥù din.

Exodus 15:26

Ke sikandin te, “Emun ebpurungan niw ebpemineǥa is lalag ku te Nengazen he Megbevayè niw, wey emun iyan niw ebeelan is mid-isip ku he hustu, wey emun daan kenè niw ebey-anan is menge sulunuzen wey menge suǥù ku, kekenà, ebpezumdumahan niw, ne kenè ku sikiyu ebpeeǥiyan te minsan hengkey he zaru he impaaǥi ku ziyà te Ehipto, su iyan a is Nengazen ebawì keniyu.”

Exodus 20:6

Piru ibpeehè ku is keupiya ku ziyà te mahabet he lapis te kevuwazan he ebmahal kedì wey edtuman te menge suǥù ku.

Exodus 23:13

Purungi niw tumana heini is langun he migkaǥi ku keniyu. Kenè kew ampù diyà te zuma he menge ed-ezapen, ne kenè niw hisguti is ngazan dan.”

Exodus 23:25

Iyan a keniyu ezapa is Nengazen he Megbevayè niw, ne edtuvazan ku sikiyu te keenen wey wahig. Ne id-awè ku is daru ziyà te keniyu,

Erubasa 4:23

Purungi nu pekeventayi is diyà te isip nu, su ke hengkey is ed-is-isipen nu, iyan daan egkeveelan nu.

Isaias 55:2

Maan is egastu kew te selapì niw te kenà egkekaan? Maan is egestuwen niw is menge suwildu niw te kenà ebpekahantey keniyu? Pemineg kew kediey, ne ebpekekaan kew te metaam he menge keenen ne egkahantey kew.

Jeremias 12:16

Emun ebpurungan dan ed-istudyuwi is menge paaǥi te kebpengungubpaan te menge etew ku ne edheǥeten dan is penangdù dan pinaaǥi te ngazan ku, iring te impenurù dan dengan te menge etew ku he kedheǥeta te penangdù pinaaǥi te ngazan ni Baal, egkehimu zan he kevahin te menge etew ku.

Deuteronomio 10:20

Tehuza niw is Nengazen he Megbevayè niw wey silbiyi niw sikandin. Kenè kew awà diyà te kandin ne ngazan din dà is gemita niw emun ebpenangdù kew.

Deuteronomio 11:1

“Mahala niw is Nengazen he Megbevayè niw ne layun niw tumana is ibpetuman din, menge sulunuzen he imbeǥey zin, wey is menge suǥù din.

Deuteronomio 11:13

“Umbe emun layun niw edtumana is menge suǥù he ibeǥey ku keniyu ǥuntaan, he mahala niw is Nengazen he Megbevayè niw wey silbiyi niw sikandin te ebpuun diyà te tivuuk he ǥehinawa niw wey tivuuk he kedsavut niw,

Deuteronomio 11:22

“Emun ebpurungan niw edtumana heini is langun he ibeǥey ku keniyu he menge suǥù, he ebmahalen niw is Nengazen he Megbevayè niw, wey ebpengungubpaan kew te sungkad te menge paaǥi zin, wey kenè niw sikandin ed-iniyuǥan,

Deuteronomio 13:4

Iyan dà is Nengazen he Megbevayè niw ereg he edsunuzen niw wey edtehuzen. Tumana niw is menge suǥù din wey sunuza niw sikandin; silbiyi niw sikandin wey kenè niw sikandin iniyuǥi.

Deuteronomio 4:29

Piru emun ebpen-ahaan niw zutun is Nengazen he Megbevayè niw, egketuredu niw sikandin emun ebpen-ahaan niw sikandin pinaaǥi te tivuuk he ǥehinawa niw.

Deuteronomio 4:4

Iyan, sikiyu is mepezumdumahan te Nengazen he Megbevayè niw, kemulu kew pa mulà uuyag guntaan.

Deuteronomio 4:6

Purungi niw heini sunuza, su pinaaǥi kayi igkepeehè niw te menge etew ziyà te zuma he menge nasyun is ketau niw wey kedsavut niw. Emun egkezineg dan heini is langun he menge sulunuzen ebpekekaǥi zan te, ‘Tutuu iyan he zuen ketau wey kedsavut te menge etew kayi te gemhanan he nasyun.’

Deuteronomio 4:9

Piru kinahanglan he mebpekevantey kew! Kenè niw lipati is nengeehè niw he mibpemeelan te Nengazen. Kinahanglan he kenà heini egkaawà diyà te gehinawa niw mintras uuyag kew pa. Tudtula niw heini ziyà te menge anak niw wey ziyà te menge apù niw.

Deuteronomio 5:10

Piru ibpeehè ku is keupiya ku ziyà te mahabet he lapis te kevuwazan he ebmahal kedì wey edtuman te menge suǥù ku.

Deuteronomio 6:17

Purungi niw tumana is menge suǥù, menge penurù, wey menge sulunuzen he imbeǥey keniyu te Nengazen he Megbevayè niw.

Josue 23:8

Pezumazuma kew te Nengazen he Megbevayè niw, iring te nehuna he mibeelan niw.

1 Samuel 12:20

Midtavak si Samuel te, “Kenè kew mahandek. Minsan pa te nekevaal kew te kenà meupiya, kenè niw iniyuǥi is Nengazen, kekenà, silbiyi niw sikandin te tivuuk he gehinawa niw.

1 Samuel 12:24

Kinahanglan he tehuza niw utew is Nengazen wey silbiyi niw te hustu pinaaǥi te tivuuk he gehinawa niw. Wey tentenuzi niw is egkein-inuwan he mibeelan din keniyu.

1 Samuel 7:3

Migkeǥiyan sikandan ni Samuel te, “Emun tutuu is kedlikù niw ziyà te Nengazen, itimbag niw heeyan is menge ed-ezapen niw apil heeyan is ledawan ni Ashtoret, ne pevayàbayè kew te Nengazen ne iyan dà sikandin silbiyi niw. Emun ebeelan niw heini ne edluwasen kew zin dutun te menge Filistihanen.”