Josue 22:27 - Manobo Western Bukidnon OT

²⁷ kekenà, para mehimu heini he tuus he ebpetanudtanud kenami, wey keniyu, wey te peleebuten he menge kevuwazan tew he ed-azap key zaan te Nengazen pinaaǥi te kebpemuhat te menge pemuhat he edtutungen, pemuhat he para te meupiya he kedepità, wey zuma pa he menge pemuhat diyà te Tulda he zutun sikandin ed-ezapa. Ne tenged kayi he pemuhatà kenà ebpekekaǥi is menge kevuwazan niw ziyà te menge kevuwazan dey he wazè dan lavet te Nengazen.

Josue 22:27 ပူးပေါင်းရင်းမြစ်များ

Genesis 31:48

Migkaǥi si Laban te, “Heini is intambù he menge vatu, ne iyan ebpenistiǥus te kebpeked-uyun ta te dezuwa.” Iyan heeyan mibpuunan ke maan is migngezanan haazà is intambù he menge vatu te Galeed.

Genesis 31:52

Iyan menge tuus he ebpeketistiǥus is Megbevayà. Tuus heini is intambù wey tuus daan heini is impelastar he vatu te uyun ta he kenà a edlavey kayi te intambù te kebpesipala kenikew, ne sikew zaan, kenè ka edlavey kayi te kebpesipala kedì.

Salmo 16:5

Nengazen, is kegkeengkena ku kenikew iyan en kegkeengkena ku te langun. Ibeǥey nu kediey is langun he kinahanglan ku. Ne ziyà te menge velad nu is untung ku.

Isaias 19:19

Dutun he timpu ebengunen is pemuhatà para te Nengazen diyà te teliwazà te tanà he Ehipto, ne ibpelastar zaan is tedeman he vatu ziyà te dulunà kayi.

Deuteronomio 12:11

Kinahanglan he ed-uwiten niw is menge pemuhat niw ziyà te lugar he ebpilien te Nengazen he Megbevayè niw he zutun sikandin ebeǥayi te zengeg. Iyan heini menge pemuhat wey menge halad he ibpahalad ku keniyu: menge pemuhat he edtutungen wey zuma pa he menge pemuhat, is ikepulù niw, is ispisyal he menge gasa niw, wey is langun he kineupiyahan he menge halad he impenaad niw ziyà te Nengazen.

Josue 22:10

Kebpekeuma zan diyà te Gelilot, he uvey te Wahig he Jordan he nesakup pa te Canaan, mibaal sikandan dutun te zekelà he pemuhatà.

Josue 22:26

Is tutuu, mibeelan dey heini he pemuhatà, kenà para te menge pemuhat he edtutungen wey te zuma pa he menge pemuhat,

Josue 22:28

Su emun egkehitavù he egkeǥiyan is menge kevuwazan dey te iring dutun, ebpekekaǥi sikandan te, ‘Ahaa niw man! Mibaal is menge apù dey te pemuhatà he iring duen te pemuhatà he para te Nengazen, he kenà para te pemuhat he edtutungen wey te zuma pa he menge pemuhat, kekenà, para ebpetanudtanud kenami wey keniyu he sevaha zà he Megbevayà is ed-ezapen tew.’

Josue 22:34

Migngezanan haazà is pemuhatà te menge tribu ni Reuben wey ki Gad te “Tuus,” su ke sikandan te, “Tuus heini para kenitew te langun he is Nengazen Megbevayè tew.”

Josue 24:27

Ne migkeǥiyan ni Josue is langun he menge etew zutun te, “Heini is batu iyan tistiǥus te kebpekidlalag te Nengazen kenitew. Egkehimu heini he tistiǥus kuntra keniyu emun ed-iniyuǥan niw is Megbevayà.”

1 Samuel 7:12

Ne migkuwa si Samuel te vatu ne insavuk din diyà te pid-elangan te Mizpa wey Shen. Migngezanan din heini te Ebenezer su ke sikandin te, “Taman en guntaan is kedtevangi kenitew te Nengazen.”