Josue 2:9 - Manobo Western Bukidnon OT

⁹ ne migkeǥiyan din sikandan te, “Netuenan ku he imbeǥey keniyu te Nengazen heini he tanà ne utew kew ingkahandek te menge etew kayi.

Josue 2:9 ပူးပေါင်းရင်းမြစ်များ

Genesis 35:5

Ne hein migenat en dutun ensi Jacob, mibpengelinteuwan te Megbevayà he mahandek is menge meǥinged te menge siringan dan he inged, umbe wazè dan mezal-as ensi Jacob.

2 Samuel 17:10

Ne minsan is pinekemevurut he sundaru nu, he henduen te mevurut he erimaung, egkahandek. Su netuenan te langun he Israilihanen he is amey nu ne utew nelayam he ebpekidtebek wey mevurut is menge sakup din.

2 Hadì 5:15

Ne zutun midlikù si Naaman duma te menge zuma zin duen te suluǥuen te Megbevayà. Midhitindeg sikandin diyà te etuvangan ni Elisha he ke sikandin te, “Guntaan netuenan ku en he wazè en duma he Megbevayà kayi te tivuuk he kelibutan, kekenà, iyan dà is Megbevayà te Israel. Umbe zewata nu heini is igasa ku kenikew, datù.”

2 Hadì 7:6

Su impezineg te Nengazen is menge sundaru he menge Aramihanen te keǥurub te menge kerwahi, menge kudà, wey mahabet he menge sundaru, umbe kunaan duen te menge Aramihanen ke midsuhulan te hadì te Israel is hadì te menge Hitihanen wey is hadì te menge Ehiptohanen te kedsurung kandan.

Nehemias 6:16

Ne hein nezineg te menge kuntada zey ziyà te peliǥuy he menge nasyun he nepasad en is berengbeng, nahandek dan wey nepeel-elezan dan su nesavut dan he nepasad heini he vaal pinaaǥi te tavang te Megbevayà.

Ester 8:17

Diyà te kada prubinsya wey kada inged he neumahan dutun te suǥù te hadì, mibmelipayen wey midlipeylipey is menge Judio ne mid-andam dan te pista te kedsilibraha kayi. Ne mahabet he menge etew zutun te ginhedian he kenà menge Judio, iyan, nehimu sikandan he menge Judio su egkahandek dan te menge Judio.

Job 19:25

“Piru netuenan ku he is uuyag he Megbevayà iyan edlavan kedì, ne egkeuma is timpu keuzemà te kebpekeuma zin dini te tanà te kedlavan kedì.

Salmo 112:10

Egkaahà heini te menge lalung ne egkekeǥetket is menge ngipen dan te kegkepauk dan, ne henduen be sikandan te egkereney tenged te kegkeeled dan. Kenà edlampus is menge pelanu zan.

Salmo 115:16

Gaked dà te Nengazen is langit piru imbeǥey zin mulà te menusiyà is kelibutan.

Exodus 18:11

Guntaan, netuenan ku en he utew lavew he gemhanan is Nengazen kenà te langun he ed-ezapen, su midlibri zin is menge Israilihanen te kedèdaaǥa kandan te menge Ehiptohanen.”

Exodus 23:27

“Epelihendeken ku wey edliveǥen ku is menge kuntada niw he zutun te egkesineruwan niw ne ebpemekepelaǥuy zan.

Megwewali 8:12

Minsan utew mezakel is salà te etew, egkehimu ǥihapun he edluǥeyazan sikandin te untung. Tutuu iyan he netuenan ku he meupiya is egkehitavù diyà te etew he edtahud te Megbevayà,

Isaias 19:1

Heini he menge lalag ne mehitenged te Ehipto: Pemineg kew! Ed-untud is Nengazen te meǥaan he ǥapun su edhendiyà sikandin te Ehipto. Ne emun ebpekeume en, ne ebpengerkeren te kegkahandek is menge ed-ezapen diyà te Ehipto, ne egkeheratan is menge Ehiptohanen.

Isaias 23:5

Egkeseeng is menge Ehiptohanen emun egkezineg dan is nehitavù diyà te Tyre.

Jeremias 27:5

Pinaaǥi te zekelà he ǥehem ku midlimbag ku is kelibutan, is menge etew, wey is menge langgam, ne iyan a ebayàbayà ke hentei is ibpezumala ku kayi.

Nahum 2:10

Egkezeetan, egkeǥevà, egkevengkag en is Nineve! Umbe egkulbaan en is menge meǥinged kayi; egkerkeren is tivuuk he lawa zan, egkerkeren is menge vuel zan, ne ebmemeluntak sikandan.

Numero 20:14

Hein diyè pa te Kadesh is menge Israilihanen, impehendiyà ni Moises is menge menunudtulè din te hadì diyà te Edom. Iyan heini impetudtul ni Moises kandan, “Heini he lalag ebpuun diyà te menge kezuzumahi nu he menge etew te Israel: Netuenan nu is langun he kemeresayan he neeǥiyan dey.

Numero 20:24

“He Aaron, neume en is timpu he idtampu ke en diyà te menge kezuzumahi nu he nemematey en. Kenè ka ebpekeseled diyà te tanà he ibeǥey ku te menge Israilihanen su midsupak kew ki Moises te suǥù ku hein diyè kew te serebseb te Meriba.

Deuteronomio 11:25

Wazà ebpekeeǥen keniyu. Su iyan impenaad te Nengazen he Megbevayè niw he ebpengelinteuwan din he mahandek keniyu is menge etew ziyà te minsan hendei he egkepeveyaan niw zutun he tanà.

Deuteronomio 2:25

Puun guntaan ebpengelinteuwan ku he mahandek keniyu is menge etew ziyà te langun he menge nasyun kayi te tivuuk he kelibutan. Ebpengerkeren te kegkahandek is ebpekezineg mehitenged keniyu.’

Deuteronomio 28:10

Ne egkesayud is langun he menge etew kayi te kelibutan he mibpengunayan kew pilia te Nengazen, ne igkahandek kew zan.

Deuteronomio 32:8

Su hein mibeǥayan te Levew he Megbevayà is menge nasyun te tanè dan wey hein mibahinbahin din en is menge etew zutun, ne zuen dulunà te uman grupu kandan he insavuk din sumalà is kezakel te menge velinsuǥuen din.

Josue 2:11

Nengahandek key hein nezineg dey haazà ne naawà is kevurut te kada sevaha kenami tenged keniyu. Su is Nengazen he Megbevayè niw iyan Megbevayà diyà te langit wey zini te tanà.

Josue 2:24

Migkaǥi sikandan te, “Tutuu iyan he imbeǥey kenitew te Nengazen is tivuuk he tanà. Is langun he etew zutun ne nengahandek kenitew.”

Josue 2:8

Ne hein wazè pa medhizeǥà haazà is dezuwa he meniniid, nemenahik si Rahab diyà te atep

Josue 5:1

Netudtulan is langun he menge hadì he menge Amorihanen he ziyà te zapit te edsenlepan te Jordan wey is langun he menge hadì he menge Canaanhen he ziyà te veyvey te Mediteraneo ke mibmenumenu te Nengazen is kebpemezahi zin te Wahig he Jordan hein midlayun is menge Israilihanen. Umbe nengahandek sikandan ne naawà is kevurut dan te kebpekidtebek te menge Israilihanen.

Josue 6:2

Migkaǥi is Nengazen diyà te ki Josue te, “Ibpesakup ku keniyu is Jerico ragkes is hadì kayi wey menge sundaru.

Josue 9:10

wey is langun he mibeelan din duen te zezuwa he Amorihanen he hadì he ziyà dapit te edsilaan he iyan si Hadì Sihon he hadì te Heshbon, wey si Hadì Og he hadì te Bashan he ed-ubpà diyà te Ashtarot.

Josue 9:24

Ne midtavak dan si Josue te, “Mibeelan dey heini tenged te nahandek key he kela ke penhimetayi key keniyu. Su netuenan dey he midsuǥù te Nengazen he Megbevayè nu si Moises he suluǥuen din he ibeǥey ziyà te keniyu heini he menge tanà ne egeraan is langun he meǥinged kayi.

Josue 9:9

Ne midtavak dan te, “Diyè key ebpuun te utew meziyù he lugar. Midhendini key su nekezineg key mehitenged te Nengazen he Megbevayè niw. Netudtulan key te langun he mibeelan din diyà te Ehipto,

Zatù 7:14

Midtavak is sevaha te, “Wazè en duma he ibpesavut keniyan, kekenà, iyan is ispada ni Gideon te Israilihanen he anak ni Joash. Ibpezaag kandin te Megbevayà is menge Midianhen, wey sikitew en is langun.”