Josue 14:12 - Manobo Western Bukidnon OT

¹² Umbe, iveǥey nu kediey is menge vuvungan he insaad kediey te Nengazen. Iyan ka mismu nekezineg dengan he iyan menge meǥinged kayi is menge kevuwazan ni Anak ne melig-en is menge inged dan he miberengbeng. Piru pinaaǥi te tavang te Nengazen edsegseǥen ku sikandan keniyan he tanà su iyan heeyan insaad din kediey.”

Josue 14:12 ပူးပေါင်းရင်းမြစ်များ

2 Hadì 19:4

Midsuǥù te hadì te Asiria is peremandar te menge sundaru zin te ked-undaunda te uuyag he Megbevayà. Kela ke seǥipaa te Nengazen he Megbevayè nu is mibpengaǥi zuen te peremandar te menge sundaru ne edsilutan sikandin tenged dutun, umbe pengemuyù ka para kenitew te nengesamà.’ ”

2 Cronica 14:11

Ne nengemuyù si Asa ziyà te Nengazen he Megbevayè din, “He Nengazen, wazè en minsan hentei he ebpeketavang te menge etew he wazè din igkesukul te menge gemhanan kekenà sikew zà. He Nengazen he Megbevayè dey, tevangi key su midsarig key kenikew, wey pinaaǥi te ngazan nu ne midhendini key te kedsukul kayi te utew mezakel he menge sundaru. He Nengazen, iyan ka Megbevayè dey; kenè nu ituǥut he mekezaag is etew he ebpekigkuntada kenikew.”

Salmo 44:3

Piru iyan tutuu is, kenà pinaaǥi te ǥumaan wey ketau te kebpekidtebek is ingkeengkena te menge kepuun dey kayi he tanà, kekenà, tenged te ǥehem nu, ebilidad nu, wey hizu nu kandan tenged te kebmahala nu kandan.

Salmo 60:12

He Megbevayà, ebpekezaag key pinaaǥi te tavang nu, su iyan ka ebpekezaag te menge kuntada.

Numero 13:28

Piru mekeǥeǥehem is menge etew he ed-ubpà duen, ne utew zezekelà is menge inged dan he nengeliǥuy te verengbeng. Neehè dey pa ganì is menge kevuwazan ni Anak.

Numero 13:33

Duen dey pe man ganì naahà he menge eregasi he menge kevuwazan ni Anak. Henduen dà te menge pelaǥà is ked-isipa zey te keugelingen dey emun idhindeg kandan, ne iyan daan heeyan ked-isipa zan kenami.”

Numero 21:34

Migkaǥi is Nengazen diyà te ki Moises te, “Kenè nu kehendeki si Og su ibeǥey ku sikandin kenikew, ragkes is tivuuk he gin-etawan din wey menge tanè din. Beeli nu ziyà te kandin is mibeelan nu ziyà te ki Sihon te hadì te menge Amorihanen, he midhadì diyà te Heshbon.”

Deuteronomio 1:28

Ebmenumenu kiw te kedlaus? Hein mibpelihandek kiw zuen te nemeniid duen te tanà. Migkaǥi sikandan he is menge etew ziyà memezesen wey memelangkew pa kenitew, ne dezekelà is menge inged dan he nengeliǥuy te verengbeng he henduen be te ebpekeume en diyà te langit is ketikang din. Ne neehè dan pa zutun is menge kevuwazan te eregasi he si Anak.’

Deuteronomio 9:1

“Pemineg kew is menge etew te Israel. Guntaan edlayun kew en te Wahig he Jordan su para maangken niw en is menge nasyun he edhuna he dezekelà wey menge mekeǥeǥehem kenà keniyu. Dezekelà is menge inged dan ne memetikang is berengbeng duen su henduen be te ebpekesungkul en diyà te langit.

Deuteronomio 9:3

Piru ǥuntaan egkeehè niw he iyan is Nengazen he Megbevayè niw edhuna edlayun he iring te hapuy he ebpekeepur te menge kuntada. Edaaǥen din sikandan su para melemu zà is kedsegseǥa niw wey kedezeeti niw kandan su iyan heini impenaad te Nengazen keniyu.

Josue 15:14

Midsegseg ni Caleb puun dutun he tanà is tetelu he kevuwazan ni Anak he iyan is menge pemilya ni Sheshai, ki Ahinam, wey ki Talmai.

Zatù 1:20

Ne ǥeina te iyan insaad ni Moises, imbeǥey ki Caleb is Hebron. Midsegseg ni Caleb is tetelu he pemilya he menge meǥinged kayi he lugar he menge kevuwazan ni Anak.

1 Samuel 14:6

Migkeǥiyan ni Jonatan kes tig-uwit te ǥumaan din te, “Hengkayi ke en, ebeyaan ta is kampu te menge etew he wazà mekekilala te Megbevayà. Kela ke edtevangan ki te Nengazen, su wazà ebpekevelavag kandin emun edhimuwen din he mekezaag is etew, mezakel man wey ke deisey.”