Josue 13:14 - Manobo Western Bukidnon OT

¹⁴ Wazà beǥayi ni Moises is tribu ni Levi te tanà he egkepengevilin dan. Kekenà, iyan egkezawat dan is bahin te menge pemuhat pinaaǥi te hapuy he ibpemuhat diyà te Nengazen he Megbevayà te Israel, sumalà is migkaǥi zin diyà te ki Moises.

Josue 13:14 ပူးပေါင်းရင်းမြစ်များ

Ezekiel 44:28

Mibpedayun megkaǥi is Nengazen te, “Wazà tanà he egkepengevilin te menge memumuhat te Israel, su iyan a mismu ebeǥey te menge kinahanglan dan.

Ezekiel 44:29

Is keenen dan ne ziyà ebpuun te menge pemuhat he para gasa, menge pemuhat he para idlumpiyu, wey menge pemuhat he vayad te salà. Ne is menge azen he mibpeveyveyaan en kedì ne egkehimu zaan he kandan.

Deuteronomio 10:9

Iyan heini hinungdan ke maan is wazà mulà tanà he impepengevilin te menge kevuwazan ni Levi he nezawat mulà te zuma zan he menge Israilihanen. Iyan mismu kandan he kevilin is Nengazen sumalà is migkaǥi te Nengazen he Megbevayè niw.

Deuteronomio 12:12

Ne medlipey kew zutun diyà te etuvangan te Nengazen he Megbevayè niw, duma te menge anak niw, menge suluǥuen niw, wey is menge Levihanen he wazà mekepengevilin te tanà he ebpen-ubpà diyà te inged niw.

Deuteronomio 12:19

Kenè niw limbe pesegdana is menge Levihanen mintras kemulu kew pa ed-ubpà diyà te tanè niw.

Josue 13:13

Piru wazà mesegseg te menge Israilihanen is menge Gisurhanen wey is menge Maakatnen. Heini he menge etew nengungubpaan gihapun duma te menge Israilihanen taman en guntaan.

Josue 13:15

Iyan heini kevahin te tanà te Israel he imbahin ni Moises diyà te tribu ni Reuben, he mibahin diyà te kada pemilya zan:

Josue 13:33

Iyan, wazà mulà beǥayi ni Moises te tanà he egkepengevilin dan is tribu ni Levi su iyan kandan he kevilin is Nengazen, he Megbevayà ni Israel, sumalà is migkaǥi zin kandan.

Josue 18:7

Piru kenè mulà ebehinan te tanà is menge Levihanen su iyan kandan he vahin is kebpenilbi te Nengazen pinaaǥi te kegkememumuhat dan. Is menge tribu ni Gad, ni Reuben, wey ketengà he tribu ni Manase nekezawat en te kandan he vahin diyà te tanà he zapit te edsilaan te Jordan, he imbeǥey kandan ni Moises te suluǥuen te Nengazen.”