Joel 3:2 - Manobo Western Bukidnon OT

² edtiǥumen ku is menge etew ziyà te menge nasyun ne ibpetupang ku sikandan diyà te Suǥud ni Jehoshafat. Dutun edhukuman ku sikandan tenged te mibeelan dan diyà te menge Israilihanen, kes menge etew he ǥaked ku. Impeyapat dan diyà te zuma he menge nasyun is menge etew ku, ne mibahin dan is tanè ku.

Joel 3:2 ပူးပေါင်းရင်းမြစ်များ

2 Cronica 20:26

Hein ikeepat en he andew ne midtiǥum sikandan diyà te Suǥud te Beraca ne midalig dan dutun is Nengazen. Umbe egngezanan heini te Suǥud te Bereca taman guntaan.

Isaias 66:16

Su edsilutan din pinaaǥi te hapuy wey ispada zin, is langun he mekesesalà he menge etew, ne mahabet is egkepatey zin.

Isaias 66:18

Netuenan ku is menge ulaula zan wey isip dan. Umbe edhendiyan a ne edtiǥumen ku is menge etew ziyà te langun he menge nasyun, ne egkeehè dan is gehem ku.

Jeremias 12:14

Migkaǥi pa is Nengazen te, “Iyan heini ebeelan ku ziyà te langun he mezaat he meǥinged diyà te menge nasyun he nekeelingkus te Israel, he midezaat te tanà he imbeǥey ku te menge etew ku para mepengevilin dan: Ebpepeleǥuyan ku kandan is tanè dan, iring te kebpepeleǥuwi ku te menge tig-Juda te tanà te mibihag kandan.

Jeremias 25:31

Is laǥeng din egkezineg kayi te tivuuk he kelibutan, su ed-ekusaran din is menge nasyun. Edhukuman din is langun he menge etew, wey edsintinsyahan din pinaaǥi te tebek is menge lalung.’ ”

Jeremias 49:1

Iyan heini migkaǥi te Nengazen he mehitenged te menge Amunihanen: “Sikiyu is menge etew he ed-azap te ed-ezapen he si Molec, maan is mid-ubpaan niw is menge inged diyà te tanà ni Gad? Wazè be menge kevuwazan ni Israel he nekepengevilin kayi he tanà?

Jeremias 50:17

“Is menge Israilihanen neiring te netazin he menge kerehidu he midal-as te menge erimaung. Hein aney, migkaan sikandan te hadì te Asiria, ne mid-ul-ulan is menge tulan dan te Babilonia.

Ezekiel 25:8

Migkaǥi is Nengazen he MEGBEVAYÀ te, “Is Moab he migngezanan daan te Seir, egkaǥi is menge meǥinged duen te iring dà daan is Juda te zuma he menge nasyun.

Ezekiel 34:6

Netazintazin is menge kerehidu ku ziyà te menge vuntud wey menge vuvungan. Nekepeyapat sikandan kayi te tivuuk he kelibutan, ne wazè en iyan nen-ahà kandan.

Ezekiel 35:10

“Migkaǥi kew he egkaangken niw is Juda wey Israel, ne ed-engkenen niw heini minsan siak, is Nengazen, ebpekiduma kandan.

Ezekiel 36:1

Migkaǥi is Nengazen te, “Sikew is etew, keǥiyi nu is menge vuvungan te Israel te, ‘He menge vuvungan te Israel, pemineǥa nu is menge lalag te Nengazen.

Ezekiel 38:22

Edsilutan ku sikew wey is menge sundaru nu, wey is menge zuma nu he ebpemuun diyà te zuma he menge nasyun. Edsilutan ku sikiyu pinaaǥi te zaru wey ebpeun-unayè kew ebpehimhimetayà. Ibpetanè ku is mereǥes he uzan, wey ibpeuzan ku te ǥiyew he henduen be te menge vatu, wey egkeregreg he esupri.

Ezekiel 39:11

“ ‘Dutun he timpu idleveng ku ziyà te Israel si Gog wey is mahabet he menge etew zin; idleveng ku ziyà te Suǥud te Ebiyahi, diyà te edsilaan he uvey te Daǥat he Minatey. Ne kenè en haazà igkevayà su ebpekaalang haazà is dekelà he penlevengà te ebiyahi. Ne egngezanan en heini te Hamon Gog, he ke và dà egkegiya kes, “Suǥud-suǥud te Mahabet he menge Etew ni Gog.”

Joel 3:12

Migkaǥi is Nengazen te, “Kinahanglan he egkehinggat is menge etew ziyà te peliǥuy he menge nasyun te kedhendiyà te Suǥud ni Jehoshafat, su edhukuman ku sikandan dutun.

Joel 3:14

Utew mahabet is menge etew he eguǥurub diyà te Suǥud te Kedhukum, su hapit en egkeuma is andew te kedsilut te Nengazen.

Amos 1:11

Iyan heini migkaǥi te Nengazen mehitenged te Edom: “Tenged te kedtulung kebaal te salà te menge tig-Edom, edsilutan ku sikandan. Su mibpendal-as dan is menge kezuzumahi zan he menge Israilihanen ne wazè dan en mehizuwi te ebpenhimatey. Is menge Israilihanen, kenè egkaawà is pauk kandan te menge tig Edom.

Micas 4:12

Piru heini he menge etew ziyà te menge nasyun, wazè dan metueni is isip ku. Wazè dan mesavut is pelanu ku, he midtiǥum ku sikandan su wey ku mesiluti iring te menge pungu he edtiǥumen su egunasen.

Zefanias 3:8

“ ‘Umbe, sikiyu is menge metinumanen he menge tig-Jerusalem, teǥazi niw zà is kebpeheyaǥa ku te salà te menge nasyun. Su midisisyun ad he edtiǥumen ku is menge etew ziyà te menge nasyun wey menge ginhedian su wey ku ikepeǥezami kandan is utew ku kegkepauk he iring te hapuy he ebpekeepur te tivuuk he kelibutan.