Joel 2:26 - Manobo Western Bukidnon OT

²⁶ Ne ǥuntaan edekelè en is keenen niw ne egkengehantey kew. Ne tenged kayi, edeliǥen a keniyu is Megbevayè niw, he mibaal te egkein-inuwan he menge vaal diyà te keniyu. Ne kenè kew en egkepeel-elezan is menge etew ku minsan keenu.

Joel 2:26 ပူးပေါင်းရင်းမြစ်များ

Genesis 33:11

dewata nu en is ibeǥey ku kenikew su nehizuwan a te Megbevayà ne wazà a mekurangi te menge penginehenglanen ku.” Midteǥel ni Jacob si Esau taman te nezawat en nasì ni Esau haazà is igasa zin.

Nehemias 9:25

Mid-aǥew te menge etew nu is binerengbeng he menge inged wey is selebpeten he menge tanà. Mid-aǥew zan daan is menge valey he nezengkuuran te meupiya he menge azen, menge teheb, menge pemuleey te paras, menge pemuleey te ulibu, wey zuma pa he ebpemeǥas he menge kayu he utew mahabet. Migkaan sikandan ne nahantey zan ne mibmeupiya is lawa zan. Nelipey sikandan tenged te utew nu kebpurungi kandan.

Salmo 103:5

Kayi te kebpengungubpaan ku, mahabet is menge keupiyaanan he imbeǥey zin kedì, ne mezesen a iring te vanug su henduen be te kenà egkaawà kayi te kedì is kengunguhezi.

Salmo 116:7

Ereg a he kenà egkeǥiyaǥiya, su utew a ebpurungi te Nengazen,

Salmo 13:6

Egkentahan ku sikew, Nengazen, su puun pa zengan mibpurungan a kenikew.

Salmo 22:26

Egkaan is menge egkaayuayu ne egkahantey sikandan. Is menge etew he midangep diyà te kenikew ne edalig kenikew. Berakat he mebmeupiya wey mebmeluǥayad is untung dan.

Salmo 37:19

Ne minsan timpu te vangkit kenà sikandan egkemenu, ne minsan timpu te vitil ne zekelà is keenen dan.

Salmo 67:5

Berakat he edeliǥen ka te langun he menge etew, Megbevayè ku.

Salmo 72:18

Mezait he edeliǥen is Nengazen he Megbevayà, kes Megbevayà te Israel, he iyan dà ebpekehimu keniyan he menge egkengein-inuwan.

Erubasa 13:25

Kenà ebitilen is menge metazeng, iyan, ebitilen mulà is kenà menge metazeng.

Solomon 5:1

Midseled a ziyà te pemuleey ku, pelanggè ku he minahal. Mid-amur-amur ku is mira ku wey menge pehemut ku. Migkaan a te teneb ku wey mid-inum a te vinu ku wey ǥatas ku. Sikiyu is mibminahalà, megkaan kew wey med-inum.

Isaias 25:1

Nengazen, iyan ka Megbevayè ku! Edalig a wey ebeǥey te zengeg kenikew su utew egkein-inuwi is menge mibpemeelan nu. Midtuman nu is menge pelanu nu he midhimu nu zengan te nehuna he timpu.

Isaias 29:22

Umbe is Nengazen, is Megbevayà he midlibri ki Abraham, migkaǥi mehitenged te menge kevuwazan ni Jacob, ke sikandin te, “Puun guntaan, wazè en ereg he igkeeled dan wey wazè dan en igkahandek.

Isaias 45:17

Piru edlibriyen nu mulà, Nengazen, is Israel, ne wazà pidtemanan te kelibriyanan dan. Kenè en sikandan egkepeel-elezan taman te taman.

Isaias 49:23

Ebpenilbi kenikew is menge hadì wey menge rayna. Iyan sikandan ed-atur kenikew. Edluhud sikandan is edtahud kenikew, ne ebpesakup dan kenikew. Ne zutun egketuenan nu he iyan a Nengazen, ne is edsarig kediey ne kenà egkepakyas.”

Isaias 54:4

Kenè ka mahandek su kenè ka egkepeel-elezan. Egkelipatan nu is kegkeeled-eled nu hein betan-en ke pa wey is kegkevalu nu.

Isaias 55:2

Maan is egastu kew te selapì niw te kenà egkekaan? Maan is egestuwen niw is menge suwildu niw te kenà ebpekahantey keniyu? Pemineg kew kediey, ne ebpekekaan kew te metaam he menge keenen ne egkahantey kew.

Leviticus 26:26

Egkurang is keenen niw, umbe sevaha zà he evuwan is egemiten te sepulù he vahi te kedlutù te supas, ne ebevehinen dan pa heini para keniyu. Uya, ebpekekaan kew piru kenè kew egkahantey.

Leviticus 26:5

Egkehimu he utew zekelà is sebpet niw ne minsan is timpu te kegunas niw te menge pungu ebpekeuma pa taman te kebpenrupù te beǥas te menge paras, ne is timpu te kebpenrupù niw te beǥas te paras ebpekeuma pa te timpu te kebpemula niw. Umbe ebpekevayèbayè kew te kegkaan niw ne ebpekepengungubpaan kew pa he melinawen diyà te lugar niw.

Micas 6:14

Benar he ebpekekaan kew, piru kenè kew egkahantey; layun kew ǥihapun egkevitil. Ederengdeng kew te menge abut niw, piru kenè niw heini egkepulusan, su ibpekuwa ku heini te menge kuntada niw emun timpu te tebek.

Zefanias 3:11

“ ‘Dutun te andew te kedsilut ku, sikiyu is menge tig-Jerusalem kenè kew egkepeel-elezan tenged te langun he salà he mibeelan niw kayi te kedì. Su id-awè ku ziyà te keniyu is menge etew he menge teruen wey mepelevawen. Ne kenè kew en ed-uman ebpehambug diyà te segradu he vuntud ku.

Zacarias 9:15

Ebpengelangan te Nengazen he Mekeǥeǥehem is menge etew zin. Bà dan dà edtekutaki is menge vatu he idlempawes kandan te menge kuntada zan. Egkaan dan wey ed-inum dan te kedsilibra te kezeeǥan dan. Ed-ugyab sikandan he henduen be te egkengelangut. Egkepenù is getek dan te inumen iring te yehung he egkepenù te lengesa he ibpirik diyà te purù te menge suyuk te pemuhata.

Deuteronomio 11:15

Ebeǥayan din te penebtavà is menge uyaǥen niw, ne sikiyu zaan, dekelà is keenen niw.

Deuteronomio 12:12

Ne medlipey kew zutun diyà te etuvangan te Nengazen he Megbevayè niw, duma te menge anak niw, menge suluǥuen niw, wey is menge Levihanen he wazà mekepengevilin te tanà he ebpen-ubpà diyà te inged niw.

Deuteronomio 12:18

Diyè niw zà heini keena te etuvangan te Nengazen he Megbevayè niw duma te menge anak niw, menge suluǥuen niw, wey menge Levihanen he ebpen-ubpà diyà te inged niw te lugar he ebpilien din. Lipey kew ziyà te etuvangan te Nengazen he Megbevayè niw pinaaǥi te langun he ed-ul-ulahan niw.

Deuteronomio 12:7

Ne ziyè kew egkaan te etuvangan te Nengazen he Megbevayè niw duma is menge pemilya niw, ne igkelipey niw is langun he nepasad niw su midtuvazan kew te Nengazen.

Deuteronomio 8:10

Emun ebpekekaan kew en te minsan hengkey he egkesuatan niw, ne zeliǥa niw is Nengazen he Megbevayè niw tenged te kebeǥayi zin keniyu te utew meupiya he tanà.