Joel 2:12 - Manobo Western Bukidnon OT

¹² Migkaǥi is Nengazen he timpu en heini te kedlikù niw ziyà te kandin te kedlikù he meheǥet diyà te gehinawa niw, he egkezumahan te kebpuasa wey kedlalew duma is kedsineǥew.

Joel 2:12 ပူးပေါင်းရင်းမြစ်များ

2 Samuel 24:10

Ne mibmezaat is gehinawa ni David hein nepasad is kedsinsusa zin te menge etew. Ne migkeǥiyan din is Nengazen te, “Nekesalà a kayi te mibeelan ku. Umbe ebpehizuhizu a kenikew, Nengazen, he peseyluwa a kenikew is suluǥuen nu te salè ku, su kelelalung is mibeelan ku.”

2 Cronica 30:6

Tenged te mandù te hadì, midhipanew te menge menunudtulà is tivuuk he Israel wey Juda he uwiten dan is menge surat he ebpuun te hadì wey ziyà te menge upisyal zin. Iyan heini egkeǥiyen dutun te surat: “Menge etew te Israel, guntaan te nelibri kew en puun te gehem te menge hadì te Asiria, iyan en guntaan timpu he edlikù kew ziyà te Nengazen, he Megbevayà te menge kepuun niw he si Abraham, si Isaac, wey si Jacob, su wey kew zin daan likui.

2 Cronica 6:27

ne pemineǥa nu sikandan diyan te langit. Peseyluwa nu sikandan is menge suluǥuen nu he menge etew nu he Israilihanen. Penurua nu sikandan te metazeng he kebpengungubpaan, ne peuzani nu is tanà he imbeǥey nu kandan he egkaangken dan.

Ester 4:16

“Genat ka, ne tiǥuma nu is langun he menge Judio he kayi te Susa ne puasa kew para kediey. Kenè kew megkaan wey med-inum seled te tetelu he andew wey tetelu he kezukileman. Ebpuasa a zaan wey is menge suluǥuen ku he menge vahi. Ne emun egkepasad, ne edhendiyà a te hadì minsan pa te supak heini te kesuǥuan. Belaǥad ke himetayi a.”

Exodus 33:5

Su geina te mibpekeǥiyan sikandan te Nengazen ki Moises te, “Utew kew mesinupaken he menge etew ne emun eduma a keniyu te minsan meǥaan dà ne egkezezeetan ku en sikiyu tenged te kenè ku kebpekaantus. Ne pemul-uta niw is menge elahas niw ne iyan e en metau ke hengkey is ebeelan ku ziyà te keniyu.”

Isaias 22:12

Dutun he andew mid-umew kew te Nengazen he MEGBEVAYÀ he Mekeǥeǥehem su ibperuǥur kew zin wey ibpesineǥew. Migkeǥiyan kew zin he ipetuusi niw is kedlalew niw pinaaǥi te kepevangul niw wey kebivisti niw te saku.

Isaias 58:4

Ebpuasa kew iyan piru ebpetebtebekà wey ebpelewlewanè kew, wey ebpesumsumbaǥè kew pa ganì. Kenè niw isipa he is puasa he ebeelan niw ǥuntaan ebpeketavang wey ku pemineǥa is menge kebpengemuyù niw.

Jeremias 3:22

Sikiyu is kenà metinumanen he menge etew, likù kew kayi te kediey su ebewian ku is kegkeengey-engey niw.” Midtavak dan te, “Uya, ed-uvey key ziyà te kenikew su iyan ka Nengazen he Megbevayè dey.

Jeremias 36:7

Su kela ke pinaaǥi kayi edangep sikandan diyà te Nengazen, ne ed-engkezan dan is mezaat he vetasan dan. Su mibpetizeenan en sikandan te Nengazen he edsilutan sikandan tenged te utew zin kegkepauk.”

Jeremias 4:1

Migkaǥi is Nengazen te, “He Israel, likù ka pezem kayi te kediey. Emun idselikwey nu en is utew mezaat he zuma he menge ed-ezapen ne kenà ad kenikew ewai,

Jeremias 4:2

ne ngazan ku zà is gemita nu emun edheǥeten nu is penangdù nu ne pengungubpaan ka he egkeseriǥan, hustu wey metazeng, ne egkehimu ka he tuvad te menge nasyun, ne ebeǥayan ke zan te zengeg.”

Ezekiel 33:11

Ne ǥuntaan keǥiyi nu sikandan he siak, is Nengazen he MEGBEVAYÀ he uuyag, migkaǥi a he kenà a egkelipey emun duen ebpatey he lalung he etew. Iyan suat ku he engkezi zan is mezaat he menge vaal zan su wey zan meuyag-uyag. Umbe sikiyu is menge etew te Israel, engkezi niw en is mezaat he menge vaal niw. Maan is egkesuat kew he ebpatey?

Daniel 9:3

Ne tenged dutun midangep a ziyà te Nengazen he Megbevayà pinaaǥi te ked-ampù. Mibpuasa a, mibivisti a te saku, wey mibukbukan ku te avu is ulu ku tenged te kegkeseeng ku.

Hoseas 12:6

“Umbe sikiyu is menge kevuwazan ni Jacob, likù kew en diyà te Megbevayè niw, ne ipeehè niw is kebmahal wey hustu he kukuman. Ne pedayun kew sarig te Megbevayè niw.”

Hoseas 12:7

Migkaǥi is Nengazen te, “Susuaten te kedlimbung is menge nigusyanti niw; egamit sikandan te limbungan he timbangan.

Hoseas 14:1

Migkaǥi si Hoseas te, “He menge tig-Israel, likù kew ziyà te Nengazen he Megbevayè niw, su nezeetan kew tenged te menge salè niw.

Hoseas 6:1

Mibitiyara is menge Israilihanen he ke sikandan te, “Kuwa kew en, su edlikù kiw en diyà te Nengazen. Iyan sikandin midezaat kenitew ne iyan daan sikandin edtavang kenitew.

Joel 1:13

Sikiyu is menge memumuhat he ebpenilbi ziyà te pemuhatà he para te Megbevayè ku, bivisti kew te saku ne hendiyè kew te valey te Nengazen ne sineǥew kew seled te tivuuk he kezukileman. Su wazè en menge trigu wey menge vinu he igkepemuhat diyà te valey te Megbevayè niw.

Zacarias 7:3

Su wey zan hengyui is menge memumuhat diyà te valey te Nengazen wey is menge ebpeneuven he insai zan is Nengazen ke kinahanglan pe be is kedseengseeng wey kebpuasa zan dutun te ikelima he vulan he paaǥi te kedtedemi te kegkerundus te valey te Nengazen, iring te layun dan ebeeli seled en te mahabet he menge tuig.

Zacarias 7:5

“Keǥiyi nu is langun he menge etew te Israel ragkes en is menge memumuhat, he is kebpuasa zan wey kedseengseeng dan te kada ikelima wey ikepitu he vulan seled te kepituwan en he tuig wazè dan himuwa para kediey.

Malakias 1:9

Migkaǥi si Malakias, “Guntaan, sikiyu is menge memumuhat, hengyua niw is Megbevayà he mehizuwi kiw zin. Piru heeyan he kelasi te menge pemuhat ne ibpemuhat niw kandin, siguradu he kenè kew zin ebpaahaan te keupiya zin. Iyan heini migkaǥi te Nengazen he Mekeǥeǥehem.”

Zatù 2:4

Ne hein nezineg haazà te menge Israilihanen, nemekesineǥew sikandan.

Zatù 20:26

Umbe, mid-uman en maan medtekezeg diyà te Betel is langun he menge Israilihanen ne midsineǥew zan. Neminuu zan, ne mibpuasa zan diyà te etuvangan te Nengazen dutun he andew taman te kebmezukilem. Nemuhat dan te menge pemuhat he edtutungen wey menge pemuhat he para te meupiya he kedepità.

1 Samuel 7:3

Migkeǥiyan sikandan ni Samuel te, “Emun tutuu is kedlikù niw ziyà te Nengazen, itimbag niw heeyan is menge ed-ezapen niw apil heeyan is ledawan ni Ashtoret, ne pevayàbayè kew te Nengazen ne iyan dà sikandin silbiyi niw. Emun ebeelan niw heini ne edluwasen kew zin dutun te menge Filistihanen.”

1 Samuel 7:6

Dutun te netiǥum en sikandan langun diyà te Mizpa, migkuwa zan te wahig ne in-itis dan diyà te etuvangan te Nengazen. Te haazà he andew mibpuasa zan ne mibuyù sikandan te pesaylu te menge salè he nehimu zan diyà te Nengazen. Si Samuel is nengulu te menge Israilihanen diyà te Mizpa.