Jeremias 8:2 - Manobo Western Bukidnon OT

² Ne ebpekepeyapat heini ziyà te tanà he egkesilaan te andew, bulan wey menge vituen he mibmahal zan, midsunud dan, midengepan dan, wey mid-azap dan. Kenè en edtiǥumen is menge tulan dan wey ikeleveng, kekenà, ebpekepeyapat dà heini ziyà te tanà he henduen be te menge tai.

Jeremias 8:2 ပူးပေါင်းရင်းမြစ်များ

2 Hadì 17:16

Inselikwey zan is langun he menge suǥù te Nengazen he Megbevayè dan, ne nengugelingen sikandan mebaal te ledawan te zezuwa he nati he vaka, wey te tukud he simbulu te vahi he ed-ezapen he si Ashera. Mid-azap dan is andew, is bulan, wey is menge vituen wey mibeǥayan dan si Baal te zengeg.

2 Hadì 21:3

Mid-umanan din benguna is menge simbahan diyà te metikang he menge lugar he imperundus dengan te amey zin he si Hezekia. Mibaal zaan sikandin te menge pemuhatà he para ki Baal wey mibpevaal sikandin te tukud he simbulu te vahi he ed-ezapen he si Ashera, iring te mibeelan ni Hadì Ahab he hadì te Israel. Mid-azap din is menge merayag he egkengaahà diyà te langit.

2 Hadì 21:5

Impelastar zin heini he menge pemuhatà diyà te zezuwa he lama zuen te valey te Nengazen ne egemiten haazà he menge pemuhatà te ked-azap te langun he merayag he egkengaahà diyà te langit.

2 Hadì 23:5

Impaawè din diyà te ketengdanan dan is menge memumuhat he ebpenilbi te zuma he menge ed-ezapen. Heini he menge memumuhat, insarig dengan kandan te menge hadì diyà te Juda is kedtutung te menge veyewà diyà te menge simbahan diyà te metikang he menge lugar ziyà te menge inged diyà te Juda wey ziyà te peliǥuy te Jerusalem. Midtutung sikandan te menge veyewà para ki Baal wey te egkengaahà diyà te langit–andew, bulan, wey menge vituen.

Salmo 53:5

Piru egkengeheratan sikandan. Egkeǥezam dan is kegkahandek he wazè dan pa keenu meseǥazi, su ibpeyapat te Megbevayà is menge tulan dan. Sikandan is menge edsurung keniyu te menge tig-Israel, ebpeel-elezan niw sikandan, su inselikwey sikandan te Megbevayà.

Salmo 83:10

Mibpatey sikandan diyà te Endor ne neredak is menge lawa zan ne nehimu he abunu te tanà.

Salmo 83:11

Dèdeeti nu is menge pengulu zan iring te mibeelan nu ki Oreb, ki Zeeb, ki Zeba, wey ki Zalmuna.

Megwewali 6:3

Egkehimu he mahabet is anak te sevaha he etew wey meluǥayad is untung din, piru minsan meluǥayad is untung din ke wazè din kelipey zuen te meupiya he menge vutang he nezawat din wey kenà sikandin igkeleveng ke ebpatey, ne meupiya pa is batà he neranran kenà sikandin.

Jeremias 14:16

Ne mehitenged te menge etew he midseysayan dan te menge ibpeseyuzan dan, ebpemematey zan ne ibpenimbag sikandan diyà te menge zalan te Jerusalem. Ebpematey zan tenged te tebek wey vitil. Wazè edleveng kandan wey te menge esawa zan wey menge anak dan. Ibpeǥezaman ku kandan is silut he ereg kandan.”

Jeremias 16:11

Keǥiyi nu sikandan he iyan heini tavak ku: Iyan imbeeli ku kayi is geine te inselikwey a te menge kepuun niw. Nenilbi zan wey mid-azap te zuma he menge ed-ezapen. Inselikwey e zan ne wazè dan tumana is menge kesuǥuan ku.

Jeremias 16:4

Ebpematey sikandan tenged te grabi he zaru. Wazè en egkesamà he egkeseeng wey edleveng kandan, kekenà, ebpekepeyapat is menge lawa zan he henduen be te menge tai he ebpekepeyapat diyà te tanà. Is duma kandan ebpematey tenged te tebek wey vitil, ne egkeenen sikandan te menge tagbis wey zumezaas he menge langgam.”

Jeremias 16:6

Ebpematey is minsan hentei kayi he tanà, sepian man etawa pubri, ne wazà ebpekeleveng kandan wey wazà edlalew tenged kandan. Wazè en ebpelian din is lawa zin etawa ebpevangul su ibpetuusan din is kedlalew zin tenged te minatey he zuma zin.

Jeremias 19:13

Uya, is langun he ubpeey ziyà te Jerusalem, ragkes en is turuǥan te menge hadì te Juda, ed-isipen he meremerik iring te Tofet. Diyà te atep kayi he menge valey, edtutung is menge etew te menge veyewà he para te ed-ezapen dan he menge vituen, wey ebpemuhat dan kayi te pemuhat he inumen he para te zuma he menge ed-ezapen.’ ”

Jeremias 22:19

Is kedlevenga kandin egkeiring dà te kedlevenga te minatey he asnu; eguyuzen ne idtimbag diyà te ǥawas te menge pultahan te Jerusalem.”

Jeremias 25:33

Dutun he andew mahabet is ebpenhimetayan te Nengazen. Ne minsan ebpekepeyapat diyà te minsan hendei is ebpematey, ne wazà egkeseeng etawa edtiǥum etawa edleveng kandan. Ebey-anan dà sikandan he henduen be te menge tai he nemekesavuk diyà te tanà.

Jeremias 31:40

Minsan is tivuuk he suǥud-suǥud he timbaǥà te ebpematey wey menge igmuk te menge pemuhat, ne idsivey para kedì; ragkes en is langun he vevesukà diyà te Kidron he zal-ug diyà te edsilaan, pehendiyà te Pultahan te menge Kudà diyà te zizaya. Kenè en egkeuman egkezeeti heini he inged.”

Jeremias 36:30

Umbe, iyan heini migkaǥi ku mehitenged kenikew, Hadì Jehoyakim he hadì te Juda: Wazè nu kevuwazan he egkahadì diyà te ginhedian ni David. Edhimetayan ka, ne idtimbag dà is lawa nu. Egkekagkag heini emun maandew ne egkezehemuǥan emun mezukilem.

Jeremias 9:20

Guntaan, sikiyu is menge vahi, pemineǥa niw is migkaǥi te Nengazen. Purungi niw heini pemineǥa. Penurua niw is menge anak niw he menge vahi wey menge zuma niw te kedruǥur wey te kegkanta para te minatey.

Jeremias 9:21

Nekeuma ziyà te pemilya tew wey inged tew is kemetayen wey te melig-en he parti kayi. Mibpenhimetayan is menge vatà he ebevaleyvaley ziyà te menge zalan wey is betan-en he menge maama he midtiǥum diyà te menge pelasa.

Jeremias 9:22

Migkaǥi is Nengazen te, “Ne nekepeyapat diyà te tanà is nemematey he henduen be te menge tai. Wey henduen be te menge pungu he netaǥak te menge ebpemenraǥun, ne wazè en heini seǥipaa.”

Ezekiel 29:5

Ne idtimbag ku sikew wey is menge isdà diyà te disirtu, ne ebpekesesavuk ka ziyà te tanà he wazà egkuwa wey edleveng kenikew. Ne ibpekaan ku sikew te zumezaas he menge langgam wey menge tagbis.

Ezekiel 39:5

Egkezeetan kew ziyà te menge vevesukà su iyan a, is Nengazen he MEGBEVAYÀ migkaǥi kayi.

Ezekiel 6:5

Ibpelastar ku sikiyu is ebpematey he menge Israilihanen diyà te etuvangan te menge ed-ezapen niw ne ibpeyapat ku is menge tulan niw ziyà te ebpekeliǥuy te menge pemuhatè niw.

Ezekiel 8:16

Ne mid-uwit e zin diyà te seled he lama duen te valey te Nengazen. Ne ziyà te ǥemawan te valey te Nengazen he ziyà te pid-elangan te varkun wey pemuhatà, duen 25 he menge etew. Ed-iniyug sikandan duen te valey te Nengazen he edsinaru ziyà te edsilaan su ed-ezapen dan is edsilà he andew.

Zefanias 1:17

Migkaǥi is Nengazen te, “Ibpaaǥi ku heeyan he kemeresayan diyà te menge etew, ne edhipanew sikandan he henduen be te menge lakap, su ǥeina te nekesalè dan kayi te kedì. Egkeiring te wahig he edtudà is lengesa zan, ebpekepeyapat is menge lawa zan iring te menge tai.

Zefanias 1:5

Edezeetan ku zaan is menge ebpemenahik diyà te atep te valey zan su ed-azap dan te andew, bulan, wey menge vituen. Edezeetan ku is menge ed-azap wey nenangdù he ebpenilbi kayi te kedì piru nenangdù daan he ebpenilbi ziyà te ed-ezapen he si Molec.

Deuteronomio 17:3

wey midsupak te suǥù din pinaaǥi te ked-azap din te selakew en he ed-ezapen etawa andew etawa vulan etawa menge vituen.

Deuteronomio 4:19

Kinahanglan he kenè kew egke-iniyat he edsimba te egkengeehè niw ziyà te langit–andew, bulan wey menge vituen. Insavuk heini te Nengazen he Megbevayè niw he para te tivuuk he keet-etawan kayì te kelibutan.