Jeremias 7:16 - Manobo Western Bukidnon OT

¹⁶ “Umbe sikew, Jeremias, kenè ka ampù para kayi he menge etew. Kenè ka pehizuhizu wey hangyù kayi te kedì para kandan, su kenè ku sikew ebpemineǥen.

Jeremias 7:16 ပူးပေါင်းရင်းမြစ်များ

2 Samuel 8:18

Is pengulu te tigbantey ki David he menge Kiritnen wey menge Pilitnen, iyan si Benaya he anak ni Jehoyada. Ne is menge anak ni David he menge maama, iyan megsesambag din.

Exodus 32:10

Ne ǥuntaan bey-ani e en kenikew su nepeukan ku en sikandan ne edèdeetan ku en sikandan. Ne iyan ke zà wey is menge kevuwazan nu edhimuwen ku he ventuǥan he nasyun.”

Isaias 1:15

“Emun ebpengemuyù kew ne kenè ku sikiyu ebpemineǥen. Kenà a ebpemineg minsan kepipira kew pa med-ampù, su mahabet en is mibpenhimetayan niw he menge etew.

Jeremias 11:14

“Umbe sikew Jeremias, kenè ka pengemuyù para kayi he menge etew. Kenè ka pehizuhizu kedì para kandan, su kenè ku sikandan ebpemineǥen emun ed-umawen e zan dutun te timpu te kedlised dan.

Jeremias 15:1

Migkaǥi is Nengazen kayi te kedì te, “Minsan si Moises pa wey si Samuel is ebpehizuhizu kediey para kayi he menge etew, ne kenè ku sikandan egkehizuwan. Umbe ipekeziyù sikandan kayi te etuvangan ku. Ipawè niw en sikandan!

Jeremias 15:6

Inselikwey a keniyu; layun a keniyu ed-iniyuǥi. Umbe egemiten ku is gehem ku te kedezaat keniyu. Neperahan ad he ebpaahà te hizu ku keniyu.

Jeremias 18:20

Meupiya is mibeelan ku ziyà te kandan ne ebelesan e zan te mezaat. Mibangbang sikandan su para meulug a zutun. Tentenuzi nu he midangep a ziyà te kenikew te kedhangyù he kenè nu en sikandan kepeuki.

Jeremias 4:28

Egkeseeng is kelibutan ne ebmerusirem is langit, su nekaǥi ku en is silut, ne kenè ku en ebelvelewanan is nekaǥi ku. Nekedisisyun ad ne kenè en egkahalin is isip ku.”

Jeremias 7:17

Wazè nu ve maahà is menge ebeelan dan guntaan diyà te menge inged diyà te Juda wey te menge zalan diyà te Jerusalem?

Micas 3:4

Dutun te timpu te kedsiluti keniyu ebuyù kew te tavang diyà te Nengazen, piru kenè kew zin edtevangan; ed-iniyuǥan kew zin tenged te mezaat he menge vaal niw.

Deuteronomio 9:14

Bey-ani ad kenikew su edezeetan ku sikandan su wey melipati en sikandan. Ne edhimuwen ku sikew wey is menge kevuwazan nu he nasyun he mekeǥeǥehem pa wey mahabet pa kandan.’