Jeremias 7:10 - Manobo Western Bukidnon OT

¹⁰ Ne mid-uvey kew wey midhitindeg diyà te etuvangan ku kayi te valey ku, he mibpili ku he kayi a ebeǥayi te zengeg. Ne migkaǥi kew te, “Wazè kiw memenu.” Ne mibpedayun kew gihapun mebaal te utew mezaat he menge vaal.

Jeremias 7:10 ပူးပေါင်းရင်းမြစ်များ

1 Hadì 9:3

Migkaǥi is Nengazen diyà te kandin te, “Nezineg ku is ampù nu wey hangyù nu kayi te kediey. Heini is baley ku he mibangun nu, mibpilì ku heini he lugar he kayi a ebeǥayi te zengeg taman te taman. Ebentayan ku heini wey layun ku ed-etura.

2 Hadì 21:4

Mibpevaal zaan sikandin te menge pemuhatà diyà te valey te Nengazen, he sumalà te Nengazen, haazà he valey ziyà te Jerusalem iyan kes lugar he zutun sikandin ebeǥayi te zengeg.

2 Cronica 33:4

Mibpevaal zaan sikandin te menge pemuhatà diyà te valey te Nengazen, he sumalà te Nengazen haazà he valey ziyà te Jerusalem iyan kes lugar he zutun sikandin ebeǥayi te zengeg taman te taman.

2 Cronica 33:7

Insavuk din diyà te valey te Megbevayà is ledawan he mibpeveelan din he iyan man pezem heini sikan is simbahan he migkaǥi te Megbevayà diyà te ki David wey ziyà te anak din he si Solomon, he ke sikandin te, “Wazà pidtemanan te kebeǥayi kedì te zengeg kayi te valey ku wey kayi te Jerusalem he iyan kes lugar he nepilì ku ziyà te langun he menge lugar te langun he menge tribu te Israel.

Erubasa 15:8

Egkeepesan te Nengazen is pemuhat te menge lalung, piru igkesuat din mulà is menge kebpengemuyù te menge metazeng.

Isaias 48:2

Egngeranan niw is keugelingen niw he meǥinged diyà te segradu he inged, ne egkaǥi kew te edsarig kew te Megbevayà te Israel, he iyan ngazan din is Nengazen he Mekeǥeǥehem.”

Jeremias 32:34

Diyà te valey ku he mibpilì ku he zutun a ebeǥayi te zengeg, ne midremerikan dan heini pinaaǥi te kedsevuki zan te utew mezaat he menge ed-ezapen.

Jeremias 34:15

Diyà te nenlavey he menge andew neisip-isip niw he kenà haazà hustu, ne mibeelan niw is hustu ziyà te etuvangan ku. Pudu kew mibpezumazuma he ebeǥayan niw te vayàbayà is menge uripen niw he zuma niw he Hebriyuhanen. Nekid-uyun kew pa man ganì kediey mehitenged kayi ziyà te valey ku he mibpili ku he zutun a ebeǥayi te zengeg.

Jeremias 44:9

Nelipatan niw en be is kelelalung te menge kepuun niw wey te menge hadì wey menge rayna te Juda, wey is mezaat he menge vaal niw wey te menge esawa niw hein diyè kew pa te Juda wey Jerusalem?

Jeremias 7:11

Egkeisip niw ve he heini is baley ku, he mibpili ku he kayi a ebeǥayi te zengeg, egkehimu he elesà te menge tulisan? Neehè ku is langun he mezaat he menge vaal niw keniyan. Iyan a, is Nengazen, is migkaǥi kayi.

Jeremias 7:14

Umbe, ke hengkey is mibeelan ku ziyà te Shilo, iyan daan ebeelan ku ǥuntaan diyà te valey ku he zutun a ebeǥayi te zengeg, kes baley ku he midseriǥan niw he zutun te lugar he imbeǥey ku keniyu wey te menge kepuun niw.

Jeremias 7:30

Migkaǥi is Nengazen te, “Mezaat is menge vaal te menge etew ziyà te Juda. Diyè dan ipenavuk is utew mezaat he menge ed-ezapen dan te valey ku, he mibpili ku he zutun a ebeǥayi te zengeg, ne tenged dutun mibmeremerik heini.

Ezekiel 20:39

Migkeǥiyan daan te Nengazen he MEGBEVAYÀ is menge etew te Israel te, “Sigi, pedayun kew en he ebpenilbi te zuma he menge ed-ezapen niw emun kenè kew egkesuat he ebpezumazuma kediey. Piru egkeuma is timpu he kenà ad keniyu egkepeelimungawan pinaaǥi te kebpemuhat niw ziyà te menge ed-ezapen niw.

Ezekiel 23:29

Tenged te pauk dan edsilutan ke zan, ne egkuwaan dan is langun he hineǥuan nu. Ed-ewaan ke zan is lelevas, ne egkezayag is mekeeled-eled he kebpekesavuk nu tenged te mahawag he vaal nu he iyan is kebelegyè nu te zengeg nu.

Ezekiel 23:37

Nekepenapew zan wey nekepatey pinaaǥi te ked-azap te zuma he menge ed-ezapen, is menge anak dan he inhalad dan kayi te kediey zutun te kegkeetew kayi, impekaan dan te menge ed-ezapen pinaaǥi te kebpemuhata zan duen.

Ezekiel 33:25

Ne guntaan keǥiyi nu sikandan, he iyan a, is Nengazen he MEGBEVAYÀ migkaǥi te, ‘Egkeisip niw ve he egkaangken niw ǥihapun haazà is tanà minsan egkaan kew te usa he zuen din pa lengesa, wey ed-azap kew te zuma he menge ed-ezapen niw, wey ebpenhimatey kew te etew?

Ezekiel 33:31

Umbe, ed-uvey is menge etew ku ziyà te kenikew iring duen te layun dan ebeeli, ebpinuu zan diyà te etuvangan nu he henduen be te tutuu he ebpemineg dan kenikew, piru iyan benar is wazè dan tumana is mibpengaǥi nu. Netuleng dan dà te kegkaǥi he mahal e zan, piru iyan diyà te ǥehinawa zan is dekelà he kadar te selapì.

Ezekiel 5:11

Iyan a, kes uuyag he Nengazen he MEGBEVAYÀ, ebpenangdù a he edezeetan ku sikiyu duma is kenà kegkehizu su midremerikan niw is baley ku pinaaǥi te ked-azap niw te zuma he menge ed-ezapen wey kebaal niw te utew mezaat he menge vaal.

Daniel 9:18

He Megbevayà, pemineǥa a kenikew. Su utew mekehizuhizu is kebpekesavuk dey wey nevengkag is inged nu he zutun egkilelaa is kegkemegbevayè nu. Wazè key medhangyù diyà te kenikew tenged te ketazeng dey, kekenà, tenged te netuenan dey he utew ka hihizuwen.

Hoseas 6:9

Is menge memumuhat niw henduen be te grupu te menge tulisan he ebantey zà te egkebiktima zan. Ebpenhimatey sikandan diyà te zalan he ibpehendiyà te Shekem, wey zuen pa zuma he mekeeled-eled he menge vaal he mibeelan dan.

Amos 4:5

Tutung kew te supas he midtepayan he pemuhat niw te kebpeselamat kayi te kedì. Sigi, ipahambug niw heeyan ragkes is menge pemuhat niw he keugelingen he suat is kebpemuhata zuen, su iyan man heeyan egkesuatan niw. Iyan a, is Nengazen he MEGBEVAYÀ, migkaǥi kayi.

Zefanias 1:5

Edezeetan ku zaan is menge ebpemenahik diyà te atep te valey zan su ed-azap dan te andew, bulan, wey menge vituen. Edezeetan ku is menge ed-azap wey nenangdù he ebpenilbi kayi te kedì piru nenangdù daan he ebpenilbi ziyà te ed-ezapen he si Molec.

Malakias 3:15

Ke sikiyu zaan te, ‘Sumalà te neehè tew, iyan is menge mepelevawen nengezeyzey. Utew mid-uswag is mezaat is menge vaal zan, ne minsan sikan is midhinggat dan is Megbevayà he mepauk kandan pinaaǥi te mezaat he menge vaal zan ne wazà memenu.’ ”