Jeremias 6:9 - Manobo Western Bukidnon OT

⁹ Ne heini pa is migkaǥi te Nengazen he Mekeǥeǥehem: “Is egkesamà he uuyag diyà te Jerusalem ibpepenginrarew ku te menge kuntada, iring te kebpekirarew te ebpenrupù te paras he midliku su edsusiyen din is menge subpang ne midrarew zin is nesamà he menge veǥas kayi.”

Jeremias 6:9 ပူးပေါင်းရင်းမြစ်များ

Jeremias 11:23

Wazà egkesamà he uuyag te menge tig-Anatot, su ebpeeǥiyan ku sikandan te kezeetan dutun te timpu te kedsiluti ku kandan.”

Jeremias 16:16

“Piru ǥuntaan, ibpehendiyè ku zep-a te kandan is mezakel he menge kuntada zan he iring te menge mengingisdà he edhingutel kandan. Is menge kuntada zan iring daan te menge mengengasu he ebpen-ahà kandan diyà te menge vuntud, menge vuvungan, wey ziyà te menge sihung te vatu.

Jeremias 49:9

Kenè be is ebpenrupù te paras kenè din ed-eminen is menge veǥas kayi, kekenà, edsemaan din? Kenè be is tekawen kenè din ed-eminen te egkuwa is menge azen diyà te seled te valey, kekenà, iyan dà egkuwaan dan is kinahanglan he egkuwaan dan?

Jeremias 8:3

Is egkesamà he uuyag kayi te mezaat he nasyun ibpeyapat ku ziyà te zuma he menge nasyun, ne zutun edtumuen dan is kebpatey kenà te kegkeuyag. Iyan a, is Nengazen he Mekeǥeǥehem, is migkaǥi kayi.”