Jeremias 6:8 - Manobo Western Bukidnon OT

⁸ Ebpetizeenan ku sikew is Jerusalem: emun kenè ka ebpemineg, ed-iniyuǥan ku sikew; ne edhimuwen ku he mekevulungbulung is tanè nu su para wazè en ed-ubpè kayi.”

Jeremias 6:8 ပူးပေါင်းရင်းမြစ်များ

Salmo 2:10

Umbe, sikiyu is menge hadì wey menge pengulu kayi te kelibutan, sevuta niw heini he menge lalag, ne pemineǥa niw is petizaan keniyu.

Salmo 50:17

Egkeepesan niw is menge penurù ku; wazè niw seǥipaa is menge lalag ku.

Salmo 94:12

Nengazen, utew zeyzey is etew he ebmensuwen nu pinaaǥi te kebpenurua nu kandin te menge kesuǥuan nu.

Erubasa 19:20

Pemineǥa nu is idsambag kenikew ne zewata nu is ibpenurù kenikew ne emun egkeuǥet egkehimu ka he uluwanen.

Erubasa 4:13

Pekezeseni nu te egawed is penurù ku; kenè nu ituǥut he maawà diyà te kenikew, pekeventayi nu su iyan heini untung nu.

Jeremias 17:23

piru wazè dan mebpemineg kediey. Kenà sikandan mepezumdumahan! Kenè dan edewaten is kebmensuwa ku kandan.

Jeremias 2:15

Is menge kuntada zin henduen be te erimaung he edhiniǥer ziyà te kandin. Mibpendezeetan dan is menge tanà kayi, wey mibpemengkag dan is menge inged duen, ne wazè en ed-ubpà duen.

Jeremias 31:19

Dengan mid-ewaan dey sikew, iyan, guntaan kenè dey en heeyan ed-ul-ulahan. Hein neseǥipè dey en he nekesalè key nekeisip-isip key tenged te kegkeseeng dey. Utew zey ingkeeled is mibeelan dey hein menguhed key pa.”

Jeremias 32:33

Mid-iniyuǥan e zan minsan layun ku sikandan ebpenurùa. Kenè dan ebpemineg wey kenè dan egkesuat he ebpenuruen.

Jeremias 4:14

“Menge tig-Jerusalem, lumpiyuwi niw is kezaat te gehinawa niw su wey kew melibri. Ebpedayun en be is kezaat te isip niw?

Jeremias 7:20

Ne iyan a, is Nengazen he Megbevayà, migkaǥi kayi: Ibpeǥezaman ku is utew ku kegkepauk kayi te lugar, ziyà te menge etew, ziyà te menge uyaǥen, diyà te menge kayu, wey menge abut te tanà. Is pauk ku iring te hapuy he kenà egkeevukan.”

Jeremias 7:28

Umbe, keǥiya nu heini ziyà te kandan: Iyan heini he nasyun he is menge etew zuen kenè dan ebpezumazuma te Nengazen he Megbevayè dan, wey kenà egkesuat he edewayen. Wazè en diyà te kandan is ketutuanan; kenè dan en egkaǥi te tutuu.

Jeremias 7:34

Ibpeengked ku en is kegalew wey kedlipey ziyà te menge zalan te Jerusalem. Is melipayen he kegkaǥi te beuǥu kenè en egkezineg diyà te menge inged te Juda su egkehimu heini he mekevulungbulung.”

Jeremias 9:11

Su migkaǥi is Nengazen te, “Edezeetan ku is Jerusalem, ne egkehimu zà heini he ubpeey te leew he menge asu. Is menge inged diyà te Juda egkeiring te disirtu he wazà duen ed-ubpà.”

Ezekiel 23:18

“Nepeukan ku si Oholiba ne mid-iniyuǥan ku en iring te mibeelan ku ziyà te suled din su utew keladu he mibpedayun sikandin mebpelelevag.

Hoseas 9:12

Minsan ebpekaanak sikandan, ne egkuwaan ku is langun he anak dan ne ebpekelalew kew. Mekehizuhizu kew emun ed-ewaan ku en sikiyu.

Leviticus 26:34

Dutun te menge vihag kew ziyà te lugar te menge kuntada niw ne egkevengkag is lugar niw, ne ebpekehimeley is tanè niw. Su zutun te ed-ubpè kew pa zutun te tanè niw ne wazè niw heini ipehimeley minsan dutun te tuig te kebpehimelaya te tanà. Piru zutun he timpu human en heini ebpekehimeley zutun te wazè en kayi ed-ubpa.

Zefanias 3:7

Ne tenged kayi te mibeelan ku, iyan neisip ku is: siguradu he edtehuzen ad te menge etew ku ne edewaten dan en is kedsewaya ku kandan, su wey kenà mezeeti is inged dan sumalà te migkaǥi ku ziyà te kandan. Piru nasì en med-iseg is kebaal zan te salà.

Deuteronomio 32:29

Ke metau zan pa pezem ne egkesavut dan ke hengkey is egketemanan dan diyà te menge egkehuziyan he timpu.