Jeremias 6:22 - Manobo Western Bukidnon OT

²² Mid-uman pa megkaǥi is Nengazen te: “Tengteng kew! Duen menge sundaru he ebpekeuma he ebpemuun diyà te tanà he zizaya. Ebpuun sikandan diyà te sevaha he nasyun he mekeǥeǥehem he ziyà te meziyù he lugar he andam en te kedsurung.

Jeremias 6:22 ပူးပေါင်းရင်းမြစ်များ

Nehemias 1:9

Piru emun edlikù kew zini te kediey ne edtumanen niw is menge suǥù ku, minsan ebpekepeyapat kew pa ziyà te kinemeziyuan he menge lugar, ed-umanan ku sikiyu edtiǥuma ziyà te lugar he mibpilì ku he zutun a ebeǥayi te zengeg.’

Jeremias 10:22

Pemineǥa niw is utew subra he keǥurub te menge sundaru he ebpuun diyà te zizaya. Edezeetan dan is menge inged kayi te Juda, ne egkehimu zà heini he ubpeey te leew he menge asu.”

Jeremias 13:20

Ahàa niw is menge kuntada he ebpekeuma he ebpuun diyà te zizaya. He Jerusalem, hendei en is menge meǥinged he impehivantug nu, he insarig ku kenikew wey nu maatur?

Jeremias 25:32

Impelaus te Nengazen he Mekeǥeǥehem is menge lalag din: “Pengandam kew! Is kezeetan ebpekeuma ziyà te menge nasyun he henduen te mevendes he bagyu he ebpuun diyà te kinemeziyuan he vahin te kelibutan.”

Jeremias 25:9

ibpesurung ku sikiyu te menge etew ziyà te zizaya he ebpenguluwan te suluǥuen ku he si Hadì Nebucadnezar he hadì te Babilonia. Edsurungen dan heini he tanà wey is langun he meǥinged kayi, ragkes en is langun he menge nasyun diyà te nekeelingkus kayi. Ebpurungan ku sikiyu edezeeti, ne egkeheratan is menge etew he ebpekaahà te egkehitavù keniyu ne egkehimu kew he telemayen. Uya, egkezeetan kew taman te taman.

Jeremias 4:16

Midsuǥù sikandan he mebpetizaan dan diyà te menge nasyun wey ziyà te Jerusalem he zuen edsurung he menge sundaru he ebpuun diyà te meziyù he inged. Edhinggaten dan te tebek is menge meǥinged diyà te menge inged te Juda.

Jeremias 4:6

Ivayew is bendirà wey metueni te menge etew he ibpehendiyà sikandan te Jerusalem. Genat kew en ne eles kew su ebpeuwit a te zekelà he kezeetan he ebpuun diyà te zizaya.”

Jeremias 47:2

“Duen menge etew ziyà te nasyun diyà te zizaya he edsurung he egkeiring te zalem he edlapey ziyà te tivuuk he tanà. Edezeetan kayi he menge etew is langun he menge inged wey is menge meǥinged dutun. Ebpekekulahì is menge etew tenged te kegkahandek dan wey ebpemekeerang sikandan te kenà alang-alang.

Jeremias 5:15

Migkaǥi is Nengazen te, “Menge etew te Israel, ebpeuwitan ku sikiyu te menge etew he ebpuun diyà te meziyù he nasyun he edsurung keniyu. Mekeǥeǥehem heini wey kezaan en he nasyun; is kineǥiyan dan kenè niw egkesavut.

Jeremias 5:16

Ebpekepatey is menge gumaan dan, ne memevurut sikandan he menge sundaru.

Jeremias 6:1

“Pelaǥuy kew wey med-eles is menge kevuwazan ni Benjamin! Gawas kew ziyà te Jerusalem! Ipezaǥing niw is budyung diyà te Tekoa ne uyawi niw is Bet Hakerem. Su ebpekeuma is dekelà he kezeetan he ebpuun diyà te zizaya.

Ezekiel 21:31

Ebpeǥezaman ku keniyu is utew ku kegkepauk, ne ibeǥey ku sikiyu ziyà te mesipala he menge etew, he nelayam he ebpenhimatey.

Ezekiel 23:22

“Umbe siak, is Nengazen he MEGBEVAYÀ, egkeǥiyan ku sikew Oholiba te ibpesurung ku sikew te menge kumpadi nu he mid-iniyuǥan nu en hein nepezaan ke en kandan.

Habakuk 1:6

Su edhimuwen ku he gemhanan is menge tig-Babilonia. Heini he menge etew, utew memesipala ne kenè ne egkesanggen he edsurung diyà te zuma he menge nasyun su wey zan maaǥew is menge lugar he kenà kandan.

Deuteronomio 28:49

“Ketau te Nengazen he surunga kew te sevaha he nasyun he ziyà te utew meziyù, he kenè niw egkesavut is kineǥiyan dan. Iring dan te kulaǥu he edawi zutun te kedsurunga zan keniyu.