Jeremias 4:31 - Manobo Western Bukidnon OT

³¹ Nezineg ku is erang wey zag-es, he iring te erang wey zag-es te vahi he ed-anak te penganey. Erang heini te menge meǥinged diyà te Jerusalem he kenè en ebpekeǥehinawa is ebpenepayà he egkaǥi te, “Mekehizuhizu key; henduen be egkevidtawan key en. Su heeyan en is menge kuntada zey he edhimatey kenami.”

Jeremias 4:31 ပူးပေါင်းရင်းမြစ်များ

Genesis 27:46

Ne migkeǥiyan dutun ni Rebeka si Isaac te, “Utew ku en igkerasey te ed-isip-isip is tenged kayi te menge esawa ni Esau he menge Hitihanen. Emun iyan ed-esewaan ni Jacob is tig-kayi zed he vahi he Hitihanen, deyzey pa ke ebpatey e en nasì.”

Job 10:1

“Egkeepesan ku is untung ku, umbe ebpetakà ad he edriklamu. Egkeǥiyen ku is ikezaat te ǥehinawa ku.

Salmo 120:5

Mekehizuhizu a su nekeubpà a zuma keniyu te iring kezaat te menge meǥinged diyà te Meshec wey Kedar.

Isaias 1:15

“Emun ebpengemuyù kew ne kenè ku sikiyu ebpemineǥen. Kenà a ebpemineg minsan kepipira kew pa med-ampù, su mahabet en is mibpenhimetayan niw he menge etew.

Isaias 13:8

Egkerkeren sikandan tenged te kegkahandek. Egkeǥezam dan is utew mesakit; iring dan te vahi he ebeliliten. Ebpetengtengtengà sikandan he egkengehilewhilew su egkengeeled.

Isaias 21:3

Migkerker a wey mibmesakit is lawa ku tenged te neehè ku wey nezineg ku pinaaǥi te kebpekelawas ku, nesekitan a iring te vahi he ebeliliten.

Isaias 26:17

Neehè nu Nengazen is kemeresayan dey. Iring key te vahi he ebeliliten he ebpekepengulahì tenged te utew mesakit.

Isaias 42:14

Egkaǥi sikandin te, “Neuǥet en he timpu he mibpereremek e zà wey mid-eǥen ku is gehinawa ku. Iyan, guntaan ibuswang ku en is pauk ku. Ebpengulahì a he ebpekeeǥes-eǥes iring te vahi he edheǥed is ebeliliten.

Isaias 6:5

Ne migkaǥi a te, “Mekehizuhizu a! Su kenà duwazuwa he edezeetan a, su mezaat is ebpengeǥiyen ku wey is menge etew he emurè ku, mezaat daan is kandan he ebpengeǥiyen. Ne ǥuntaan neehè ku is Hadì he iyan is Nengazen he Mekeǥeǥehem.”

Jeremias 10:19

Migkaǥi is menge tig-Jerusalem te, “Mekehizuhizu kiw tenged te kezeetan tew. Kenè en heini egkeulian. Piru kinahanglan he ed-entusen tew heini.

Jeremias 13:21

Kenè be ibmesakit te ǥehinawa nu ke egkezizalem ka te ǥehem te nasyun he kunaan nu ke kezapig nu? Kenè ke ve vuwa egkesekitan iring te vahi he ed-anak?

Jeremias 14:18

Emun edhendiyà a te menge vevesukà wey menge inged, egkeehè ku is mibpematey te tebek wey vitil. Is menge ebpeneuven wey is menge memumuhat mibpedayun te vuluhaten dan, piru wazè dan metueni ke hengkey is mibeelan dan.’ ”

Jeremias 15:18

Maan is kenè en egkepangkus is kegkesekiti ku? Maan is kenà egkeulian is palì ku? Kenè en be heini egkevewian? Id-awè nu ve is perateng ku he iring te wahig he egkemezahan penahun te gulavung?”

Jeremias 18:21

Piru ǥuntaan, bey-ani nu en ke ebpematey is menge anak dan te vitil wey tebek. Bey-ani nu en he mevalu wey meewai te menge anak dan is menge vahi. Bey-ani nu en he ebpematey te zaru is menge maama kandan wey ebpematey te tebek is menge vetan-en he menge maama kandan.

Jeremias 22:23

Sikiyu is ebpemen-ubpà diyà te turuǥan he mibeelan pinaaǥi te menge kayu he sidru he ebpuun diyà te Lebanon, ebpekezag-es kew emun egkeumahan kew en te kemeresayan, iring te kedag-es te vahi he ebeliliten.

Jeremias 30:6

Guntaan duen id-insè ku keniyu. Ed-anak be is maama? Kenà. Piru, maan is neehè ku is menge maama he mibmemeluntak he egawed te ǥetek dan he henduen be te vahi he ebeliliten?

Jeremias 45:2

Migkaǥi si Jeremias te, “Baruc, iyan heini migkaǥi te Nengazen he Megbevayà te Israel ziyà te kenikew:

Jeremias 48:41

Egkaaǥew zan is menge inged wey menge kampu te Moab. Dutun he timpu egkulbaan is menge sundaru te Moab ne egkeiring te vahi he ebeliliten.

Jeremias 49:22

Tengteng kew! Is kuntada henduen be te kulaǥu he edlayang su edawi te Bozra. Dutun he timpu egketeranta is menge sundaru te Edom he henduen be te vahi he ebeliliten.”

Jeremias 49:24

Midluyahan is menge tig-Damascus ne mibpelaǥuy zan tenged te kegkahandek dan. Migkulbaan dan wey neseeng dan, neiring dan te vahi he ebeliliten.

Jeremias 50:43

Egkezineg heini te hadì te Babilonia ne egkeewaan sikandin te zesen. Handek wey kesakit te gehinawa is egkeǥezam din egkeiring is kegkerasey zin te kegkerasey te vahi he ebeliliten.

Jeremias 6:2

Egevaan ku is mekempet he inged he Jerusalem.

Penhulùhulù 1:17

Mibuyù te tavang is Jerusalem, piru wazà midtavang kandin. Ketau te Nengazen he mehimu he kuntada te menge kevuwazan ni Jacob is menge nasyun diyà te peliǥuy zan. Ne is Jerusalem ed-isipen he meremerik te menge kuntada zan.

Penhulùhulù 1:20

“Nengazen, ahàa nu ke sengemenu kezekelà is kegkeseeng ku! Utew heini merasey he henduen be te egkevidtew en is gehinawa ku su geina te nehimu a he mesinupaken kenikew. Duen kebpemenhimatey ziyà te menge zalan ku, ne minsan diyà te seled te valey ne zuen ebpematey.

Penhulùhulù 2:21

Nemekesesavuk diyà te menge zalan is nemematey he menge vatà wey menge meǥurang. Nemematey te tebek is menge vetan-en he menge maama wey menge vahi. Wazà nu en sikandan mehizuwi zutun te kebpenhimetayi nu kandan tenged te kegkepauk nu.

Hoseas 13:13

“Duen niw en penahun he ebeǥuwen niw is kebpengungubpaan niw. Piru tenged te wazè niw kedsavut, wazè niw heini beliya. Iring kew te vatà he kenà egkesuat he egawas diyà te getek dutun te idlusad en pezem sikandin.

Micas 4:9

“Ne ǥuntaan, maan is edag-es kew is menge meǥinged diyà te Zion he iring te vahi he ebeliliten? Duen niw pe man hadì ne wazè man mebpematey is menge sumesambag din. Sigi, belvelehey kew tenged te kegkesekiti iring te vahi he ebeliliten. Su kenè en egkeuǥet ne ebpekaawè kew ziyà te inged niw ne ziyè kew ebpekeubpà te menge vevesukà, ne zutun edumahan kew ziyà te Babilonia. Piru emun diyè kew en, edlibriyen ku sikiyu wey kew kenà mezezeeti te menge kuntada niw.

Micas 7:1

Migkaǥi si Micas te, “Mekehizuhizu a! Iring a te etew he egkevitil he nengahà te rerawen he menge veǥas te paras etawa higus piru wazè din naahà.